Ayɛwoho bosoom no ne da odzi kan wɔ afe yi ara mu na ɔbɔtɔɔ gua dɛ Ghana Mampanyin, Nana Akufo Addo dze ato Ɔsoɛfo a ɔhwɛ sikasɛm do, Ken Ofori-Atta, enyim dɛ ɔnto nsa Edwumakuw a wɔhwɛ amanaman sikasɛm ntotoe do (IMF) no, na ɔnhyɛ ase nye hɔn ndwendwen kwan wobotum aboa ɔman yi eyi hɛn efi kaw kukuankoma a ɔremen hɛn no mu. Onyimnyamfo Ken Ofori-Atta yɛɛ no dɛm ma IMF ananmusifo aba ɔman yi wɔ Fankwa 26, 2022 mu a iyi nye ne mpɛn ebien do edwumakuw no anansifo aba ɔman yi mu wɔ abosoom ebien ntamu a ne nyinara gyina kwan wɔbɛfa do aboa aban no ma oegyina ne nsikasɛm a orihim no do.
Ɔnam iyi do na Onyimnyamfo Ken Ofori-Atta, Ɔsoɛfo a ɔhwɛ Sikasɛm do, dze ato gua dɛ aban no wɔ enyisun dɛ afe yi nkogu no na wɔnye IMF edwumakuw no enya ntseasee na nhyehyɛɛ afa mboa wobenya no kuw no hɔ wɔ sikasɛm afamu no ho. – https://fb.watch/fQSbGmukp-/ Ɔdze asɛm yi too gua Wukuda, Fankwa 28, 2022, ber a Asoɛe a ɔhwɛ Amandzɛɛbɔ do na Asoɛe a ɔhwɛ Sikasɛm do to nkwanta, na wɔnye dawurbɔ ndwumakuw dzi ehyia no. Wɔayɛ no dɛ abosoom ebien biara ntamu no, wobedzi dɛm dwuma yi ma wɔnam do aada mbrɛ sikasɛm ho nhyehyɛɛ rokɔ edzi ma amamfo eehu.
Ɔdze asɛm yi too gua no, ɔmaa ahomka kakraa yɛɛ adwen mu konsee osiandɛ ɔman bi etum nye IMF sikafotow no enya nhyehyɛɛ ntsɛm no, nna abosoom esuon ekyir asɛm a. Nna tserɛ, dɛm nhyehyɛɛ yi bedzi mu mpo a, yebowura afe 2023 mu ana. Ɔnam do ma nsɛnkyerɛwfo a wokopuee nhyiamu no ase no kor bisaa Onyimnyamfo ofori-Atta dɛ ebɛnadze na ɔma Ghana yɛ soronko fi aman nkaa no ho wɔ dɛm nhyehyɛɛ yi ho ma wonya dɛm gyedzi na enyisun no dɛ yebotum nye IMF edwumakuw no ayɛ nhyehyɛɛ bi a ɔtse dɛm ana afe akɔ ewiei no.
Onyimnyamfo Ken Ofori-Atta dze too gua kyerɛkyerɛɛ mu yii nsɛnkyerɛwnyi no asɛmbisa no ano dɛ,
“Yɛhwɛ ber no nsɛnsɛm a, yeehu pɛn dɛ aman bi tse dɛ Zambia dze mfe ebien enya dɛm nhyehyɛɛ yi, na ɔbɛyɛ dzen dɛ yɛbɛfa dɛm kwan no do dɛ ɔman. Ebɛnadze ntsi yɛwɔ enyisun dɛ hɛn dze yi bɛyɛ soronko? Menye IMF Kwankyerɛfo Panyin nkɔmbɔdzi mu no, iyinom nye nsɛm pɔtsee a yɛdze pon do: mbrɛ yebotum ama nhyehyɛɛ no edzi mu ntsɛntsɛm ma yaatoto hɛn ndzɛmba yie papaapa. Tsitsir mpo nye nhyiamu a Ɔmampanyin nye IMF Kwankyerɛfo Panyin no yɛe no, na ɔdaa edzi wɔ hɔn ahokeka no mu dɛ wɔbɛyɛ no dɛm. Na Kwankyerɛfo Panyin no kaa dɛ sikafotow edwumakuw no esi nketse dɛ afe no nkogu na woedwir ntseasee bi ho…”.
Ɔdze kaa ho dɛ panyin a ɔda ananmusifo a wɔwɔ ha ano ada no edzi dɛ nnyɛ nda du dwuma na woribedzi, na hɔn dwumadzi dzi kɔ afe no ewiei.
Ɔsanee dze daa no edzi wɔ amandzɛɛbɔ no mu dɛ aban apaw beenum egyinatukuw a hɔn asɛdze nye dɛ wɔnye hɔn a hɔn ho wɔ mu nyinara bedzi ehyia adwendwen mbrɛ nhyehyɛɛ besi akɔ wɔ ɔman no ne kaw nsiesie na ne ngyinae no ho.
