Mpanyimfo na wobuu hɔn bɛ bi dɛ, “Sɛ wo werɛ fi wo kuromhen n’abɛntsia a, eyew wɔ guabɔ ase” na Aso ebɛnadze nye abɛntsia?
Abɛntsia
Abɛntsia n’atsetse dzin nye “afrɛfrɛbɛn”, tserɛ ɔyɛ abɛn a wɔdze frɛ ɔhen n’abɔdzin. Abɛntsia yɛ asombɛn a woetwan’ano feaa no akyen na woetue mu wɔ ne nkyɛmfa mu. Nokwar, ntuei no nnyɛ ntuei, sekan na wɔdze koekoe bea a wɔpɛ dɛ tokur no da no.
Wotue no bankum, nyimfa, sor nye ase na wotu biew no fi mu. Tokur no ne kɛse bɛyɛ dɛ nsakor, na wotue ma ɔbɛn asombɛn no ne tsir feafea a wotwa fi hɔ no. Sɛ wotue dɛm tokur yi wie a, nna abɛntsia no ho ntokur ayɛ ebiasa, ambɛn no ne tsir a hɔ tserɛw no, ne tsir feafea a wotwa ano, nye nkyɛnmu tokur a wotue no.
Wɔdze edwindzi sekan siesie dɛm ntokur ebiasa yi ano fɛfɛɛfɛw amma biew emmfi no mu biara mu annwɔ ahemfo no. Afei wɔdze sekan no siesie ambɛn no mu no nyina ma ɔyɛ tromtrom.
Abɛntsia yɛ Egua ho nsokwadze no bi. Ɔnnyɛ adze a aberantsekwaa anaa ɔpanyin biara twa to ne fie dze gye hɔn enyi Akwa. Ahemfo nko na wɔwɔ mbɛn, na ahemfo dze hɔn nkogua na mbɛntsia bɔ hɔn abɔdzin.
Ɔhen biara wɔ abɛntsia, na ɔsor mbrɛ wosi hɛn ɔhen biara n’abɛntsia. Abɛntsia ne “ kasaa” mu tsew nwann, krɔnkrɔn mpo kyɛn akyen bi hɔn kasaa.
Asɛm a abɛntsia ka biara, anaa mbrɛ ɔhen dze n’abɛn ka biaran’ase fir mpanyinsɛm mu. Abɛntsia biara wɔdze tonton ɔhenbi anaa ɔhen bi n’egua ntsi abɛntsia bi wura nye nyimpa a obotum akyerɛ n’abɛn no ne nhɛnee ase.
