Dɛ aban mfa ne nsa nto ehuhusene do anaa mma ɔmmfa ne nsa nnto do no yɛ asɛmbisa a abɛdan ankokɔnkɔ kɛse fitsi ber a Burkina Faso nsordaarfo mampanyin dze ne nsa too do wɔ ne man mu no. Ber a binom rekyerɛ dɛ sɛ aban dze ne nsa to do a ɔbɔboa ma hɛn mbofra hɔn nyinii na hɔn ntsetsee pa no, hɔn a wɔmmpɛ dɛ aban dze ne nsa to do no so kyerɛ dɛ ogyina ankorankor bi do dɛ ɔbɔhwɛ ehuhusene anaa ɔnnkɔhwɛ na no nsunsuando biara so kɔ nyia ɔhwɛ no do. Dɛm akyerɛw yi bɔdɔ adwenkyerɛ ebien yi nyinara mu esukɔ ber a ɔnenam mframa mu dɛ da bi bɛba a Ghana aban bɔdwen dɛ ɔdze ne nsa bɔto do no.
Hɔn a wɔpɛ dɛ aban dze nsa to ehuhusene do wɔ Ghana no taa dze hɔn enyi kyerɛ ɔhaw a ɔbɔko etsia ntsetsee pa na hɛn amambra dɛ Ghanafo na mbrɛ obotum enya nsunsuando bɔn wɔ tsitsir mbofra na mbabun do no. Wɔkyerɛ mu dɛ, ehuhusene yɛ adze a ɔko tsia ntsetsee pa na ɔsɛɛ mbofra ntsɛm. Wɔwɔw do ka dɛ, ehuhusene botum ama mbofra dze hɔnho ahyɛ mpamu nkitahodzi mu ntsɛm a obotum dze nsunsuando bɔn pii abrɛ ɔman no ne daakye. Hɔn dze, hɔn dze ara nye dɛ nkyɛ aban mma mpanyimfo nko nhwɛ ehuhusene no kyɛn dɛ ɔbɛda hɔ ma abofra so enya ho kwan akɔhwɛ bi.
Hɔn a wɔmmpɛ dɛ aban dze ne nsa bɔto do no so kyerɛ dɛ, ankorankor biara wɔ ne fahodzi na n’apɛdze a ɔboa no ma otum yɛ dza ɔpɛ biara. Wɔkyerɛ mu dɛ, dɛm fahodzi yi wɔ mfasodze ma ankorankor biara a onnyi dɛ aban haw noho dze nsa to ehuhusene do wɔ ɔman no mu. Wɔka dɛ, sɛ aban bɔdwen ho mpo dɛ ɔdze ne nsa bɔto ehuhusene do a, nkyɛ ɔmbɔ mbɔdzen nhyɛ mpamu nkitahodzi ho adzesua no mu kena ama mbofra na mbabun eehu dza ɔwɔ mu nyinara kyɛn dɛ ɔdze ne nsa bɔto do wɔ hɛn man yi mu.
Binom so kyerɛ a, nkyɛ obehia dɛ aban bɔhwɛ ehuhusene no hwɛ dodow wɔ hɛn man no mu ne farbaa kyɛn dɛ obepetuw ara dze ne nsa ato do. Sɛ nkyɛ aban no dze n’enyi bɔkɔ adwen apɔwmudzen ho, adzesua a ɔfa ehuhusene ho wɔ borɔn na skuul biara mu a, ɔbɔboa esiw nsunsuando bɔn a ɔwɔ ehuhusene no hwɛ ho no kyɛn dɛ ɔdze ne nsa bɔto do korakoraa. Bio, sɛ awofonom na mpanyimfo botum ama hɔn enyi akɔ hɔn mbofra dwumadzi wɔ fuon do no ho yie a, nkyɛ ɔno so bɛyɛ mboa – dza hɔn a wɔmmpɛ dɛ aban dze ne nsa to ehuhusenen do no ka no bi nye iyi.
Mfir na abaɛfordze nsɛnsɛm a ɔnnhyɛ da ara nnyɛ edwuma papa wɔ hɛn man mu no so ka ho. Sɛ ekɔ aborɔkyir na Ebibiman ne mbeambea a abaɛfor mfir yɛ edwuma papaapa no a, fuon a mbabun na mbofra dze dzi hɔn dwuma no, hɔn awofo tum hu dza wɔdze yɛ biara. Iyi mma mbofra no mmfa nnyɛ dza wɔpɛ biara ber a wonyim dɛ hɔn awofo botum ehu adze bɔn biara a wɔdze bɛyɛ no. Dɛ mbrɛ ɔman no reper ara dɛ n’abaɛfor nsɛnsɛm botu mpon no, sɛ obotum ahwɛ mbrɛ amamfo botum ehu dwumadzi a hɔn dehyee dze fuon dzi no a, nkyɛ onnkehia mpo dɛ ɔbɔdwen dɛ ɔdze ne nsa bɔto ehuhusene do wɔ Ghana.
Adwempɔw ebien a ɔfa dɛ aban mfa nsa nto ehuhusene do anaa mma ɔmmfa ne nsa nnto do no nyinara yɛ adwempɔw a ɔtɔ asomu. Mbrɛ ndɛ mbabun dze hɔnho agye ehuhusene no hwɛ mu no, sɛ nkyɛ aban dze ne nsa bɔto do a nkyɛ obeye eso onnkotum ahwɛ mbabun hɔn ndzeyɛɛ yi do etsiatsia binom so hɔn fahodzi do. Aso aban mfa ne nsa nto ehuhusene do anaa mma ɔmmfa ne nsa nnto do? Kyerɛ w’adwen wɔ hɛn Sohyial midia mprama ahorow no nyinara do.