Ghana Apɔwmudzen Asoɛe no ruhu amandze wɔ anɛɛsefo na adatserfo a bu ara na wogu do rubu hɔn kɛtɛ mu kɔ aborɔkyir no. Aborɔkyir aman a Ghana anɛɛsefo na adatserfo dze hɔ ayɛ hɔn guankɔbea nye Amereka, Kanada na Ngyiresi Aborokyirman mu. Dɛm batatu yi dze ɔhaw ahorow na ɔdze brɛ Ghana apɔwmudzen asoɛe no. Ɔnam do ma aban no gye no ho biara a, ɔnngye.
Ndaansa yi, Ghana anɛɛsefo na adatserfo aborɔkyir batatu abɛgye abɔ do ara yie. Ɔnam siantsir ahorow binom do ntsi na dza ɔtse dɛm no rokɔ do no. Dɛm siantsir yi bi nye edwuma atsenae mapa a ɔwɔ aborɔkyir, edwuma mpontui a ɔwɔ aborɔkyir, abrabɔ pa a ɔwɔ aborɔkyir no na dza ɔkeka ho. Bio, abɛefor mfir ahorow a ɔwɔ aborɔkyir a ɔma apɔwmudzen edwuma no kɔ do tɔɔtsen no ka siantsir a anɛɛsefo na adatserfo aborɔkyir batatu no adɔɔ so no ho.
BBCfo hɔn nhwehwɛmu a wɔyɛɛ no afe 2022 mu fa ɔhaw yi ho no kyerɛ a, afe 2022 nko mu no, Ghana anɛɛsefo nkotsee a hɔn dodow bor apem ahaebien (1,200) na wotuu bata kɛpɛɛ edwuma wɔ aborɔkyir. Wɔtotoo binom ano no, hɔn mu dodowara na wɔdaa siantsir ahorow a mabɔ do no edzi ntsi na wotu bata a ɔtse dɛm no. Aso Ghanaman no hyɛɛ no dɛn na annkɔ no yi? Aso Ɔsagyefo Kwame Nkrumah ne Ghana no na adan ebutuw dɛ hɛmba a asorɛkye kɛse bi abɔ ebutuw no yi?
Nsunsuando bɔn pii na batatu a ɔtse dɛm yi dze ba. Sɛ ɔba no dɛm a, anɛɛsefo na adatserfo hɔn dodow do tsew na iyi dze nsunsuando bɔn brɛ ɔman no n’apɔwmudzen asoɛe no. Ɔbɛyɛ bɛyɛ no, ebɔkɔ asopitsi bi no, nna anɛɛsefo na adatserfo a wɔwɔ hɔ no suar dɛ wobotum ahwɛ ayarfo dodow bi. Sɛ ɔba no dɛ anɛɛsefo na adatserfo mpanyimfo a suahu ahyɛ hɔn ma no tutu bata kɔ aborɔkyir dɛm a, ɔman no n’asopitsi bɛdan efie a sebe, panyin biara nnyi mu.
Afei so, sɛ ɔba no dɛm a, aban no bɔ kaw kɛpem dɛ, sika a ɔdze atsetse n’anɛɛsefo na n’adatserfo no, amanaman binom na wonya ho mfaso. Sɛ ɔba no dɛm a, aban no bɔ kaw gyangyan a ɔnnyɛ adze papa a otwar dɛ ɔtsena hɔ yɛ hwɛhann ma osi. Ɔsan so dze surow na ahopopow a n’ano yɛ dzen to ɔman no do. Sɛ obi ne dehyee yar a, osiandɛ osuro dɛ anɛɛsefo na adatserfo hɔn dodow nndu beebiara no ntsi, obosuro dɛ ɔdze no bɔkɔ asopitsi ma oehu. Iyi yɛ adze a ɔbɛhaw adwen ara yie wɔ hɛn man yi mu.
Ebɛnadze ma otwar dɛ aban no yɛ fa ɔhaw a ɔtse dɛm yi ho? Otwar dɛ aban no toto apɔwmudzen edwumayɛfo hɔn akatua mu. Nnyɛ ɔno nko, otwar dɛ aban no dze nkuranhyɛ akatua nhyehyɛɛ mapa gu akwan mu ma apɔwmudzen edwumayɛfo no. Otwar dɛ aban no hwɛ siesie asopitsi ahorow no. Otwar dɛ ɔkra abaɛfor apɔwmudzen mfir ahorow a ɔma apɔwmudzen edwuma kɔ do yie no bi ba asopitsi ahorow a ɔwɔ ɔman no mu no, ama apɔwmudzen edwumayɛfo no hɔnho aayɛ hɔn hyew wɔ hɔn edwumayɛ mu. Otwar dɛ sika biara a aban dze ma apɔwmudzen edwumayɛfo esuafo no, ɔhwɛ dze ma hɔn ama aahyɛ nkorɔfo nkuran ma wɔdze hɔnho ahyɛ apɔwmudzen edwuma no mu.
Dza otwa tun no nye dɛ, otwar dɛ Ghana aban no nye aborɔkyir amanaman a Ghana apɔwmudzen edwumayɛfo bu hɔn kɛtɛ mu kɔ hɔ kɛyɛ edwuma no nya anyɛnkofa bi a ɔbɛyɛ mfaso ama hɔn nyinara. Dɛm nhyehyɛɛ yi bɔboa ma aban no mpo dze apɔwmudzen edwumayɛfo yi akɔ aborɔkyir a ɔbɔboa ma aban no enya ho mfaso ber a ɔnnkɛfa ɔhaw biara mmbrɛ no.
Ghana apɔwmudzen edwumayɛfo a wotu bata kɔ aborɔkyir no yɛ ɔhaw bi a n’ano yɛ dzen ara yie. Ber a apɔwmudzen edwumayɛfo yi rohwehwɛ asopitsi atsenae mapa ayɛ edwuma wɔ hɔ agye akatua apapa no, hɔn dodow a ɔkɔ famu no yɛ adze a ɔdze atoyɛrɛnkyɛm bɛbrɛ ɔman no n’apɔwmudzen nsɛnsɛm, nkanka nkuraase na nkuronkurow a apɔwmudzen ho nsɛnsɛm nnkɔ yie wɔ hɔ dada no. Ber edu dɛ aban no tsie n’apɔwmudzen edwumayɛfo no na ɔyɛ hɔn apɛdze ma hɔn ma ɔhaw a ɔtse dɛm no ase tu.
