Sɛ fɔntɔnfrɔm bɛyɛ dɛw a nna ogyina akyen ahorow a wɔka bɔmu gor no do. Hɛn nananom nam hɔn nyimdzee do kekaa akyen ahorow esuon bɔɔ mu a sɛ wɔka gu mu na wɔrogor a, nnkotukum atsena hɔ dɛ remmbɔ wo nan ano koraa. Dɛm akyen yi hɔn edzin, hɔn bɔbew na dza wɔyɛ na odzidzi do yi:
Ansawa: Iyi yɛ kyen kakraba bi a wɔbɔ na ɔka akyen ahorowa wɔbɔ mu gor fɔntɔmfrɔm no ho. Sɛ wɔrogor fɔntɔmfrɔm a, kyen Ansawa ne nsɛm a ɔka nye dɛ“ aburafo wɔgor agor bɔnanaa bankye fufuw da gya mu”.
Opintsin: Iyi so yɛ kyen kakraba dɛ ansawa no. Mbom ɔyɛtsia na no mu yɛ dur sen ansawa no. Dɛm kyen yi so wɔ nsɛma ɔka ber a wɔrogor fɔntɔmfrɔm. Asɛm a opintsin no ka no nye dɛ“ Obirempɔn se obedzi ewu a, wɔmma mbusu nka no”. Dɛm kyen yi ka nsɛm yi mpɛn bɛyɛ ebiasa ana etumpan no ahyɛ ase akasa.
Etumpan: Etumpan yɛ akyen ebien, Onyin na Ɔber. Ɔber no si nyimfa na Onyin no si bankum. Wɔdze dɛm akyen ebien yika frɔm ebien, aprede ebien na dawur ho na wɔdze gor Mfantsefo ayer fɔntɔmfrɔm no. Wɔdze etumpan ka nsɛm piikyerɛ ɔhen na ɔmamfo no. Wɔyan etumpan wɔ ber biara, dɛ ɔyɛ enyigye ber, awerɛhow, afahyɛber anaa ber a wɔregye ɔhen enyi. Ɔnam dɛ wɔdze kasa ntsi borɔfo kasa mu wɔfrɛ no “talking drum”. Fɔntɔmfrɔm no ngoree mu no, etumpan dzikan tontom, kasa ana frɔm no agye do.
Frɔm: Frɔm iyi so yɛ akyen atsentsen ebien, kɛse kor nakakraba kor. Ɔkyerɛma bɔ akyen yi dze gyegye ahemfo taataana wɔdze ka adɛfɛdɛfsɛm kyerɛ hɔn.
Wɔbɔ kyen yi wɔ fɔntɔmfrɔm no ngoree mu ber a ɔhen bi rebɛtsena ase wɔ eguabɔ ase anaa oesi guamu dɛ ɔrebɛsaw. Dɛm akyen yi nye akyen a wodzi akotsen wɔ fɔntɔmfrɔm no ngoree mu. Nsɛm a akyen yi ka no bi nye:
“Nana brɛbrɛ,
to wo bo tsiatsia,
tutu w’anan ebirempɔnmu,
Woara w’asaase a,”
