Alatanyi ababaawa bi a wɔfrɛ Hilda Bassey Effiong esi nketse edzi dwumason ama ne man ara yie. Asɛm yi yɛ dza ɔyɛ dɛw a ɔgye adwendwen na ɔdze enyigye na enyimnyamhyɛ abrɛ Alataman no na Ebibiman nyinara. Ababaawa yi edzi mfe eduonu esoun. Ofi Akwa Ibom, kurow bi a ɔwɔ Alataman mu. Ne maame ne dzin dze Owurayer Lynda Brown.
Hilda Bassey ebue edzidzibea a wɔfrɛ no “My Food” a agye dzin papaapa wɔ Alataman mu. Ababaawa yi yɛ obi a ɔwɔ nyimdzee wɔ edzibannoa mu araa yie. Dɛm ntsi ɔyɛɛ n’adwen dɛ ɔbɔkɔ ekesi akan dze etu nyia ɔtse do dɛ nyimpa a otumii dze dɔnhwer eduakron noaa edziban ahorow pii dze soom nyimpa dodow pii no.
Nyia ɔtse egua do dada no yɛ Indianyi Ewuraba bi a wɔfrɛ Lata Tondon. Indianyi ababaawa yi ekyir no, obiara nntumii nnyɛɛ dza ɔkyɛn dza ɔayɛ no na iyi na Hilda yɛɛ n’adwen dɛ ɔbɔkɔ akɛyɛ dza ɔkyɛn dɛm koraa ama ne dzin aakɔ “Guinness” nwoma mu dɛ nyia ɔgye dɔnhwer dodow anoa edziban asom nkorɔfo.
Ansaana Hilda Bassey botum etu nyia ɔtse egua do no, mbra no kyerɛ dɛ gyedɛ otum dze dɔnhwer eduakron noa edziban ahorow pii a bi yɛ edziban a amanaman pii dzi na ɔdze dɔnhwer akron pɛr bɛgye n’ahom dɛ mbrɛ nyia odzii kan no yɛe no ara pɛr. Akansi yi yɛ nda anan dwumadzi. Akansi no kɔr do wɔ Alataman mu, beebi a wɔfrɛ hɔ Amore Gardens a ɔwɔ Lekki.
Ababaawa yi dze mber na ɔdze noa edziban biara. Akansi no yɛ akansi a ɔyɛ dzen araa yie naaso ababawaa Hilda sii n’adwen pi gyee pen na afei osii nketse dɛ ɔbɔkɔ ekesi akan no. Iyi kyerɛ akokodur a ɔbabaawa yi wɔ dɛ basia. Akansi yi ne dzin dze “Guiness World Record Maraton Cooking”. Akansi no hyɛɛ ase Yawda Esusow Aketseaba 11, dze kesi Dwowda, Esusow Aketseaba 15, 2023.
Mpanyimfo a wɔhyehyɛɛ dwumadzi yi dze mbra pii too ho a sɛ otum dzi do na otum gyina kesi ewiei a, nna ɔkyerɛ dɛ Hilda edzi konyim. Akansi no ho mbra no bi nye dɛ:
1. Ababaawa yi bɔnoa edziban nda anan a ɔnnda anaa ɔnnkɛgye n’ahom mbom mbra no ma no kwan ma ɔhom sema enum pɛr dɔnhwer kor biara ntamu.
2. Ɔsɛ dɛ ogyina hɔ noa edziban no a onnyi ho kwan dɛ ɔtsena ase
3. Onnyi ho kwan dɛ ɔbɔnom nsu anaa nsa biara a ɔbɛma no ahoɔdzen ma oeetum egyina ayɛ edziban no.
Dwumadzi no ase no, mpanyimfo tsena ase a, dza wɔyɛ nye dɛ wɔbɔhwɛ akyerɛw edziban a ɔbɔnoa na ɔaakyɛ ama nkorɔfo biara. Akansi no mu mbra no kyerɛ dɛ, ɔsɛ dɛ ɔkyɛ edziban a ɔbɔnoa biara ma nyimpa dɔm a wobehyia hɔ no ma wodzi a ɔnngye sika mmfi obiara hɔ. Afei, mbra no ma no ho kwan ma otum noa edziban biara a noara pɛ mbom dza wohia ara nye dɛ ogu do ronoa edziban no.
Mpanyimfo na adwontofo bi tse dɛ Yemi Osinbajo, ɔdwontonyi, Tiwa Savage, Charlce Okocha, Davido,Debola Williams na pii na wɔkɔr hɔ kɛtaa n’ekyir. Alataman no mu mba; mpanyin na mbofra na wɔbɔɔ dɔmpem kɛtaa ababaawa Hilda n’ekyir.
Odur beebi no, nna ababaawa yi ayɛ mberɛw naaso ɔammpa abaw. Ne nyinara mu no, nna ne maame wɔ hɔ rema no nkuranhyɛsɛm. Agodzi ahorow pii na ɔkɔr do wɔ hɔ a nna ne nyinara yɛ nkuranhyɛ ma Hilda.
Nda anan no baa ewiei no, ampa nna ababaawa Hilda Bassey Effiong etum edzi mbra no do edzi dwuma biara a ɔsɛdɛ odzi.
Afei, mpanyimfo abɔ no abɔtsir dɛ ampa ababaawa yi etum etu nyia nkyɛ nna ɔtse egua no. Ndɛ yi, Hilda Bassey ne dzin aba “Guiness”nwoma no mu dɛ otumii gyina ne nan do dɔnhwer pɔrpɔr ɔha (100) noaa edziban na iyi nam do ma Alata manpanyin abɔ n’abaw do wɔ konyim oedzi ama ne man no mpo ɔnye Afrika nyinara.
