Afe biara nyimpa mpempem na wowu wɔ lɔre akwanhyia mu. Ghana man mu ha no, ndzɛmba a ɔtaa dze lɔre akwanhyia ba nye mbirikatu mbordo, ahɛnka basabasa, akwan a ɔnnyɛ papa na afei so mbrɛ wimu nyɛbea tse. Dza ɔdze lɔre akwanhyia ba bi so nye nsanom, suban bɔn a ɔwɔ ahɛnkafo binom afa na ntsetsee a wonnyi wɔ ahɛnka ho. Osuahun ada no edzi dɛ, sɛ wobu lɔre akwanhyia a osisi mu ɔha a, no mu eduonum esuon gyina nyimpa mfomdo do, no mu ebien gyina lɔre mfir do na no mu anan na ogyina wimu nyɛbea do. Binom mpo wɔ hɔ a, kwan a wodua do pa ahɛn ho no nnyɛ koraa. Sɛ ohu n’enyim o, onnhu o, nna ɔrepa ho.
Nkorɔfo pii tsetse ahɛn mu reka a, wonnyi tum krataa anaa leasens a wɔdze ka hɛn. Dɛm nkorɔfo yi ho yɛ hu wɔ kwan do papaapa. Hɔn na wɔdze akwanhyia no no dodow ba. Wonnyi nyimdzee biara wɔ hɛnka ho. Akwankyrɛdze ahorow a osisi kwan nkyɛn no, wonnyim n’adzeban. Sɛ ihu dɛ wɔaka lɔre kwan no finimfin na wɔmmpaapaa mu a, ɔkyerɛ dɛ onnyi dɛ epa hɛn ho wɔ hɔ. Dɛm nkorɔfo a wonnyi laesens yi tum pa hɛn ho wɔ bea a ɔtse dɛm osiandɛ wɔnntse dɛm ndzeyɛɛ yi ase.
Lɔre na kaar ahorow a wɔdze nam akwan do no ara so bi ka ho na akwanhyia ahorow yi ba. Binom asɛɛsɛɛ koraa, no ho ndzɛmba pii so nnyɛ edwuma. Dza ɔboa ma kaar tum gyina no, ɔyɛ a na binom dze nnyɛ edwuma. Ɔba no dɛm na sɛ mbusu bi wɔ enyim a, wonntum nngyina nnyi hɔnho mmfi mu. Ɔtɔfabi a, ibehyia hɛn bi anafua dɛ ɔdze kandzea Kortsee nam. Ɔba no dɛm a, hɛn bi a orihyia no dwen dɛ ɔyɛ kutukutu anaa dadzepɔnkɔ . Iyi tum dze akanhyia ba.
Ndzɛmba a wɔhyehyɛ no mbordo wɔ lɔre na ahɛn mu so ka ho na akwanhyia ba. Ɔwɔ dɛ aporisifo hwɛ siw dɛm adze yi ano, osiandɛ ɔdze akwanhyia ahorow ba. Ɔtɔfabi a, wɔbɔhwɛ na ahɛnkafo binom anom nsa dze reka hɛn. Afe 2009 mu no, yɛtsee dɛ obi dze ne hɛn akɛpem Ɔmanpanyin ne hɛn. Wɔhwɛɛ no nna onyia no abow nsa .
Hɛn akwantsempɔn a ahɛn no nam do no so ka ho bi na akwanhyia ahorow yi ba. Kwan no bi nnyɛ koraa na bi so no do etutu. Bi so wɔ hɔ a no do akwankyerɛdze ahorow no apepa.
Ndzɛmba pii a ɔkeka iyi ho na ɔdze lɔre akwanhyia ba na dza oye wɔ ho nye dɛ , yebotum esiw ano. Yebotum afa akwan ahorow do esiw dɛm akwanhyia yi ano. Dza odzi kan nye dɛ ahɛnkafo benya ntsetsee wɔ mbirikatu mbordo ho. Bio, ɔwɔ dɛ wɔkyerɛ hɔn kwan pa a wɔbɛfa do apa hɛn ho, na wɔbɛyɛ ahwɛyie wɔ kwan do so. Hɔn a wonnyi laesens, na wɔka hɛn no , ɔwɔ dɛ wɔkyer hɔn kɔ asɛndzii, na wɔnye hɔn dzi no dɛ mbrɛ mbra se.
Aporisifo a wɔhwɛ ahɛnka edwuma do no wɔ dwumason dzi. Ɔwɔ dɛ wobue hɔn enyi pɛnn na wɔkyekyer ahɛnkafo a, wɔka hɛn basabasa wɔ hɛn kwan do nyinara. Ɔwɔ dɛ wodua dawurbɔ mfir, kasa efir na tɛlɛbihyɛn do aber biara so ma ahɛnkafo nkyerɛkyerɛ. Ɔwɔ dɛ hɛn nyinara yɛyɛ hɛn afamu dze ma akwanhyia yi do twa.
