Mbaa yɛ abɔdze nyinara kaekyir a wɔyɛ soronko koraa. Hɔn mbɔdzembɔ wɔ asetsena yi mu dze, wɔtow no abaw a onnhyia. Nkan no, nna mbaa hɔn egyapadze nyinara n’abɔse nye gyaadze. Dza nna nkorɔfo tɔ ka nye dɛ, “Mbaa dze nye gyaadze na mbanyin dze nye skuul”. Dɛm ntsi, nna mbaa nnya kwan nnkɔ skuul kantom wɔakɔ ekodu ekyir. Ndɛ mber yi dze, ndzɛmba asesa. Mbaa afa hɔn atam apapa efurafura ma dzibew biara no wotum dzi bi. Nna tserɛ, dza banyin tum yɛ no, ɔbaa tum yɛ yɛ no yie. Mbaa a wotum yɛ yɛ no yie no, bi nye Mfantsenyi ɔbaa a wɔfrɛ no Audrey Maame Esi Swatson a merebɛka no ho asɛm yi.
Wɔwoo Audrey Maame Esi Swatson Kwakwar 23, 1997 wɔ Akyemfo a ɔwɔ Finimfin Mantɔw mu. Ɔhyɛɛ no skuulkɔ ase wɔ Ghana Suapɔn Skuul wɔ Nkran na ɔtoaa do wɔ Ghana “Christian International” Mpanyin Nsɔwdo Skuul wɔ Dodowa. Nwoma a osuae wɔ Mpanyin Nsɔwdo Skuul nye Abɔdze Nyansapɛ.
Maame Esi wiee Mpanyin Nsɔwdo Skuul no, nna oedzi mfe duawɔtwe (18). Owiei no, nna n’enyidoadzehu araa nye dɛ obotu wimuhɛn. Nokwasɛm nye dɛ, ɔdze dɛm daaso yi sii n’enyi do ber a nna ɔyɛ abofra no. Nyame yɛɛ no adom ma onyaa kwan wɔ Mach1 Wimuhɛn no ntui ho Ntsetsee Skuul a ɔwɔ Johannesburg, South Africa na okosuaa mbrɛ wosi tu wimuhɛn.
Ber a nna ɔwɔ skuul no, onyaa kwan tuu no wimuhɛn a odzi kan. Otui maa no skuul no, mekyerɛ Mach1 Wimuhɛn no Ntui ho Ntsetsee Skuul Ebɔbira 4, 2016. Ber no, nna oedzi mfe duakron (19) pɛr. Iyi kyerɛe dɛ, daakye bɛyɛ enyigye ama no ampa. Mprenpren yi dze, Maame Esi kitsa wimuhɛn no ntui tum krataa a South Africa aban no gye to mu a ɔma no ho kwan ma otum tu wimuhɛn. Ber a nna ɔwɔ skuul, na ansaana ne nsa bɛka no tum nkrataa no, otumii tuu wimuhɛn dɔnhwer aha ebien na du.
Seseiara dze, Maame Esi kitsa nankasa no wimuhɛn edwumakuw a wɔfrɛ no Excel Aviation Edwumakuw. Afe 2019 besi ndɛ, ɔno nye sahen a odzi kan ma “Passion Air” wɔ Ghana a otu De Havilland Canada Dash 8 wimuhɛn no.
Iyi nye nkuranhyɛnsɛm a Maame Esi gu do nye afofor kyɛ:
“Mo wimuhɛn no ntui ntsetsee a minyae wɔ Mach1 Wimuhɛn no Ntui ho Ntsetsee Skuul no etu m’ahoɔdzen mpon a ɔboa me ma mutum yɛ edwuma wɔ edwumakuw a hɔn edwumayɛ kɔ kan na ɔyɛ ɔhyew do no mu. Iyi hyɛ me dzen ma misi egyinae a no mu da hɔ wɔ ber mpo a ɔtɔ fa bi a na adwen ayɛ ntanta no. Meyɛ no yie ma binom hwɛ m’anamɔn tu bi na meyɛ adze pa nya mu nsunsuando mapa a mfom kumaa bi na ɔwɔ ho”.
“Otwar dɛ obiara a ɔpɛ dɛ otu wimuhɛn anaa noho edwuma no dze botae pɔtsee bi si n’enyi do, dze da kor si hɔ yɛ no nkakrankakra ber kor a daakye enyidoadzehu na nhyehyɛɛ mapa si n’enyi do no. Kentsen woho si bea a ɔkrɔn, enye afofor mbɔ mu nyɛ edwuma na boa binom”.
Maame Esi agye abawdobɔdze pii, tsitsir nye Asoɛe a wɔhwɛ Ghana Wimuhɛn Nsɛnsɛm do dze no. Afe 2016 mu no, onyaa kwan kɔr Wimuhɛn Ho Nsɛnsɛm nhyiamu wɔ Amereka a oenntua ho hwee. Ɔkɔree wɔ “International Women In Aviation” hɔn Ebibir mu wimuhɛntunyi ɔbaa a odzi kan no dzin mu. Wɔdze no kaa “The Future Awards Africa Prize” hɔn abawdobɔdze a wɔdze maa hɔn a nna wɔwɔ akwanya dɛ wobenya abawdobɔdze dɛ Ghana ɔbabun a no mbɔdzembɔ sɔ enyi afe pɔkyee bi mu no ho.
Afe 2022 mu no, onyaa Akatasiaba a ɔbɔ noho mbɔdzen abawdobɔdze no wɔ “Exclusive Men of the Year Africa Awards” dwumadzi no ase. Nokwar, ɔkɔbran twa par a, wɔma no mbo. Nyame nhyira Maame Esi.
