Sɛ yɛka kusum/ tsetse agor a, ɔyɛ agor bi a nkan no, nna mbofra dzi dze gye hɔn enyi sua mu adze pii. Dɛm agor yi bi nye ntɛtow, ɔware, nkurobɔ, bongreesi, kaar ahorow agodzi, ehuruhuruw, piilolo, ampe, damtow, annhwɛekyir, adow kyɛkyɛɛkyɛ, kehyir, borɔsuow aber kɔɔ na dza ɔkeka ho. Agor yi gu ahorow na no mu biara wɔ su ahorow na kwan a wɔfa do dzi. Yɛwɔ agor a wɔdze ano ka asɛm bi anaa tow ndwom dze taa ekyir dzi, na yɛwɔ dza wɔmmfa ano nnka asɛm anaa mmfa nntow ndwom nndzi. Dza wɔdze ano ka asɛm bi anaa tow ndwom bi dzi no bi nye kehyir, borɔsuow aber kɔɔ, annhwɛekyir, hom mma yɛnkɔhwɛ Adwowa Ata, da bi mokɔr nwura mu, adow kyɛkyɛɛkyɛ, pempenaa na dza ɔkeka ho. Dza wɔmmfa ano nndzi anaa wɔnntow ndwom nndzi no bi nye ntɛtow, ɔware, tow-ma-montow, nkurobɔ, damtow, ehuruhuruw, ooho, mbirikatu, tam mbirikatu, anhweadan agor na dza ɔkeka ho.
Agor ahorow yi a mabobɔ do yi wɔ nkyekyɛmu ebiasa; dza mbaa nko dzi, dza mbanyin nko dzi na dza mbanyin na mbaa nyinara bɔ mu dzi. Kusum kwan do no, dza mbaa nko dzi no bi nye ampe, nkurobɔ, tam mbirikatu na adze na adze. Dza mbanyin nko dzi no bi nye kutukubɔ, mbirikatu, ntɛtow, damtow, ehuruhuruw, aprambusuna dza ɔkeka ho. Dza mbanyin na mbaa nyinara tum bɔ mu dzi no bi nye ɔware, asosɔwamba, kehyir, borɔsuow aber kɔɔ, annhwɛekyir, adow kyɛkyɛɛkyɛ, pempenaa, da bi mokɔr nwura mu na dza ɔkeka ho.
Ber a nna mbofra dze dzi agor no nye ewiaber dze rokɔ ewimbir a wɔapon skuul aba fie no. Nna mbofra taa dzi agor ahorow yi dodowara wɔ anhwea mu. Ɔno sɛ ɔyɛ fikɛse bi ekyir a, ebɔkɔ no, nna wɔaboa ano ridzi agor no fɛfɛɛfɛw. Agor ahorow no mu bi so wɔ hɔ a, anafua na nna mbofra dzi. Bi nye, aprambusu, kehyir, borɔsuow aber kɔɔ, ooho na dza ɔkeka ho. Dɛm ntsi anafua a ɔseram reyerɛw ne se fitaa gɔnn dɛ ampesi bankye no na nna mbofra dzi agor yinom. Ɔtɔɔ fa bi no mpo no, nna wotum dzi agor no aber biara na mbom, no dodow no dze, ewiaber na nna mbofra dzi dze gye hɔn enyi.
Mber rokɔ enyim kakra no, abaɛfor agor ahorow binom so bɔbɔɔ adze. Dɛm abaɛfor agor no, nna dodowara mu nsɛm yɛ Borɔfo kasa nko. Mbom nna binom so yɛ Mfantse kasa dze. Dɛm agor yi bi nye A.B., abisisi, nsamubɔ agor ahorow binom tse dɛ 2 4 6 1 1, ‘praticals’, fɛɛ maame, kebedzin, taetow, ‘Oh me?’ na dza ɔkeka ho. Ne nyinara no, mbanyin tum dzi na mbaa so tum dzi, na mbom, mbaa na nna wɔtɔ dzi agor ahorow yi mu dodowara.
Agor ahorow nyinara, dɛ ɔyɛ kusum dze o, sɛ ndɛmbafo dze o, ne nyinara mfaso ahorow wɔ mu. Dza ɔka do yi nye no mu bi:
1. Ɔdze enyigye ba.
2. Ɔdze ɔdɔ ba.
3. Ɔda hɛn kusum amambra edzi.
4. Ɔma mbofra adwen mu bue.
5. Ɔma mbofra ano tsew.
6. Agor binom wɔ hɔ a, no mu nsɛm kyerɛ hɛn abakɔsɛm.
7. Agor binom da abrabɔ pa ho susudua edzi kyerɛ mbofra.
8. Agor dze nkabɔmu ba.
Agor ahorow a mabɔ do yi, hendze na wo kɔn adɔ a inya bi a ibedzi? Kyerɛ w’adwen wɔ hɛn sohyial midia prama ahorow no do.
