Sɛ yɛdze agodzi si nkyɛn a, ndwom yɛ adze kor bi so a Ghanaman no enyi dzi ekyir papaapa. Ɔnam do ma ndwontowfo etsitsir na wɔabɛnantsew Ghana asaase yi do pɛn, na daa daa dodowara so gu do nantsew do. Ndwontowfo bi tse dɛ Sarkodie, CK Mann, Amakye Dede, Daddy Lumba, Kodwo Antwi, Shata Wale, Stonebwoay, Kofi Kinaata, Paapa Nyankson, Black Sherif na ndwontowfo etsitsir a wɔabɛsen kɔ na wɔwɔ hɔ ber yi kyerɛ mbrɛ Ghanafo nntoto ndwontow ase.
Ansaana ndwontowfo ahorow yinom a mereka hɔn asɛm yi dze ndwom bi bɔbɔ adze no, yɛwɔ nkorɔfo binom a hɔn edwuma nye dɛ wɔbɔhwɛ afetsew ndwom no ma ayɛ dɛw. Dɛm nkorɔfo no dze ndwontowfo hɔn ndwom ndze dɛmara no gu mfir do na wɔfetsew totow ndze no yie na wowie a wɔdze dza wɔfrɛ no biitsi to ndze no ase ma ɔbɛdan ndwom a ɔtɔ nkorɔfo asomu ma hɔn asomu yɛ hɔn dɛdɛɛw tse dɛ gyama ewo bi asɔ hɔn anomu. Dɛm nkorɔfo a wodzi dwuma a ɔtse dɛm wɔ ndwom mu no, hɔn mu kor nye Appietus a merebɛka no ho asɛm yi. Bugyebaaya! Appietus kyerɛ ase dɛ “yɛ krado kenkan bi”.
Appietus ne dzin ankasankasa a n’awofo dze too no nye Appiah Dankwah. Nna tserɛ, onnyi dɛ obi kyerɛ wo bea a ne dzin “Appietus” no fi. Wɔwoo no Ebɔw 12, 1977 wɔ Nkran mbom ɔyɛ Esuantsenyi a ofi Aduman. Appietus yɛ ndwontownyi, sentwanyi, na tsitsir, ndwomfetsewnyi a ɔyɛ n’edwuma wɔ Nkran.
Hɛn wura Appiah n’ahyɛse skuulnsɛm nnhyɛ da ara nnda hɔ pefee mma amansuon, na mbom ɔkɔr no nsɔwdo skuul wɔ Ebenezer Nsɔwdo Skuul a ɔwɔ Dansoman. Ɔyɛ Mɛtɔdesenyi mapa a ɔmmfa n’asɔrkɔ nndzi agor. Dɛm ntsi orinyin no na ɔhyɛɛ kyenbɔ ase wɔ n’asɔr. Ɔdze no kyenbɔ dɛmara na onyaa dɔ maa ndwontow edwuma no. Ɔnam do ma n’enyi fiir kakra wɔ afe 1995 mu no, ɔdze no ho hyɛɛ ndwontow mu ankasankasa. Ɔnam do ma okosuaa mbrɛ wosi fetsew ndwom wɔ Fredima Ndwomfetsewbea a ɔwɔ Adabraka wɔ Nkran.
Mfe ebiasa ekyir pɛpɛɛpɛr no, Appietus hyɛɛ ase nyinii wɔ ndwontow edwuma no mu. Ber no, ofii Fredima Ndwomfetsewbea no nwin ase na obuu ne kɛtɛ mu kɛyɛɛ edwuma wɔ “Kay’s Frequency” wɔ Nkran hɔ ara. Ɔsan so yɛɛ edwuma wɔ Kampsite Ndwomfetsewbea kɛpem dɛ ɔnye Ghana ndwontownyi panyin a wɔfrɛ no Amandzeba buee hɔnankasa hɔn ndwomfetsewbea a ne dzin nye “Creative Studious” wɔ afe 2006 mu. Amandzeba nye no yɛɛ edwuma kyɛree kakra no, ne mber soe ma ndwomfetsewbea no bɛhyɛɛ Appietus nko nsa. Ɔno na ɔdze mu ara bɛpem ndɛ nyinara no.
Ndwontowfo etsitsir na Appietus nye hɔn ayɛ edwuma pɛn. Ɔnam do ma ɔafetsew ndwom a no dodow yɛ ahaebien na eduasa kor (231). Ɔnnyɛ ndwom biara kɛkɛ, mbom ndwom a no mu biara agye dzin ankasankasa wɔ Ghana na Ebibiman mu. Dza ɔayɛ no, wiadze n’afɛndzanan nyinara mu no, ndwomfetsewnyi kortsee na oetum ayɛ ma etwa no mu. Ne dzin nye Johnny Kitagawa a ɔafetsew ndwom nkorkor ahaebien na eduasa ebien (232) a ne dzin wɔ Guinnessfo hɔn abakɔsɛm nwoma mu no.
Ndwontowfo a ɔnye hɔn ayɛ edwuma pɛn ma ɔnam do ma oetum afetsew ndwom dodow yi dɔɔ so. Hɔn mu binom nye Praye, 4×4, Wutah, 5Five, Castro, Daddy Lumba, Ofori Amponsah, Kofi Nti, Sarkodie, Lord Kenya, K.K. Fosu, Obrafour, Bukbak, Adane Best na hɔn a wɔkeka ho. Ɔnam do ma Appietus agye abawdobɔdze beberee.
Appietus yɛ ndwomfetsewnyi bi a ɔyɛ akyɛdze ma nnyɛ Ghanaman na Ebibiman nko, mbom wiadze n’afɛndzanan nyinara a ɔwɔ dɛ yɛma no mbo osiandɛ mpanyimfo dɛ, “Ɔkwabran twa sar a,wɔma no mbo”.
