Mbrɛ ɔbɛyɛ ma mbasatsen bɛtsena hɔ da ana ebusua ase so bɛtserɛw no ntsi, Akanfo nnkwetsir awar ho. Wohu dɛ awar araa nye kwan a wobotum afa do atoa ebusua no do fi mbersantsen kɛpem mfesantsen. Iyi saso ntsi wɔnntoto awar famu koraa naaso ɔnam dɛ amambra nyin na wɔsesa no ntsi, nsesa pii na aba Mfantsefo hɔn awar mu.
Tsetse no, sɛ egya bi hu dɛ ne ba banyan bi aso awar a, ɔhwehwɛ ɔbaa a ofi fie papa mu dze ma ne ba no naaso ndɛmber yi dze banyin noara bɔ basia no enyikam na ɔnye no keka ma biribiara dzi mu wie ana oeyi n’egya asotsir. Basia no so bɔ n’egya na ne na amandzɛɛ dɛ oehyia banyin bi a ɔpɛdɛ ɔwar no. Ndɛ mber yi, ɔnam batatu na edwumasɛm ntsi, hɔn a wɔrobɔwar no tum hyia hɔnho wɔ bea a hɔn ebusua fommbɛn hɔ na ɔnam dɛm ntsi ebusua afanu no nyinara nnya ho mmpaa ekyir mbom ɔtɔfabi a, hɔn a wɔpɛ dɛ wɔwar noara kɔ asopitsi kɛyɛ hɔn honandua mu nhwehwɛmu hu dɛ ana wotum war?
Sɛ ɔkɛba no dɛ wotum war a, basia no dze banyin no kekyia n’ebusuafo na dɛmara so na banyin no dze basia no kekyia n’ebusuafo ama anyɛnkoyɛ bi aabɛda ebusua afanu no ntamu.
Nsesa kor so a abaɛfosɛm dze aba awar mu yɛ kɔkɔɔkɔ no mbɔe. Tsetse no, wɔyɛ mapekyir wie a, ɔbaa n’ebusuafo hyɛda a banyin n’ebusuafo mbra mbɔbɔ kɔkɔɔkɔ no naaso ndɛmber yi, banyin na basia no na ne mpanyimfo kohu basian’ebusuafo na wɔbɔ kɔkɔɔkɔ. Nkan no, nna akpeteshie na wɔdze bɔ kɔkɔɔkɔ naaso ndɛ wɔdze hyenapo anaa ‘whisky’ a sika da do.
Kwan a wɔfa do bɔ awar ho nkaa so asesa koraa ɔnam abaɛfosɛm. Tsetse no, sɛ ebusua afanu no tu da no a wɔdze bɛgye awar no si hɔ a, akyeame na wɔhyɛ ase bɔ ho nkaa na nkaabɔ no atserɛw ekodu ebusua nkaa no nyinara enyim. Ndɛ mber yi, akwan ahorow pii na wɔfa do bɔ awar ho nkaa. Nkaabɔ yi bi kɔ do wɔ asɔrdan mu, fuon do, dawurbɔbea na awar nkaabɔ nkrataa ahorow.
Abaɛfosɛm dze nsesa pii aba ndzɛmba a wɔdze gye awar no mu. Tsetse no, nna akpeteshie na ɔdeda ndzɛmba ne nyinara do naaso ndzɛmba resesa no, wɔasesa abɛyɛ no hyenapo. Seseiara dze, ‘Whisky’ na wɔgye . Dza otwa nkyirmba nson mu ndɛ mber yi koraa nye ndɔmufa anaa nkwasea sika a abɛka ho no. Ndɔmufa yɛ sika prudu bi a ɔbaa no n’ebusuagye fi banyin no hɔ. Mpanyimfo kyerɛ dɛ, nkyɛ otwar dɛ banyin no hu ɔbaa no a n’enyi gyee no ho no, nkyɛ otwar dɛ ɔbɔ n’egya amandzɛɛ na ɔhyɛ awargye no ase.
Sɛ ammba no dɛm na sɛ ɔnoara ehu ɔbaa no nye no edzi nkɔmbɔ biara ewie dze a nna otwar dɛ wɔbɔ no kaw osiandɛ ɔato mbra. Ndzɛmbayi nyinara ekyir no, wɔsan gye nsa dɔkɔdɔkɔ adakaba ebien. Tsetse no, nna wɔsan so gye efir a wɔdze pam adze na ndzɛmba a wɔdze yɛ tsir naaso ndɛ mber yi, wɔnngye no mu biara. Ndɛ mber yi so sɛ onyia no a ɔrobɔwar no yɛ kristonyia, wɔgye baebor na nkawa naaso tsetse no, nna wɔnngye.
