Akyerɛkyerɛfo Nkabɔmu Kuw NAGRAT dze abɔto gua dɛ wɔmmfoa Ɔmampanyin no ne nhyehyɛɛ dɛ Okunyin Eric Nkansah mbedzi dwuma dɛ GES Kwankyerɛfo Panyin fofor no do. Ɔpanyin a ɔda akyerɛkyerɛfo kuw no ano, Owura Angel Carbonu, dze amandzɛɛ yi too gua Ɔbɛsɛ 20, 2022 mu ber a wɔnye nsɛnkyerɛwfo nyaa ehyiadzi.
Ɔbɛsɛ 17, 2022 mu na Ɔmampanyin n’atsenae dze krataa bi bɔtoo gua a nna nsɛm a ɔwɔ mu nye dɛ Ɔbemfo Opoku-Amankwa mmfa no dwumadzi dɛ edwumakuw a ɔhwɛ nwomasua do wɔ Ghana ha (GES) no no Kwankyerɛfo Panyin. Iyi maa akyerɛkyerɛfo kuw GNAT dze hɔn nsɛm bɔtoo gua dɛ dza Aban no yɛ mfomdo ntsi, ɔnsan mfa no dwumadzi mma no, na NAGRAT so kaa dɛ dza aban no ayɛ no nnsɔ enyi.
Iyi ekyir no na Ɔbɛsɛ 19, 2022 mu no, krataa fofor sanee fi Ɔmampanyin n’atsenae bɛda gua dɛ Ɔmampanyin apaw Okunyin Eric Nkansah dɛ ɔno na ɔrebɛhyɛ Ɔbemfo Opoku-Amankwa anan mu dɛ Kwankyerɛfo Panyin ma GES. N’adzekyee Ɔbɛsɛ 20, 2022 no na akyerɛkyerɛfo kuw NAGRAT no ne mpanyimfo a Owura Carbonu dzi hɔn bano no dze bɔtoo gua dɛ wɔnngye dɛm mpawee nhyehyɛɛ no nnto mu.
Nkyerɛmu a NAGRAT kuwmba no dze bɔtoo gua nye yi:
Wɔkyerɛ dɛ ɔnam dɛ Edwumakuw no yɛ dza ɔhwɛ nwomasua ho nsɛm no, ɔwɔ dɛ nyia ɔbɔhwɛ do anaa ɔbɛda ano no yɛ obi a oenya nwomasua ho nyimdzee anaa ntsetsee, na ɔwɔ suahu wɔ nwomasua ho nhyehyɛɛ ho ɔdze bɔboa edwumakuw no no dwumadzi na ne nhyehyɛɛ ma oeetu mpon. Ɔdze kaa ho dɛ nkyɛ Ɔbemfo Kwasi Opoku-Amankwa yɛ obi a oenya ntsetsee na suahu wɔ dɛm kwan no do dze n’edwuma egu no, ɔwɔ wonya obi tse dɛm ara ma ɔbɛhyɛ n’anan mu.
Hɔn asɛm nye dɛ Okunyin Eric Nkansah yɛ obi a n’adzesua na no suahu ne tsitsir akɛyɛ sikakora ho nsɛm na sikasɛm ntotoe nko. Nwomasua ho nyimdzee kakra a na suahu ɔwɔ ara nye n’adzekyerɛ wɔ Kumase Technical University hɔ no. Wɔdɛ dɛ nyimpa ne nyimdzee na no suahu tse dɛm bedzi hɔn a wɔwɔ nwomasua mu enyim a, nna tserɛ woemmbu hɔn bi. Na nkyɛ nyimdzee na suahu tse dɛm dze, sikakorabea edwuma anaa sikasɛm ho ntotoe na wɔdze yɛ.
Owura Carbonu dze kaa ho dɛ nhyehyɛɛ a ɔtse dɛm yi bɛma akyerɛkyerɛfo na hɔn a wɔwɔ nwomasua ho nyimdzee na suahu no wɔ edwumakuw no mu abawmu begura. Dɛm ndzɛmba yi na dza ɔkeka ho binom na ɔma wɔnngye nnto mu dɛ Okunyin Eric Nkansah bɛyɛ Kwankyerɛfo Panyin ama Ghana Nwomasua Edwumakuw no.
