Lionel Andrés Messi yɛ Argentina bɔɔlbɔnyi a wɔwoo no Obiradzi 24, 1987. Ɔyɛ bɔɔlbɔnyi a ɔno na Portugal bɔɔlbɔnyi Cristiano Ronaldo edzi bɔɔlbɔ do akyɛr yie papaapa. Wɔwoo Cristiano Ronaldo dos Santos Aveiro wɔ Portugal Kwakwar 5, 1985. Afe 2007 na wɔhyɛɛ ase dɛ woridzi bɔɔlbɔ do. Fitsi dɛm mber no, bɔɔlbɔfo yi hɔn dzin atahye wiadze n’afɛndzeanan nyinara ɔnam hɔn abawdobɔdze abakɔsɛm a wɔwɔ no ntsi. Hɔn dzin no nntahyee wiadze n’afɛndzeanan kwa; fitsi afe 2008 dze besi afe 2022, hɔn beenu no agye FIFA Wiadze bɔɔlbɔnyi a onyim bɔɔlbɔ afe pɔkyee bi mu abawdobɔdze a wɔfrɛ no ‘Ballon D’or’ no nkorkor duebien (12); Messi agye esuon (7) na Ronaldo so agye enum (5). Sɛ ɔba no bɔɔlbɔ abawdobɔdze etsitsir binom so a, bɔɔlbɔfo yi agye ne nyinara bi. Iyi ama da baa ekyingye a ɔba nye dɛ, “Woana nye bɔɔlbɔnyi a ne saso bi mmbaa da?” Borɔfo kasa mu no, woana nye ‘Greatest Of All Time’ a wotwa no sin dɛ ‘GOAT’ 🐐?
Bɔɔlbɔfo beenu yi nyinara ayɛ dza bɔɔlbɔnyi biara nnyɛɛ bi dɛ kɛpem dɛ, abakɔsɛm a woegya ato bɔɔlbɔ mu, na wogu do araa reyɛ afofor no, kaansa Diego Maradona, Pele, Johan Cruyff, Franz Beckenbauer na bɔɔlbɔfo kunyin binom abɛyɛ bi kɔ dze, naaso dza Lionel Messi na Cristiano Ronaldo dze mfe deunum abɛyɛ wɔ bɔɔlbɔ mu no kyɛn hɔn dze no nyinara. Aso ano nko na ndɛmbafo bɔɔlbɔ adɔfo dze rekeka dɛm nsɛm yi dɛ dza Lionel Messi na Cristiano Ronaldo ayɛ yi yɛ ‘edutwam’? Dza ɔwɔ asɛm yi mu no na ɔbɛkyerɛ. Pɛ nsunwin bi dwedwe w’akoma na to wo bo ase kenkan a.
Ma yɛnhyɛ ase wɔ Cristiano Ronaldo do. Cristiano Ronaldo hyɛɛ no bɔɔlbɔ ase afe 2002 wɔ no kurom Portugal bɔɔlbɔkuw Sporting Lisbon. Osii akan nkorkor eduonu enum (25) dze maa hɔn na ɔtoow ntsena ebiasa (3) pɛr. Fitsi hɔ no, ɔtoaa no bɔɔlbɔkuw abrabɔ do wɔ Ngyiresi bɔɔlbɔkuw Manchester United. Ɔsanee toaa do kɔr Real Madrid wɔ Spain kesii akan pii. Ofi hɔ no, ɔkɔr Italy kɔtoaa do wɔ Juventus. Ofi Juventus no na obuu ne kɛtɛ mu kɔr Manchester United bio. Ne nyinara mu no, oesi akan nkorkor apem kor ɔha na eduonum anan (1,154). Oetum atow atsena ahawɔtwe na eduonum ebiasa (853) – [Mumu 19, 2022. No bɔɔlbɔ akan biara a oesi wɔ bɔɔlbɔkuw akansi mu ka ho]. No bɔɔlbɔkuw akansi mu no, ɔagye kɔɔpow kor (1) pɛr ama Sporting Lisbon. Ɔasan so agye nkɔɔpow akron (9) ama Manchester United. Ɔagye nkɔɔpow duenum (15) ama Real Madrid. Ɔagye nkɔɔpow enum (5) so ama Juventus. Seseiara, onnsi akan mma bɔɔlbɔkuw biara [Mumu, 2022 mu]. No kɔɔpowgye mu no, Champions league na nkɔɔpow etsitsir nyinara wɔ mu bi.
