Ɔyɛ awerɛhowsɛm kɛse kɛse dɛ abaatan binom nyinsen abosoom akron woo wie a na wɔakɔtow hɔn mba a wɔakyem hɔn aberɛ no egu. Wɔwoo hɔn wie a, ɔnam siantsir bi ntsi, wɔtaa tow mbɔdomamba yinom gu mbeambea a hɔ nntsew a ogya hɔn kɔ esian ahorow mu. Ɔyɛ adze bi a abɛgye ntsin ankasa wɔ hɛn man yi mu a ɔyɛ akomatsew ankasa.
Dzin a wɔdze ma mba a wɔwoo hɔn tow hɔn gu nye “mbatowgu”. Ɔyɛ ɔhaw kɛse kɛse a ɔhaw mbɔdomamba a wɔkɔ tsebea a ɔtse dɛm mu no, hɔn borɔn na ɔman mu no nyinara a otwar dɛ yɛyɛ bataboa siw ano korakoraa. Mpɛn pii no, abaatan yinom taa tow mbɔdomamba a wɔmmfoom obiara no gu mbeambea a hɔ nntsew. Dɛm mbeambea yi bi nye sumina do, nsuka mu, tsiefi mu, kwan nkyɛn, bɔnka mu, nwuramu na mbeambea a ɔkeka ho na wɔdze mbɔdomamba yinom hɔn nkwa to nsɔhwɛ mu. Ɔtɔ fa bi a, kɔm tum bɔ hɔn yar ahorow ma wowuwu. Ɔtɔ fa bi so a, mbowa abɔyafo mpo tum kyer hɔn we hɔn ku hɔn a ɔyɛ akomatsew ankasa.
Abaatan a wɔdze hɔnho hyɛ etsiɔdzen na amambɔensɛm a ɔtse dɛm mu no yɛ no siantsir ahorow pii do. Mpɛn pii no, abaatan yinom yɛ hɔn a wɔfaa mperwanyinsen na wɔwoo mperwawoo. Ɔtɔ fa bi so a, hɔn nyinsenber mu no, egya anaa banyin a ɔhyɛɛ hɔn nyinsen no tum guan gya hɔn. Iyi ma wɔnam ahokyer do dze hɔnho hyɛ ndzeyɛɛ a ɔtse dɛm mu.
Ɔtɔ fa bi so a, adwenmu yarba, tsitsir abɔdam anaa abɔdam ahyɛse tum haw baatan no ma osi egyinae a ɔtse dɛm. Mpɛn pii no so, abaatan yinom yɛ hɔn a wɔfaa atseetsee bi tse dɛ mbɔndarto mu dze nyinsenee, na wɔtweɔn woo wie a, woeyi mba no towkyen. Abaatan binom so wɔ hɔ a, wɔwoo wie na wohu dɛ abofra no edzi dzɛm pɛr na wɔakyekyer no akɛkyɛ nananom. Aso ɔyɛ abɔdomaba no no mfom dɛ oedzi dzɛm?
Sɛ ɔba no dɛm a, ɔgye ɔdɔfo pa bi anaa boafo pa bi ma ohu abɔdomaba no na ɔdze no kɔ ngyankafie ma wɔhwɛ no. Sɛ ɔkɛba no dɛ obiara ennhu nkataba yinom a, wɔda hɔ wu prɔw. Iyi yɛ awerɛhowsɛm kɛse kɛse a otwar dɛ ɔman no hyɛ ase bɔ ho dawur kyerɛ kyerɛ, no do botwa a.
Ɔnam iyi do ma afe biara no, ebɛtse no na baatan bi eyi ne ba a wɔawoo no fofor egu tsiefi mu, nsuka anaa mbeambea a hɔ nntsew mu. Ɔreyɛ ayɛ dɛ ndzeyɛbɔn a ɔtse dɛm no abɛka a ɔnnsɛ dɛ yɛtsena hɔ ma ɔka. Ber aso dɛ ndwumakuw a wɔnnhyɛ aban ase, aban nankasa na ankorankor boa siw atoyerɛnkyɛm a ɔtse dɛm no ano. Onnyi dɛ abɔdomaba bi fa ɔhaw a ɔtse dɛm mu. Ɔmmfoom obiara.
