Nam nye edziban tsitsir a Ghanafo nya ahoɔdzen fi mu. Nam yɛ edziban a edzibandur a wɔfrɛ no proten ahyɛ mu ma no dɛm ntsi oye dɛ nyimpa biara bedzi bi dze enya ahoɔdzen. Nam ahorow pii na sɛ eko mpoano ihu. Bi nye nkwaamokyi, salmɔn, iban, na pii a ɔkeka ho. Ɔtɔfa bi a, nam ba mpoano araa ma apofo tum san tow bi gu po mu. Sɛ ɔkyer do paa do a, dza wɔyɛ nye dɛ wɔdze bɛhyɛ frigye mu, wɔbɔhow, wɔbɛhyɛ no nkyen anaa dɛ wɔbɛhata. Iyinom nye kwan a afarfo na namtɔnfo fa do kora nam ho ma ɔnnsɛɛ. Dɛm akwan horow yi na yɛfa do kora nam ma otum dzi nda, bosoom na afe a kyema biara mmba ho. Dɛn akwan yi no ho nkyerɛkyerɛmu na odzidzi do yi.
Kwan kor a odzi kan a yebotum afa do akora nam a ɔnnsɛɛ nye dɛ yɛbɔhow. Wɔtaa frɛ dɛm nam a wɔahow no “namhowee”. Iyi yɛ dzin a nam no nya ɔnam kwan a wɔfa do kora no mbom nam noara wɔ ne dzin pɔtsee. Mbasiafo na wɔtaa how nam papaapa. Kwan a mbasiafo fa do how nam nye dɛ wɔdze ndua anaa dadzewa a wɔawen gu kuku do na wɔdze gya gu ase how wɔ do. Ndɛ dze, wɔfrɛ biribi “Chorkor Smoker” a ɔyɛ abaefor kwan a wɔdze how nam. Ɔtse dɛ dza mbasiafo no dze how nam no ara pɛ mbom soronko kakra wɔ mu. Wɔfrɛ no “Chorkor Smoker” osiandɛ Nkran brɔn a wɔfrɛ hɔ Chorkor na wɔhyɛɛ ase dze dzii dwuma wɔ. Wɔkyerɛ dɛ mbrɛ woesi ayɛ Chorkor Smoker no boa hɔn ma wotum how nam pii wɔ do wɔ mber tsiaba bi mu. Boi, ɔsan so boa ma nam no kyen yie ma ɔkyɛr sie.
Kwan a ɔtɔ do bio a yetum fa do kora nam ho odzi nda pii a ɔnnsɛɛ nye dɛ wɔbɛhyɛ no nkyen. Nam a wɔhyɛ no nkyen tum kyɛr a kyema biara mmba ho. Ɔyɛ nam a nkorɔfo taa tɔ papaapa osiandɛ sɛ ereyɛ edziban na edze bi bɔ ase anaa edze bi to mu a, ɔma ɔyɛ dɛw yie. Binom frɛ no mɔmɔɛn anaa ɔhyee. Ɔnam dɛ wɔdze nkyen gu ho si hɔ dze bɔ ho ban ntsi, ɔma ibɔtɔ no na ɔyɛ nkyen ara yie. Wotum hyɛ nam ahorow pii nkyen mbom nnyɛ nam nyinara na wotum hyɛ no nkyen.
Yetum so hata nam dze kora a ɔnnsɛɛ. Nam pii a wɔtɔn wɔ guamu no ne faa ara yɛ dza wɔahata. Wotum frɛ bi tatahwe, saasaa kwesi, kako, koobi na dza ɔkeka ho. Kwan a wɔfa do yɛ nye dɛ wɔdze nam no bogu apa do wɔ ewia mu nda kakra ma no mu nsu no nyinara atwe. Sɛ iyɛ no dɛm ma no mu nsu no twe a, otum mpo dzi afe na no mboree a ɔnnyɛ hwee anaa nka biara mmba mu.
Kwan a otwa tun wɔ akyerɛw yi mu a yetum fa do kora nam nye dɛ yɛdze bɛhyɛ frigye mu. Iyi yɛ kwan yɛdze kora nam no mu kor naaso onntum nnkyɛr tse dɛ wɔbɛhyɛ no nkyen, wɔbɛhata anaa dɛ wɔbɔhow. Siantsir nye dɛ sɛ enyinamkandzea tsew kɔ a, nam no tum sɛɛ ntsɛmtsɛm.
Ɔnam dɛ namtɔn yɛ edwuma tsitsiriw ma mbasiafo na nam no nnsa dabiara ntsi, dɛm akwan horow yi boa hɔn ma wɔkora hɔn nam a wɔdze kɔ gua do a ɔnnsa no amma annsɛɛ annyɛ hɔn kwaw.
