Nkaabɔ a “Chambers of Minesfo” dze abɔbɔ adze no kyerɛ dɛ Ghana ehuruw edzi ɔman South Africa kan wɔ sika kɔkɔɔ no dodow mu. Wɔdze nkaabɔ yi bɔbɔɔ adze Obiradzi, 2023 mu. Nkaabɔ no kyerɛ a, ɔman no ne sika kɔkɔɔ no huruwii fii sika kɔkɔɔ nkaneedze ɔpepem ebien, ekyirpɔw awɔtwe (2.8M ounces) wɔ afe 2021 mu dze kesi sika kɔkɔɔ nkaneedze ɔpepem ebiasa, ekyirpɔw esuon (3.7M ounces). Dza ɔdze dɛm mpontu yi aba ɔman ne sika kɔkɔɔ guadzi no mu no nye sika kɔkɔɔ edwumakuw a aban ama hɔn ho kwan ma wotu sika no na hɔn a wɔyɛ Galamse no nyinara. Nkyɛ asɛm yi yɛ asɛm pa, eso asɛmbisa amamfo ribisa nye dɛ, “Aso dɛm sika beberee nyinara no, ɔwɔ hen na ɔman no no mu ayɛ dzen dɛm yi?”
Mbrɛ sika kɔkɔɔ no ntui agye dzin no, nkyɛ obiara rohwehwɛ dɛ ɔman ne sikasɛm ntotoe no bɔkɔ sor ma ndzɛmba bo aba famu ma asomdwee na dɛw ahyɛ obiara afon mu ma. Sɛ ehwɛ mbrɛ mpontu aba hɛn sika kɔkɔɔ edwuma no mu no na ahokyer a aba ɔman no do no a, annhwɛ a ɔrennkyɛr, obiara nnyi hɔ a ɔdze ne kapɛr kor mpo bɛkyɛ.
Ehwɛ fangoo nsɛnsɛm a, ɔnnkyɛr biara na aban no atoto mu ma ndzɛmba nyinara bo akɔ sor. Afe kortsee mu no, aban tum tow fangoo bo mu mpɛn du. Ɔba no dɛm a, ɔdze ahokyer na ɔdze ba ɔman no mu kɛpem dɛ, biribiara a adzetɔnfo tɔn no, wɔdze fow kaar na wɔbɔtɔn. Nkyɛ fangoo no bo rokɔ sor no, hɛn sika kɔkɔɔ yi a abɛgye abɔ do no botum etwitwa agye hɛn. Eso wɔyɛ no dɛn?
Ɔnam siantsir ahorow binom do ntsi na yɛnntse hɛn sika kɔkɔɔ yi nka wɔ hɛn sikasɛm ntotoe no mu no. Dza odzi kan nye dɛ, sika dodow a ɔman no tu no, wɔmmfora mu nnyɛ no hwee nna wɔdze etu kwan kɔ aborɔkyir. Siantsir a ɔba no dɛm no nye dɛ, ɔtɔ fa bi a, mfir ahorow a wɔdze dzi sika no ho edwuma ahorow no, bi nnyi hɛn man no mu. Sɛ ɔba no dɛm a, aborɔfo yinom naan sika no dze yɛ ndzɛmba ahorow a, mfaso kumaa bi na ɔman no ne nsa ka. Nkyii so, edwuma a nkyɛ ɔdze bɛba ber a wɔnaan no wɔ hɛn man mu no, ɔkɔ kopue aborɔkyir ma hɔn mbom hɔn nkorɔfo nya edwuma yɛ dze tu hɔn man no mpon.
Dza otsia ebien nye kwan bɔn a amambɔefo binom fa do wia hɛn sika a yetu no kɔ amanaman afofor do no. Binom wɔ hɔ a, hɔn dze, wɔayɛ hɔn adwen dɛ ewidze noa ara na wɔbɛyɛ. Sika ɔman no tu no, nkorɔfo a wɔtsetse dɛm no fa kwan bɔn do nye mpanyimfo hyehyɛ wie kɔ amanaman ahorow do kɔtɔn nya sika beberee. Dza otwa nson mu no nye aborɔfo a wɔdze hɔnho hyɛ ndzeyɛɛ bɔn a ɔtse dɛm mu no mu. Ɔba no dɛm a, ɔman no botu sika no pii dze, eso sika no kɔ nyimpa kumaa bi hɔn kotoku mu a ɔmmboa ɔman no.
Dza otwa tun no nye mfir na adze a Ghanaman no nnyi anaa onnyi no dodow no. Sika kɔkɔɔ edwuma no yɛ edwuma bi a ohia mfir akɛse na nkakramba nyinara bi. Dɛm mfir no bi nye kaar, enyinam ahoɔdzen na sikatu mfir ahorow. Ɔnam dɛ ɔman no nnyi mfir ahorow a ɔtsetse dɛm no bi no ntsi, ɔman no nntum nnya no ho nntu sika no yie mma sika mmba hɛn man yi mu. Wotu mpo a, wɔdze kɔ aborokyir kɛyɛ ho biribiara, na eyi bɛba ho no, nna aborɔfo yi esisi hɛn.
Ɔyɛ nokwar dɛ seseiara dze, Ghanaman no na odzi kan wɔ sika kɔkɔɔ no ntui mu dze, eso ber aso dɛ amamfo hu ho nsunsuando pa wɔ ɔman no ne sikasɛm ntotoe mu ama abrabɔ aayɛ mberɛw kakra ama amamfo nyinara. Nyame akyɛ hɛn adze, yɛannhwɛ no yie a, obefi hɛn nsa.