Ne man Portugal no, osii n’akan a odzi kan maa hɔn afe 2003. Oesi akan nkorkor ɔha na eduakron esia (196) atow ntsena ɔha na eduawɔtwe (118) – [Da a otwa tun a ɔdze sii akan nye Mumu 10, 2022]. Ne nyinara mu no, ɔagye nkɔɔpow ebien- UEFA EURO (1), UEFA Nation’s League (1). Amanaman akansi afamu no, oesi akan (196) a ɔkyɛn obiara. Afei so, ɔato ntsena (118) a kyɛn obiara. Iyi ama ne dzin atahye wiadze n’afɛndzeanan nyinara dɛ ɔno nye bɔɔlbɔ mu okunyin mu okunyin no.
Lionel Messi hyɛɛ no bɔɔlbɔ ase afe 2005. Fitsi dɛm mber no, oesi akan pii. No bɔɔlbɔkuw akansi afamu no, oesi akan ama bɔɔlbɔkuw ebiasa – Newells Old Boys wɔ no kurom Argentina, Barcelona wɔ Spain na PSG wɔ France. Oesi akan ahawɔtwe na eduonum ebiasa (853). Ɔato ntsena nkorkor ahaesuon na kor (701). Osii akan ahawɔtwe (800) maa Barcelona na oesi akan eduonum ebiasa (53) so ama PSG. Ɔagye nkɔɔpow eduasa esia (36). Barcelona dze yɛ eduasa anan (34) na PSG dze yɛ ebien (2) – [besi Mumu 19, 2022]. Nkɔɔpow akɛse na etsitsir a ɔwɔ bɔɔlbɔkuw akansi mu a ɔwɔ Spain na France no, ɔagye ne nyinara bi].
Sɛ ɔba no amanaman bɔɔlbɔ akansi a, afe 2005 na osii n’akan a odzi kan maa Argentina. Oesi akan nkorkor ɔha na eduosoun ebien (172) na ɔato ntsena nkorkor eduokron awɔtwe (98)- [Da a otwa tun a ɔdze sii akan nye Mumu 18, 2022]. Ɔagye nkɔɔpow ebiasa – Copa America kor (1), UEFA-COPA kɔɔpoow kor (1) na FIFA Wiadze Bɔɔlbɔ akansi so kor (2022). – [U20 na Olympics bɔɔlbɔ kɔɔpow no nnka ho osiandɛ wɔnnkan nnka mpanyin bɔɔlbɔ ho]. Iyi ama ne dzin atahye wiadze n’afɛndzeanan nyinara tse dɛ Cristiano Ronaldo pɛpɛɛpɛr.
Asɛmbisa no nye dɛ, woana nye woana wɔ bɔɔlbɔ mu? Aso ɔyɛ Lionel Messi anaadɛ Cristiano Ronaldo anaa woana? Asɛm yi na ɔda bɔɔlbɔ adɔfo a wɔwɔ wiadze n’afɛndzeanan nyinara ano ma obiara retafer ho bi. Nna obiara rohwehwɛ dɛ bɔɔlbɔfo beenu yi mu kor bɛgye 2022 Qatar FIFA Wiadze Bɔɔlbɔ Akansi no dze eyi dɛm asɛm yi ano. Cristiano Ronaldo peree peree araa naaso Morocco yii hɔn fii mu wɔ kuw awɔtwe bea no wɔ akansi no mu a otumii toow atsena kortsee. Lionel Andrés Messi nye Argentina koe koe no, aberwa yii no poma kwan mu ma oetum agye Wiadze Bɔɔlbɔ akansi kɔɔpoow no. Iyi na dodowara (Ronaldo n’ekyirtaafo ka ho) rekyerɛ dɛ, seeseiara dze, esikyire enya egu anhwea mu ewie ntsi, Lionel Messi nye wiadze bɔɔlbɔnyi a ne saso bi mmbaa da. Kaansa dodowara reka dɛm mpo a, binom wɔ hɔ a wɔgye dzi dɛ Cristiano Ronaldo nye hɔn bɔɔlbɔ mu kunyin mapa. Ɔwo so w’adwen kyerɛ wo dɛn?
