Mber kakra ara nye yi, Ghanaman no ehu adze fofor bi: edutɔnfo a wonnkitsa edutɔn tum nkrataa eso wɔtɔn edur wɔ kaar a ɔkɔ kwan tsentsen mu. Nsunsuando bɔn a ndzeyɛɛ a ɔtse dɛm no botum dze aba no yɛ hu na otwar dɛ mefa akyerɛw yi do bɔ ho dawur ma odu aban n’asomu.
Edutɔnfo a wonnkitsa edutɔn tum nkrataa na wɔtɔn ndur wɔ kaar mu no abɛgye abɔ do wɔ Ghanaman ne mantɔw ahorow nyinara mu. Mpɛn pii no, dɛm nkorɔfo yinom tontɔn hɔn ndur wɔ kwankyɛn kwankyɛn kaar mu na wɔpɛ yar a oridzi amamfo nya ankasankasa na wɔdze anodɛw tontɔn ndur no ma hɔn ber a obi nnyim bea pɔkyee a wonya hɔn ndur no fi na asoɛe pɔkyee a ɔma hɔn tum nkrataa dɛ wɔmfa ntɔn ndur no. Sɛ efow kaar a, wɔhyɛ ase dɛ asɔfo dze wo hyɛ Ewuradze nsa wɔ mpaabɔ mu na wowie a wɔdze hɔn ndur no ntɔnee ahyehyɛ do. Sɛ wodu beebi na wohu dɛ wɔatontɔn hɔn ndur no kakra araa yie a, wosian pɛ kaar fofor fow san hɔn ekyir kɛhyɛ edwuma ase bio.
Nsunsuando bɔn ahorow na nkorɔfo a wɔtsetse dɛm no dze ba nkorɔfo hɔn apɔwmudzen do. Mpɛn pii no, ndur binom a wɔtontɔn no asɛɛsɛɛ anaa etwa mu, eso ɔnam dɛ edutɔfo no nnhyɛ da ara nnyim ho nyimdzee biara no ntsi, wɔtɔ fa anaa dze yɛ hɔnho edur a obotum dze ɔhaw abrɛ hɔn apɔwmudzen. Ɔtɔ fa bi so a, ɔnam dɛ hɔn a wɔtontɔn ndur no nnyɛ apɔwmudzen edwumayɛfo ntsi, wɔnnkyerɛ mbrɛ otwar dɛ edutɔfo no fa ndur no yie. Ɔba no dɛm a, otum haw hɔn apɔwmudzen.
Bio, hɔn a wɔtsetse dɛm no binom wɔ hɔ a hɔn ndur a wɔtontɔn no yɛ edwuma dze, eso dodowara botum dze ndubabɔn afora atɔn ama amamfo a obotum dze ɔhaw abrɛ hɔn apɔwmudzen. Obotum so aba dɛ, edutɔnfo no nnyɛ nyimpa apapa; wɔyɛ ewifo anaa amambɔefo binom a wotum nye hɛnkanyi no hyehyɛ gyegye nkorɔfo hɔnho ndzɛmba ber a woedu akwantsifi anaa nwura bi mu. Binom wɔ hɔ a hɔn kasaa mu no, wotutu ntafi gugu amamfo do basabasa a ɔnnkyɛrɛ apɔwmudzen pa. Binom mpo ma kaar no bɔ pee do a ɔmma nkorɔfo ho nntɔ hɔn wɔ kaar no mu.
Aso Asoɛe a Wɔhwɛ Apɔwmudzen ho Nsɛnsɛm do asodzi nye dɛn wɔ ɔhaw yi ho? Ebɛnadze na wɔreyɛ afa ho? Aso nkorɔfo bɔkɔ do ara atontɔn ndur ama nkorɔfo wɔ kaar mu ber a wonnyi tum nkrataa biara? Aso ebɛnadze na Ghana Mpanyimfo a Wɔhwɛ Kaar Nsɛnsɛm do reyɛ afa asɛm yi ho? Aso wɔdɛ itur pii yi hɔn aso nntse a, hɔn enyi so nnhu?
Nnyɛ hɔn a wɔka bi a ɔwɔ mu nko na wɔwɔ biribi yɛ fa ɔhaw yi ho. Onnyi dɛ amamfo sosɔw hɔn a wɔtontɔn ndur wɔ kaar mu no do. Otwar dɛ amamfo nya akokodur bisa hɔn tum nkrataa pɔkyee a wɔdze dzi dwuma a ɔtse dɛm no ne farbaa. Otwar dɛ amamfo gyaa dɛ wɔfofow kaar wɔ nkwankyɛn nkwankyɛn no na mbom wɔkɔ hɛngyinabea a aban no ama ho kwan no na wɔkɔfow hɔn ahɛn.
Edutɔnfo a wonnkitsa edutɔn tum nkrataa na wɔtɔn ndur wɔ kaar mu no yɛ ɔhaw bi a onnyi dɛ yɛma ho kwan wɔ hɛn man yi mu. Ɔhaw a ɔdze nam no dɔɔ so ntsi onnyi dɛ yɛma ho kwan korakoraa. Ber aso dɛ ɔman no fa ndzɛmba binom enyiber do siw ano wɔ hɛn man yi mu. Kaar mu nnyɛ edutɔnbea.
