Gyahyehyew yɛ atoyerɛnkyɛm a n’ano yɛ dzen yɛ hyew a nyimpa ndzeyɛɛ ahorow dze ba. Ɔyɛ ber a gyaframee tserɛw yɛ gyatanaa anaa gya kɛse na ɔhyehyew egyapadze na ɔsɛɛ no korakoraa. Ɔtɔ fa bi mpo a, gyahyehyew tum si ma ɔhyew nyimpa dwɛɛ dɛ adze bi. Ɔyɛ gya a ano yɛ dzen a ɔtɔ beebi tse dɛ fie, edwuma mu, skuul, guadzibea, haban mu na mbeambea ahorow pii a ɔkeka ho a ɔnam do ma yetum hwer tsitsir nyimpa na egyapadze ahorow pii. Sɛ iyi si a, ɔdze ɔhaw na kɛdaannda na ɔdze brɛ ankorankor na ɔman no. Yennkotum atsena hɔ dɛ ankorankor, ebusua na ɔman na yeebu hɛn enyi egu gyahyehyew ho nsɛnsɛm do. Ɔyɛ adze bi a oridzi hɛn nya na ɔsɛ dɛ yɛpɛ kwan pa a ɔbɔboa ma yeetum esiw ano.
Gyahyehyew a mereka ho asɛm yi, Ghana ha no, no dodowara si wɔ amamfo hɔn efiefi na hɔn edwuma mu. Sɛ yɛdze mbeambea yinom si nkyɛn a, bea a gyahyehyew taa si kɛse kɛse wɔ Ghana ha kor so nye guadzibea. Ɔreyɛ ayɛ dɛ, afe biara no, gya tɔ hɛn guadzibea ahorow no mu. Sɛ annyɛ gua kɛse a, kakraba a. Iyi yɛ adze a oridzi hɛn nya yie dɛ ɔman a otwar dɛ ankorankor, ndwumakuw a wɔhyɛ aban ase na dza wɔnnhyɛ aban ase nyinara dze hɔnho gye mu siw ano korakoraa ma eguadzifo nya hɔn ahotɔ. Sɛ yɛhwɛ Ghanaman yi a, ɔwɔ gyahyehyew ho abakɔsɛm ahorow a ber a yɛdze ano bɔbɔ do biara no, ɔdze yaw na awerɛhow gya amamfo. Yɛnhwɛ dɛm guadzibea a gyahyehyew abakɔsɛm yi mu bi.
Ebɔbira 4, 2015 mu no, gya kɛse bi tɔɔ Takoradze gua kɛse ne fa bi ma egyapadze ahorow a ɔsɛe dze, ɔsɛ w’enyi. Gya no hyɛɛ ase Memenda na ɔdzɛwee araa n’adzekyee ansaana Odumgya Edwumayɛkuw rutum etu ase. Ansaana afe 2015 dze no ribesi no, nna kɛse bi esi wɔ gua no mu dadaw wɔ afe 2007 mu a, nna n’ano yɛ nyan ankasa ankasa.
Ɔberɛfɛw 26, 2022 mu no, gya kɛse bi tɔɔ China Mɔɔlo a ɔwɔ Weija- Nkran. Mɔɔlo yɛ abaefor guadzibea a wɔtontɔn ndzɛmba ahorow wɔ hɔ tse dɛ guadzibea ahorow a yɛwɔ no. Abaefor guadzibea yi ka abaefor guadzibea a ɔso ankasa wɔ Ghana no mu bi. Gya no hyeew hɔn adan akɛse a wɔkora hɔn ndzɛmba ahorow wɔ mu no na ɔdze kaw kɛse bɔsoaa edwumakuw no a nna ɔnnyɛ asɛm kakraba.
Ne ndaansa, Ɔberɛfɛw 29, 2022 mu no, guadzibea gyahyehyew bi sii. Osii wɔ Kantamanto gua kɛse no mu wɔ Nkran Kurowpɔn Mantɔw mu. Dza ɔdze gya no bae dze, bɛpem ndɛ, mpanyimfo mmfaa mmbɔtoo gua. Bɔhwɛɛadzefo kyerɛ a, gya no hyeew nkorɔfo hɔn fiadze nkorkor duenum (15). Iyi mu no, egyapadze a ɔsom bo yie na amamfo hweree a nna ɔyɛ awerɛhowsɛm.
Kwakwar 23, 2023 mu no, guadzibea gyahyehyew bi so sii wɔ Timber Markert a ɔno so wɔ Nkran. Ghana Odumgya Edwumayɛkuw no kyerɛ a, gya no hyɛɛ ase ewiaber dɔnkor na ɔsɔe sɔe hyeew nkorɔfo hɔn egyapadze ahorow a ɔkekae kɔr sidi ɔpepem na n’ekyir. Gyahyehyew no mu no, nkorɔfo hɔn ntaabow dan a wɔdze bi ayɛ fiadze na bea a wɔda no no mu aha ebiasa (300) na ɔhyewee a nna ɔnnyɛ asɛm kakraba.
Dza otwa tun a mebɛka ho asɛm yi yɛ dza osii Kumase Kegyetsia gua kɛse no mu no. Osii Ebɔw 15, 2023. Sen bi a nna ɔregye ehin wɔ sohyial midia prama ahorow do no, nna Kumase Kegyetsia gua fofor kɛse no rehyew ma gyaframee bi a ɔdze wusiw kumɔɔ nam agye gua no abɔ do a, nna amamfo nson gu gya mu a ɔnnyɛ asɛm kakraba. Bɛpem ndɛ, dza ɔdze gya no bae no dze, Odumgya Edwumayɛkuw no mmfaa mmbɔtoo gua. Megye dzi dɛ mber pa mu no, wɔdze bɔto gua ma amamfo ada hɔnho do.
Guadzibea gyahyehyew a esi wɔ Ghanaman yi mu no dɔɔ so. Dza makasa afa ho yi yɛ no mu enum pɛr. Asɛmbisa nye dɛ, aso ebɛnadze na otwar dɛ aban no na ankorankor yɛ dze siw atoyerɛnkyɛm a ɔtse dɛm yi ano ma adzetɔnfo na guadzifo nya hɔn ahotɔ? Kyerɛ w’adwen wɔ hɛn sohyial midia prama ahorow no do.
