Eduaba ahorow pii na Bɔadze dze doom hɛn na biara so kitsa ahoɔdzen soronko a ɔdze ma nyimpadua no. Eduaba no mu ahorow no bi nye ekutu, mpuwa, aborɔbɛ, borɔsuow, anamuna, mango, alasema na pii a ɔkeka ho.
Dɛm akyerɛw yi bɛkasa afa eduaba a dodowara frɛ no alasema anaa alasema prɔwee ho na ahoɔdzen anaa dwumasun a odzi ma nyimpadua no.
Eduaba yi yɛ eduaba a wɔtaa dua no wɔ Ebibirman ahorow bi tse dɛ Uganda, Alata, Kenya, Ghana na dza ɔkeka ho mu. Ɔnam dɛ ɔwɔ nkurow ahorow pii mu na biara so wɔ ne kasaa ntsi, eduaba yi kitsa edzin ahorow pii. Alatafo frɛ no Agbaluma na Ghanafo binom, nkankan Mfantsefo so frɛ no alasema anaa alasema prɔwee. Dzin a Abɔdze nyansapɛfo dze frɛ no nye “Chrysophyllum albidum” a ɔka “Sapotaceae” eduaba ebusuakuw no ho. Alasema a Borɔfokasa mu no wɔfrɛ no “African
star apple” anaa “African star fruit” yɛ eduaba a ɔber yɛ dɛ akokɔangua anaa berdum. Bi tum yɛ dɛw yie na bi so yɛ wen papaapa. Dɛm eduaba yi ne ber a ɔtaa dze sow yɛ Mumu, bosoom a otwa tun wɔ afe no mu dze kesi Ebɔw bosoom no mu. Ɔyɛ eduaba a obiara tum dzi. Wotum so dze yɛ nsu, tɔfe, mamalade, nsa fenemfenem na pii a ɔkeka ho. Wotum nya angoa fi eduaba yi mu dze yɛ edur ɔnam ahoɔdzen soronko a nhwehwɛmu ada no edzi dɛ wɔahyɛ mu ma no ntsi. Dza odzidzi do yi nye dza eduaba yi tum yɛ dze boa nyimpadua no ma onya ahoɔdzen tum ko tsia nyarbanyarba ahorow.
Odzi kan, eduaba yi boa yiyi ndzɛmba bi a ɔnnyɛ fi nyimpadua no mu. Okitsa adze bi a Borɔfokasa mu no, wɔfrɛ no “Antioxidant” na adze a ɔyɛ wɔ nyimpadua no mu nye dɛ, ɔko tsia ndzɛmba bi a abɔ apee do a nyimpadua no nnhia ma ofi mu pue. Afei, ɔsan bɔ nyimpadua ne mfafakuwa ho ban amma annsɛɛ.
Dza otsia ebien nye dɛ, eduaba yi kitsa adze soronko bi a wɔfrɛ no
“alkaloids”, “flavonoids” na phenols”. Iyinom boa berɛ ahonhon a ɔyɛ a ɔtaa ba nyimpadua no mu no na ɔbɔ nyimpadua no ho ban fi yarba bi tse dɛ esikyire yarba, kokoram yarba na akoma yarba. Nhwehwɛmu ada no edzi dɛ, eduaba yi kitsa edziban bi a otum boa tsew esikyire no dodow a akɔ sor wɔ nyimpadua no mu no do. Eduaba yi san kitsa sodiom kumaa bi na potasiom pii a ɔma ɔyɛ eduaba mapa dze ma hɔn a wɔwɔ mbɔgya mbordo.
Bio, alasema yɛ eduaba a ɔboa ko tsia kokoram yarba. Ɔnam edzibandur “antioxidant” a ɔwɔ mu no ntsi, ɔboa ko tsia kokoram yarba n’ahorow ne tsitsir
“colorectal” kokoram no. Nhwehwɛmu ada no edzi dɛ, alasema tum ko tsia kokoram mboaba no ma onnyin ɔnam edzibandur “pectin”, “beta-carotene” na “vitamin E” ɔwɔ mu no ntsi.
Alasema boa ma nyimpa no do tsew. Adatserfo ada no edzi dɛ faeba boa ma nyimpa no do tum tsew na ɔboa ko tsia kɛseyɛ pii. Alasema kitsa dɛm ndzɛmba no na ɔsan so wɔ angoa a ɔwɔ famu pii.
Alasema yɛ eduaba a ɔboa apemfo araa yie. Okitsa edzibandur bi tse dɛ fɔsforɔso, kashium, faeba, proten a ɔma hɔn ahoɔdzen. Sɛ apemfo dzi eduabɔ no a, ɔboa hɔn ma wonntutu ntafi anaa wonnya ɔpɛ no dɛ wɔbɛfefe basabasa.
Bio, ɔsan boa mbasiafo bɔ hɔn ho ban fi odeepuwa ho. Sɛ basia no nya odeepuwa mpo a, otum dzi bi ma oku odeepuwa mboaba no ma onya n’ahotɔ.
Dza ɔka do yi so yɛ alasema no ho mfaso no bi a
1. Alasema boa tu ayamutsim ase
2. Ɔboa akoma no ma onya ahoɔdzen
3. Otu menmu yarba ase
4. Ɔboa nyimpadua no
Iyi na pii a ɔkeka ho na ɔyɛ mfasodze a alasema dze ma nyimpadua no
