Ɔnnkyɛree biara na ɔkɔmfo basia bi a wɔfrɛ no Nana Agradaa soɛree wɔ Ghana ha a, nna ne dwumadzi na no nkongyaa regye ehim wɔ ɔman yi mu papaapa. Nana Agradaa yi dze tɛkyerɛma dɛw ɔnye enyitsew bɔn dze daadaa nkrɔfo pii dze gyee hɔn nsa mu sika ma asɛm yi bɛyɛɛ dagyaa wɔ Ghana ha.
Annkyɛr biara na Ɔsofo panyin a ɔda Parliament asɔr ano dze nkɔmhyɛ bae dɛ, Agradaa begyaa akɔm na abosomsom no na w’ayɛ Nyame n’edwuma. Ber a dɛm nkɔmhyɛ yi bae no, annkyɛr koraa na yenyaa no ntsee dɛ Agradaa asesa ma wɔabɔ no esu ma wɔabɛyɛ ɔsɛmpakafo a ne dɛm ntsi no wɔfrɛ no ɔsɛmpakafo Patricia Oduro Kroanteng.
Nda kakra ekyir na yɛtsee dɛ Mama Pat atɔ asɔr dan efir ɔsɔfo bi a wɔfrɛ no Apae Life hɔ dɛ ɔdze rɛbɛyɛ n’asɔr. Asɔr yi ne dzin nye Heavenway Champion International Minstry.Ɔnam dɛ n’enyi atsew na onyim dza ɔpɛ dɛ ɔyɛ ntsi no, Ɔhyɛɛ ase dɛ ɔreyɛ nsɛnkyerɛdze wɔ n’asɔr hɔ na iyi maa nyimpa binom hyɛɛ ase dɛ wɔrosom wɔ hɔ.
Ɔbɛsɛ bosom yi mu na ɔkaa no wɔ n’asɔrfi hɔ dɛ ,hɔn a wobuu hɔn ebupɛndu nyinara no, basia kor bi na nna ne dze so paa ntsi, ɔdze Ghana sedi ɔhaebien dze bɔɔ n’abaw do. Iyi maa asɔrtow no nyaa gyedzi mapa wɔ Mama Pat no mu. Ɔsanee so kaa kyerɛ hɔn dɛ, Ɔpɛ dɛ ɔboa eguadzifo,hɔn a wɔpɛ sika etua hɔn adan kaw,hɔn a wɔpɛ sika ayɛ edwuma na ma ɔkeka ho pii. Ntsi sɛ ebɔ afɔr kɛse a, ɔbɔbɔ ho ama wo. Iyi maa asɔr mba a wɔwɔ hɔ no dze hɔn ho sika nyinara maa no ɔyɛ Ɔbɛsɛ 7,2022.
Ber a wɔpon asɔr no, asɔrmba no hwɛɛ kwan dɛ Agradaa bɔbɔ hɔn sika no ho ama hɔn, naaso wɔanntse ne nka. Iyi maa asɔrtow no bɔɔ dɔmpim wɔ hɔ a binom mpo dze ebufuu yiyii asɔrdan mu hɔ ngua no bi dɛ wɔdze rehyɛ hɔn sika no anan mu. Annkyɛr koraa na nsɛmKyerɛwfo binom dur hɔ ma wɔdze sene na mfonyin ahorow a afa asɛm yi ho guu abaɛfor ntsentan do. Aporisifo ayɛ asɛm yi ho nhwehwɛ mu ma ɔakyɛr Mama Pat Ɔbɛsɛ 9, 2022.
