Ghana Sikakorabea Baatan asesa ¢1 sika bobaa no mu. Asoɛe no kyerɛ mu a, ɔdze bambɔ su ahorow bi aka sika fofor no ho a ɔma ɔyɛ soronko koraa. Dwowda Mumu 12, 2022 na asoɛe no kyerɛ a, sika fofor no ne ndzii bɔkɔ do.
Nkyerɛkyerɛmu ahorow a wɔdze kaa ho no nye dɛ, sika fofor no tse dɛ ¢1 sika bobaa dadaw no ara na mbom ber yi, n’ahosu tse dɛ ¢2 sika bobaa a yɛwɔ no pɛpɛɛpɛr. Mfonyin ahorow, nsɛnkyerɛdze ahorow na ndzɛmba ahorow a wɔwɔ ¢1 sika bobaa dadaw no do no, ibohu bi wɔ fofor no do pɛpɛɛpɛr. Ghana hɛn asɛnkyerɛdze baatan no wɔ sika no enyim na pɛrpɛryɛ atsɛmbu asɛnkyerɛdze no so wɔ n’ekyir a ɔmma sika no nnyɛ adze fofor pii.
Sika fofor yi yɛ sika a okitsa ndaadze ebien; ne nkyɛnnkyɛn no yɛ sika kɔkɔɔ na no mu no so yɛ dwetɛ. Pɛrpɛryɛ atsɛmbu asɛnkyerɛdze no n’ase no, ibohu afanatsen bi a no do yɛ twitwiritwitwiri. Ehuntsamfonyin bi da sika fofor no mu a ɔsesa no ho na mbom ogyina mbrɛ ibesi bɛdandan no ma nsesa ahorow yi wo nsa aaka. Otum sesa kɔ nworaba na otum so sesa kɔ ¢1 asɛnkyerɛdze no ber a akyea no no.
¢1 dadaw no bɔkɔ do araa awɔ ɔman no mu na yebedzi ɔno na fofor no nyinara afora kɛpem ber a dadaw no ase botu anaa ɔbɛyew korakoraa.
Ghana Sikakorabea Baatan no serɛ Ghanafo dɛ wɔbɛgye sika bobaa fofor yi ato mu na woeedzi tse dɛ mbrɛ sika nkaa no tse no pɛpɛɛpɛr.
