Nkran, Ghanaman no no kurowpɔn yɛ kurow bi a nsu yir men no afe biara. Atoyerɛnkyɛm yi abɛyɛ nnyɛ Nkran Kurowpɔn no nko ne haw; Ghanaman no nyinara na otwar dɛ aban san yɛ biribi fa ho bio. Ber yi, nnyɛ kasa tsentsen nko na mbom nhyehyɛɛ mapa a obotum esiw ɔhaw no ano ankasa. Atoyerɛnkyɛm yi agye nsamu kɛpem dɛ, kye dɛ nsu ammpetse na Nkran Kurowpɔn no ne fa bi dze, adan bosoom po ma mu nyimpa na egyapadze ahorow adan po mu abɔdze ahorow no so.
Mfe dodow nye yi a nsu kɔ do ara yir Nkran Kurowpɔn no eso ɔreyɛ ayɛ dɛ afe fofor biara no, dza osi no kyɛn afe a abɛsen kɔ dze no. Nsuyirii a ano yɛ dzen bu fa kurow no no nsuka akɛse na nkakramba nyinara mu ma ba kaar akwan mu nyinara wurawura nkorɔfo hɔn fiadze na efiefi mu sɛɛ hɔn ndzɛmba kuku nyimpa so.
Amamfo kɔ do ara bɔ atseetsee a dɛm ɔhaw a afe biara wɔkɔ mu no ho dawur kyerɛ eso nyiano mapa biara mmpuei mu. Nsu a nkyɛ ɔtɔ ma nyimpa tum da ma noho baabaa no no, hɔn dze abɛdan kɛdɛannda ama hɔn afe biara. Dza otwa nson mu no nye kaar akwan ahorow a nsu tum petse kɛkɛ yir araa piapia do ahɛn nyinara kogu esutsen ahorow mu no.
Nkran Kurowpɔn nsuyirii yi a afe biara oyir kurow no yɛ adze a ɔkyerɛ dɛ otwar dɛ aban no na no mu mpanyimfo tum dze hɔn anan sisi famu hwɛ ma ohaw yi ase twa kyɛn dɛ afe biara aban no bɔsoma asoɛe a wɔhwɛ atoyerɛnkyɛm ho nsɛnsɛm do no nko. Nsuka ahorow a ɔnndɔɔ so, adan a amamfo si no wɔ nsu akwan mu, nwura a amamfo tutu gu nsuka mu na dza ɔkeka ho yɛ ndzeyɛɛ ahorow a ɔdze dɛm atoyerɛnkyɛm yi ba. Ɔnam dɛ Nkran yɛ kurowpɔn no ntsi, nkorɔfo tutu fi Ghana ne mbeambea ahorow kɔ hɔ kɔbɔ hɔn asese. Sɛ wɔkɔ dɛm a, kurow no bɔ pee do ma nkorɔfo sisi hɔn adan basabasa osiandɛ nyimpa pɛ beebi ada ntsi. Iyi tsitsir na ɔdze nsuyirii a afe biara ɔmen kurow no ba no.
Otwar dɛ aban no na ndwumakuw ahorow a wɔnnhyɛ aban ase ma hɔn enyi ku akwan ahorow a wobotum afa do esiw ɔhaw yi ano ho. Dɛm akwan no bi nye dɛ wɔbɔhwɛ ebubu adan na egyapadze ahorow a osisi nsu akwan mu no ama nsu tɔ a eenya kwan afa no kwan mu akɔ bea a otwar dɛ ɔkɔ. Otwar dɛ aban no sisi nsuka akɛse toto mbeambea pii a nsu botum afa mu asomdwee mu ekogu bea a otwar dɛ ɔkɔ kogu. Amambɔefo a hɔn dze, wɔayɛ hɔn adwen dɛ hɔn nwura dze, kaar akwan mu na bea a ɔnnsɛ nko na wobotu egu no, aban nsa suo hɔn mu a, otwar dɛ ɔdze hɔn fa mbra kwan do. Otwar dɛ aban no bɔ dawur fa adan apapa ne nsii ho na nsunsuando bɔn a sɛ obi ennsi dan wɔ asaase a ɔsɛ do a ɔdze ba no ho. Ber edu dɛ aban dze dɛm nhyehyɛɛ ahorow yi gu akwan mu yɛ biribi kyɛn dɛ ɔbɛka ho asɛm nko osiandɛ mpanyimfo se, “Kasa tsentsen nntɔ pɔnkɔ”.
Dɛ mbrɛ Nkran Kurowpɔn no kɔ do ara hu amamdze wɔ nsuyirii ho no, ohia papaapa dɛ mansin mpanyimfo na hɔn a wɔka bi a ɔwɔ mu ka bɔ mu ko tsia afrenhyia atoyerɛnkyɛm yi. Mber aso dɛ Nkran Kurowpɔn soɛr osiandɛ mpanyimfo se, “Sɛ itwa abowatsena ne tsir a, dza aka no yɛ ahoma nko”. Nkran Kurowpɔn a a ɔyɛ Ghanaman no no kurowpɔn no yir sɛɛ afe biara a, ɔman no n’enyidado nye dɛn?
