Nokwasɛm dɛ, “Afe bi yɛ esan” a mpanyimfo ka no, wɔnnka no kwa. Merekɛpɛ biribi aba fie ebedzi so wɔ yi, mpanyimfo kor yi ara ka dɛ, ɔnye mebɛyɛɛ dɛn na wɔnam. Nyimpa papa so nnkyɛr wiadze ampa. Nyimpa bɛyɛɛ bi naaso ɔammbɛyɛ ne nyinara. Nyimpa ammbɛkyer bo. Afei so, owu da amansuon nkɔn mu. Nna aso. Obi bebisa siantsir a mugu do rubu mbɛ akɛse yi. Nnyɛ emi bi a; ehum kɛse bi na etu ntsi a. Ehum bɛn na etu ma asaase nnya ahotɔ yi? Ehum bɛn na etu ma wimu nnoma nnya beebi nntu faa bio yi? Ehum bɛn? Ehum bɛn na etu ma adan akɛse na nkakramba nyinara asaase tum dze ne nsa si no bo bue n’anomu men sɛɛ no mu egyapadze yi? Mebɛka ekesi dɛn? Ne nyinara wɔ Ɔdomakoma noara ne nsɛm. Ɔno na Ɔdze ma na Ɔgye a obi nnkotum nnye no edzi esi no. Ɔno nye no.
Dwowda Kwakwar 6, 2023 mu no, Ghana na wiadze n’afɛndzeanan nyinara anntse asɛm pa. Asɛm bɛn? Asaasewosow bi sii wɔ Turkey n’anaafo kurow a wɔfrɛ no Antalya. Nnyɛ Turkey nko na asaasewosow yi sii. Syria so dɛmara. Asaasewosow no sii no, egyapadze na nyimpa a wɔahwer hɔn nkwa no yɛ asefem. Nkaabɔ kyerɛ a, Kwakwar 18 mu no, nyimpa a woefi mu wɔ Syria na Turkey ɔnam asaasewosow no ntsi no, hɔn dodow yɛ mpem eduanan ebiasa na no mboree (43,000+). Ɔyɛ atoyerɛnkyem a n’ano yɛ dzen yie.
Asaasewosow no sii no, nna Ghanafo enyi dzi ekyir. Ebɛnadze ntsi? Ghana bɔɔlbɔnyi a ɔwɔ akoma pa a no mbɔdzembɔ so sɔ enyi yie a wɔfrɛ no Christiana Atsu Twasam a nna osi n’akan ma Hatayspor a ɔwɔ kurow a asaasewosow no sii no ntsi a. Asɛm no sii Kwakwar 6 no, odumgya edwumayɛfo, atoyerɛnkyem edwumayɛfo na bambɔ edwumayɛfo bɔɔ mbɔdzen hwehwɛɛ nkorɔfo a wɔhyehyɛ asaase no ase no dɛ wobotum agye binom a Christian Atsu ka ho yi nkwa a. Wɔyɛɛ hɔn afamu dze dze gyee dodowara nkwa na dodowara so fii mu. Nna bɔɔlbɔ wiadze no enyi da kwan dɛ kyerɛ kyerɛ anwanwasɛm bi besi ma bɔɔlbɔnyi Christian Atsu epue efi asaase no mu a. Memenda Kwakwar 18, 2023 anapa ndɔnnsia pɛpɛɛpɛr na nkaabɔ bɛkaa nsa dɛ asaase akyer Christian Atsu Twasam amen no.
Nnyɛ bɔɔlbɔnyi Christian Atsu Twasam nko na asaase akyer no amen; Ghana adaduafo, okunafo, onnyibifo, ngyanka na mbɔbɔrwaafo nyinara hɔn egya na asaase akyer no no. Christian Atsu Twasam yɛ obi a nna onndzi nyimpa a wɔtse dɛm yi ho agor. Ebɛtse no, na ɔnenam reyɛ adɔyɛ. Ebɛtse bio no so, na oeyi adaduafo efi fiadze. Nna Christian Atsu Twasam wɔ adɔyɛ kuw a wɔfrɛ no ‘Arms around the child.org’ a ɔdze mu sika boa mbofra kwan biara a obotum no do. Yɛnhwɛ mber enum a Christian Atsu Twasam boaa adasa ber a nna ɔtse ase no.
1. Christian Atsu yii Mama Theresa a nna oedzi mfe eduesia ebien (62) fii fiadze ber a nna atsɛmbuafo ahyɛ dɛ ɔnda fiadze mfe du no. Mama Theresa no bɔn nye dɛ nna ɔtɔn ‘wee’.
2. Afe 2018 mu no, Christian Atsu Twasam yii adaduafo du fii fiadze. Otuaa hɔn asɛndzibea kaw maa hɔn ber a wokowiaa edziban no.
3. Christian Atsu Twasam yii adaduafo eduanan (40) fii fiadze. Owiei no, ɔdze too aban enyim dɛ ɔmfa hɔn a wɔyɛ ewi nketsenketse hɔn mfom nkyɛ hɔn.
4. Sika na akyɛdze ahorow a ɔdze maa skuul ahorow wɔ Finimfin Mantɔw mu. Afe 2017 mu no, Christian Atsu bɔɔ mbɔdzen kɛyɛɛ skuul ahorow a ɔwɔ Finimfin Mantɔw mu adɔyɛ. Ɔkyɛɛ hɔn sika, mbuukuu na akyɛdze ahorow.
5. Afe 2021 mu no, Christian Atsu Twasam kyɛɛ bɔɔlbɔ mpabowa na ho akadze ahorow maa Cheetah FC a ɔwɔ Kasoa. Osii akan maa hɔn ber a nna ɔrehyɛ no bɔɔlbɔ akwantu no ase no.
Iyi na dodow a ɔka ho no na Christian Atsu Twasam a oenya ne beebi kɔ no yɛe dze boae. Seseiara a oenya ne beebi kɔ yi, adaduafo, ekunafo, ngyanka, onnyibifo na mbɔbɔrwaafo hɔn egya nye woana bio? Nyame mfa Christian Atsu ne kra nsie yie. N’ebusuafo na Ghanafo nyinara nhyɛ dzen. 🕊️
