Mfantseman mu no, sɛ yɛka mbɛn ho asɛm a nna yɛkyerɛ mbɛntsia na mbɛn dodow a wɔka mbɛnsuonkuw no ho. Mbɛntsia na mbɛnsuon nye mbɛn a mpanyin nyim a ofir tsetse. Mpɛn pii no, nyimpa dodowara dwen dɛ Abɛntsia na Mbɛnsuon yɛ adze kor, nokwar nye dɛ, Abɛntsia na Mbɛnsuon nsaa.
Mbɛn ahorow Esuon na wɔbɔ mu yɛ ayer a wɔfrɛ no Mbɛnsuon. Mbɛn Esuon no mu kor biara yɛ abɛntsia a wɔdze son n’ambɛn ayɛ. Mbɛnsuon bi wɔ hɔ a wɔahyɛ nsa ara atsew. Mbɛn Esuon no nyina gu fakor aber nyina na ber so dɛ wɔhɛna nna wokeyi. Bi so wɔ hɔ a wɔnntɔɔ no ho mbɛn no nnguu fakor na mbom mbɛntsia a ɔwɔ ɔdabɔ no do no na wɔfrɛfrɛ hɔn mu bi boa ano na wɔkyerɛ hɔn mbɛnsuon ahɛn na no ho ndwom.
Yedzi kan aka dɛ mbɛntsia Esuon na wɔbɔ mu yɛ kuw. Mbɛnno mu dza wɔdze tu ndwom no wɔfrɛ no Ɔserɛmbɛn. Mbɛnsuon no hɔn akɛse nnyɛ pɛr. Kɛse papa kor wɔ mu na kakraba so wɔ mu. Nkaa no so nngyina tsipɛn kor do; kɛse papa no ekyir dze wɔ hɔ, no so n’ekyir dze wɔ hɔ dɛmara kesi ketseketse no do.
Sɛ Mbɛnsuon rehɛn a, ndwom a wɔdze bɔ no na ɔkyerɛ asɛm kor a esi. Tsetse mber mu no, sɛ ɔhen fi sa reba fie konyimdzi mu a, mbɛnsuonfo no tow ndwom yi wɔ hɔn mbɛn no do dze hyia no dze no ba fie. Ndwom no mu bi na ɔtoa do yi;
Musu da bi,
Munnsu ndɛ o!
Mako ako.
Musu da bi,
Munnsu ndɛ!
Ndwom yi n’ase nye dɛ, ɔhen no reka dɛ, sɛ kaansa oedzi konyim ndɛ mpo a, no konyim no nnyɛ no dɛw; ndɛ dze oenya esuo mu esi yie. Ɔrodwen dza obesi ɔkyena, ber a nna ɔnnyɛɛ krado. Sɛ idzi Ɔhen bi do konyim a, obotum akɔhwehwɛ mboa efi beebi abɔtoa wo dze ahwehwɛ no konyim.
Sɛ Ɔhen no wɔ guabɔ ase ma mbɛnsuon no rogor ma no a, ndwom no kyerɛ. Mpoatwa beberee wɔ guabɔ ase nsti ndwom a mbɛnsuon bɔ no so wowɔ amfo. Ndwom yi mu bi nye;
Ɔkormansa e enya me ayɛ!
Ɔkormansa e enya me ayɛ!
Enya me ayɛ wo na e,
Enya me ayɛ w’egya e,
Iyi hɛnara hɛn dze a!
Bio so nye;
Nwansema a ɔnye me tse,
Ɔreka mo kur mu.
Ɔtsɛn, monndɔ wo na.
Nwansema a ɔnye me tse,
Ɔreka mo kur mu!