Tsie dɛm asɛm yi:
Ghana na Athletic Bilbao bɔɔlbɔnyi Iñaki Williams na n’ekyir ba Nico Williams a ɔno so yɛ Spain na Athletic Bilbao bɔɔlbɔnyi hɔn agordzi repɛ nhwɛ.
Akansi a hɔn bɔɔlbɔ kuw Athletic Bilbao nye Almeria sii no Fankwa 30, 22 ber a nna abɔ ewimber ndɔnsuon wɔ Spainfo hɔn bɔɔlbɔ baatan La Liga mu no kɔr do wɔ San Mamés Agoprama do wɔ Bilbao, Spain aborɔkyir man mu. Akansi no kɔr n’ewiei no, konyim kɔr maa Iñaki Williams na no nua Nico Williams ber a hɔn bɔɔlbɔ kuw no toow atsena anan a Almeriafo enntum anntsew mu kor mpo.
Sema du na Nico Williams toow bɔɔl no wɔ Almeriafo hɔn nyimfa afamu maa Iñaki ma ɔdze ne tsir pemee toow Athletic Bilbao hɔn atsena a odzi kan. Sema esuon ekyir na bɔɔlbɔnyi Sancet dze kor pee Almeriafo do. Wosii akan no sema eduonu no, Iñaki Williams sanee toow atsena a ɔtɔ do ebiasa maa Athletic Bilbao naaso ber no, santsenhwɛdonyi maa rɛfiri no kɔhwɛɛ ne VAR tɛlɛbihyen no ma wobuae dɛ nna Iñaki Williams da mu ansaana ɔrotow atsena no ntsi atsena no enntum enngyina.
Sema eduosia ebien ntamu na Iñaki Williams boaa no nua Nico Williams ma ɔno so toow n’atsena. Aberantsɛ Vesga naam atoprɛko do toow Athletic Bilbao hɔn atsena a ɔtɔ do anan. Iñaki na Nico Williams nyinara sii akan no kɔr n’ewiei.
Iñaki Williams n’akansi a osii tsiaa Almeria no tɔwbɔ na ɔwɔ ase ha yi:
• Mber dodow a osii akan – eduokron [90]
• Mpɛn dodow a ne nan kaa bɔɔl – eduasa akron [39]
• Otumii bɔɔ bɔɔl no eduonu enum na no mu eduonu na otumii kɔr ne nyɛnko hɔ [20/25]
• Mpɛn dodow a ɔbɔɔ bɔɔl no maa ne nyɛnko a nna ɔyɛ hu – 2
• Ohyiaa bɔɔl no wɔ wimu kortsee na otumii pemee
• Atsena akwanya – kor [1]
• Atsena – kor [1]
• Atsena mboae – kor [1]
Afe yi Spain bɔɔlbɔ baatan La Liga mu no, Iñaki Williams atow atsena ebiasa asan aboa atsenatow kor. Nico Williams so atow atsena ebiasa asan aboa atsenatow ebien. Athletic Bilbaofo esi akan esuon a wokitsa mba eduosia. Wɔtɔ do anan wɔ pon no do.
Fankwa 23, 2022 na Iñaki Williams sii n’akan a odzi kan dze maa ɔman Ghana a otumii sii akan no eduanan enum ber a Brazil hyɛɛ Ghana kaw ebiasa a Ghana enntum anntsew mu kor mpo. N’adzekyee Fankwa 24, 2022 na Nico Williams so sii n’akan a odzi kan maa Spain man no ber a Spain hyɛɛ Portugal kaw kortsee a woenntum anntsew.
Iñaki na Nico Williams hɔn awofo a wɔyɛ Ghanafo enyi da kwan dɛ hɔn mba beenu yi benya akwanya esi wiadze bɔɔlbɔ akan kɛse a ɔbɔkɔ do wɔ ɔman Qatar mu Ɔberɛfɛw bosoom no dze kesi Mumu bosoom no wɔ afe 2022 mu no ama hɔn man ebien a wɔdɔm no.
