Nigeria aban no agye ato mu dɛ wɔdze honankasa hɔn kasaa bɛkyerɛ adze fitsi mangow kor dze kesi mangow nsia. Hɔn kasaa no bɛyɛ kasa a akyerɛkyerɛfo dze bɛkyerɛkyerɛ nsɛm mu akyerɛ esuafo ɔmmfa ho nwomasua pɔkyee a wobosua. Nigeria aban no gyee kasa mbra a ɔtse dɛm yi too mu ber a hɔn manpayin Muhammadu Buhari nye n’apamfo yɛɛ abankɛse nhyiamu a ɔkɔr do wɔ n’asoɛe a ɔwɔ Abuja Wukuda Ɔberɛfɛw 30, 2022.
Kasa mbra a aban no agye ato mu no bɛma honankasa hɔn kasaa no ayɛ nhyɛ ketsee a akyerɛkyerɛfo dze bɛkyerɛkyerɛ nsɛm mu akyerɛ esuafo a wɔwɔ mangow kor kesi mangow nsia. Hɔn soɛefo a ɔhwɛ nwomasua nsɛnsɛm do a wɔfrɛ no Adamu Adamu na ɔdze asɛm yi too nsɛnkyerɛwfo enyim. Asɛm a Adamu Adamu dze too nsɛnkyerɛwfo enyim no nye dɛ, ɔwɔ mu dɛ mbra a ɔtse dɛm yi bɛyɛ dzen dze, naaso aban no ahyɛ dɛ mangow kor kesi mangow nsia nko na akyerɛkyerɛfo dze honankasa hɔn kasaa no bɛyɛ nkyerɛkyerɛmu kasa wɔ hɔn skuul ahorow nyinara mu. Ɔwɔɔw do kyerɛkyerɛɛ mu dɛ, sɛ esuafo du mbofra nsɔwdo skuul (JHS) dze a, wɔdze Borofo kasa no bɔfora hɔn dze no na wɔdze ayɛ nkyerɛkyerɛmu kasa ama hɔn amma Borɔfo kasa no annyew korakoraa. Owura Adamu san so kyerɛɛ mu dɛ, kasa a borɔn biara ka no na wɔdze bɛyɛ nkyerɛkyerɛmu kasa akyerɛ adze wɔ skuul. Ɔkyerɛɛ mu bio dɛ, ɔwɔ mu dɛ kasa mbra a ɔtse dɛm yi ahyɛ ase ridzi dwuma dze, naaso ber a aban no dze akyerɛkyerɛfo a woenya ntsetsee mapa na nwomasuadze a ɔfata bɛba no na mbra no bedzi mu papaapa wɔ hɔn skuul ahorow mu.
Nnyɛ nsɛm yi nko na Adamu Adamu dze too gua. Ɔwɔɔw do kaa iyi so dze sɔɔw do: “Yɛahwer ndzɛmba pii ɔnam hɛn kasaa a ɔrehera no ntsi. Aban no ahyɛ dɛ ɔbɔhwɛ ma hɛn amambra no akɔ do araa awɔ hɔ”. Ɔkyerɛɛ mu bio dɛ Nigeria kasa nyinara yɛ kor na wɔdze enyidze bɛma no mu biara dɛ mbrɛ ɔsɛ.
Nigeria man no wɔ kasahorow nkorkor aha nsia na eduonu enum (625). Ɔyɛ aban n’enyidoadzehu dɛ ɔbɔhwɛ ma obiara n’amambra etu mpon na sɛ amambra botu mpon a, ne tsitsir gyina hɔn kasaa do no ntsi na aban no dze kasa mbra a ɔtse dɛm yi abɔbɔ adze no. Amadu Amadu ne nsɛm nyinara mu no, dza ɔkaa no kɛse kɛse araa nye dɛ mbra no bɛyɛ dzen ahyɛse no na mbom mber rokɔ enyim no, ɔwɔ awerɛhyɛmu dɛ biribiara bɔkɔ yie.
