Afe biara no, etsirdii Kuku mbofra mpemmpem. Ntonton ne ka na ɔdze etsirdii ba. Beebi a nsu taataa biara no, ntonton tow hɔn nkyirefuwa na wɔ dɔr wɔ hɔ. Dem mbea no bi nye nsutae, mbea a hɔ yɛ sufɔsufɔ, mbɔnka , nkyɛnsegow na mbɔdambɔ gow mu. Wotum so tow hɔn nkyirefua gu nworaba nkɔnnkɔnoa . Ɔwɔ dɛ yɛbɔ hɛn ho ban fi ntonton hɔn ka ho, nkanka mbofra.
Yebotum afa akwan pii do edzi dɛm dwuma yi. Yebotum ada ntontonbuw a wɔahyɛ no edur mu. Yebotum so ahyew edur ahorow a wɔdze ku ntonton . Edur a wɔpetse ku ntonton so yebotum apetse bi. Ɔwɔ dɛ yɛdze adze sisi ntokura ano siw ntonton kwan dɛ wobowura dan mu. Sɛ yɛtaa siesie hɛn mfikyir na hɛn aka mu so a, ɔbɔboa ma ntoton hɔn ka akɔ famu. Ɔboa ma ntonton fi hɛn nkyɛn kɔ ekyir.
Ɔwɔ dɛ nkrofo a yɛnye hɔn tsetse efiefie nyinara nya bambɔ wɔ ntonton ka ho. Ntonton a ɔwɔ etsirdii no tum twe mbowaba (parasite) no bi dze kɛma obi fofor a ɔbɛka no no. Beebi a etsirdii adɔɔ so no, apemfo na mbofra na wohu amandze kɛse. Yebotum ama hɔn etsirdii edur ma woanom dze abɔ hɔn ho ban.
