Nhyiren a ahan fɛɛfɛw
Wɔ anapa bɔw mu
Ebɛnadze nye w’ sɛ fɛw;
Wo ma komatɔmu,
Nyimpa nyina kamfo wo;
Dɛm na ababaawa a,
Ahomka mu oegyina do
Wɔ n’abedziekyir m’ tse ampa.
Aber a mfofo ato kwaa
Na wɔapaa nhyiren fɛɛfɛw,
Ɔno ahomka nko ampa,
Ɔnye ahosɛpɛw
Ababaawa a ɔaba do so
Mbrɛ ɔtse ara nye n’
Ntsi hom mma enyigye ndze do
Nwosow ndwon dzendzenndzen.
Ndɛ yɛ ahomka da ampa,
Dɛ wɔahyɛ wo enyimnyam dɛm,
Na mbom adwendwen da so a;
Anndwendwen yie a, edzi dzɛm.
Kwan a esi mu yi yɛ tor,
Atɛkyɛ na amona pii
Wɔ mu a wɔmmfa nndzi agor.
Ntsi hwɛ yie ama eesi pi.
Ababaawa, hwɛ yie o!
Annhwɛ yie a ibedzi ɔkogu o!
Ababaawa, hwɛ yie o!
Ɔkogu so dabaa ɔyɛ mbusu o!
Ababaawa, hwɛ yie o!
Annhwɛ yie daa a, w’ahoɔfɛw bɛpa,
W’ahomka botu, w’enyimnyam bɛsa,
Wo serew bɛdan nyinsuwa wenwen,
Wo bra bɛdan awerɛhow nkodzen;
Ababaawa, hwɛ yie, na eewie yie.