Tsetse no, nna asafo ns ana wɔdze bɔ ɔmamfo nkaa dɛ osimesi awar wɔ Mfantseman mu. Ebusua no mu mbaapanyin no so wɔma hɔn makyese ama woeetum edzi awar no ho dase. Ndɛmber yi dze, wotum tua asafo nsa no wɔ sika mu. Mbaapanyin no so, ɔtɔfabi a, wɔma hɔn nkɔɔpow, papa anaa mpo nkyɛnse.
Abaɛfosɛm dze nsesa aba kwan a wɔfa do da ɔbaa no n’ehyiadze no edzi no mu. Tsetse no, nna wɔdze dɛm ndzɛmba yi gu ‘air tight’ mu dze kɔ ɔbaa no n’ebusua fie naaso ndɛ mber yi dze, wɔhyehyɛ ndzɛmba yi wɔ apampa mu na sɛ ber du dɛ wɔda no edzi a, nkatasiamba asoa ato santsen etwa kwan mu ma obiara ehu dza okun bi dze rebehyia n’ayefor no.
Tsetse no, nna hɔn a wɔrobɔwar no hɔn ahosiesie no nnhyɛndaa nnyɛ adze tsitsir biara wɔ awar no mu naaso ndɛ mber yid ze, wɔdze hɔn adwen tsim ahosiesie no do araa ma no ho kaw mpo reyɛ asen tsirnsa no. Basia no n’ahosiesie nkotsee mpotum tua tsirnsa no osiandɛ mbrɛ obesi besiesie n’enyim, ntar ahorow a ɔbɛhyɛ wɔ dwumadzi no nyinara mu no tum yɛ obi no dwetsir.
Nsesa kor so a abaɛfosɛm dze aba awar mu wɔ Mfantse mu nye dɛ, sɛ ebusua afa nyinara gye awar no to mu a, hɔn a wɔrobɔwar no kɔ asɛndzibea kɔbɔ hɔn amandzɛɛ na wɔsesan nkrataa dze awar no hyɛ mbra ase na wowie a, wɔdze kɔto hɔn sɔfoe enyim. Sɔfo no bɔ awar no ho dawur kyerɛ asɔrmba no wɔ ber an aka adapɛn ebiasa ma wɔdze ayɛ ayefor no.
Wɔbɔ dawur no ama sɛ obi wɔ biribi ka wɔ awar no ho a,ɔdze to gua ansaana da no a wɔdze bɔwar no aso. Asɔr mpanyimfo no anaa sɔfo no nye hɔn a wɔrobɔwar no fa awar nkyerɛkyerɛmu mber kakra ansaana wɔawar. Da a wɔdze bɛyɛ ayefor no du a, wɔkɔ asɔrdan mu ma sɔfo no kehyira awar no do. Merekyerɛ yi, nna wɔagye awar no amambra kwan do ewie.
Binom tum yɛ amambra awar na matsema awar no nyinara da kor na binom so tum yɛ amambra awar na n’adzekyee no wɔakɔ asɔrdan mu ma sɔfo no ehyira do no. Binom mpo dze, wɔyɛ amambra awar no wie a, wɔtweɔn dapɛn anaa bosoom kor na no mboree ana wɔayɛ matsema awar no. Wowie asɔrdan mu dwumadzi no a, wɔtoa do kɔ beebi a woesiesie hɔ fɛfɛɛfɛw kedzidzi nom nsa ahorow gye hɔn enyi. Tsetse no, nna wɔnnyɛ iyinom nyinara.
Nsesa kor so a aba awar mu wɔ Mfantse asaase do nye bea a awarfo no da sɛ wowie hɔn ayefor no a. Tsetse no, sɛ wɔwar wie a, wɔkɔ bea a banyin no esiesie dɛ wɔbɛtsena abɔ bra no naaso ndɛ mber yi wɔwar wie a, wɔkɔ ahɔhogyebea bɛyɛ dapɛn kor kɛgye hɔn enyi ansaana wɔaba hɔn fie. Iyi dzin a wɔdze frɛ no wɔ borɔfo kasa mu nye “honeymoon”
Iyinom na pii a ɔkeka ho nye nsesa a abaɛfosɛm na suahu dze aba Akanfo awargye mu ma ndɛ nyi ɔdze ahokyer abrɛ nyimpa pii.
