Afe biara mu no, ɔyɛ mbra ma aban a ɔwɔ do no dɛ ɔdze ne sikasɛm nhyehyɛɛ a ɔhwɛ kwan dɛ ɔdze bedzi dwuma wɔ afe a ɔwɔ enyim no ba mbrahyɛbaguafie ma mbrahyɛbaguafo no yɛ mu mpɛnsampɛnsamu na wɔgye to mu ana afe no so a woetum dze nhyehyɛɛ a ɔtse dɛm no egu akwan mu. Soɛfo a ɔhwɛ Sikasɛm do no dze Afe fofor no ne Sikasɛm Nhyehyɛɛ no bɔto, mbrahyɛbaguafo no pɛnsapɛnsa mu yɛ nsesa biara ohia wɔ mu, na wɔtow do amba gye to mu dɛ wɔmfa nyɛ edwuma no mbrɛ ɔsɛ mu.
Mfe abɛsen no, annyɛ koraa no, aban a ɔwɔ do no ne mbrahyɛbaguafo wɔtaa yɛ dɔmkɛse no ba mbrahyɛbaguafie bɛkasa ma nhyehyɛɛ a hɔn aban dze roto gua. Wɔnam iyi ho ba mbrahyɛbaguafie wɔ hɔn dodow mu. Afe yi dze, nnyɛ dɛm tsebea yi na yehu wɔ mbrahyɛbaguafie hɔ. Dɔmkɛse no mu mba kumaabi na wɔkɔ mbrahyɛbaguafie hɔ kɔhwɛ dɛ dwumadzi a no ho hia dɛm yi rokɔ do. Dɔmkumaa no mba wɔba no dɔɔ so kyɛn dɔmkɛse no mu dze no.
Ber a mbrahyɛbaguafo hyiae wɔ mbrahyɛbaguafie wɔ dɛm dwumadzi ho wɔ Ɔberɛfɛw 30, 2022 mu no, Dɔmkumaa no mu mba a wɔwɔ fie no mu hɔ no dze hɔn ayawdzi too gua booboo tsebea yi ho dɛ ɔnnyɛ dza ɔsɔ enyi. Abooboodzi no mu na Okunyin Ato Forson, Ajumako Enyan Essiam mbrahyɛbaguanyi no, dze too gua dɛ dɛm tsebea wohu wɔ mbrahyɛbaguafie hɔ kyerɛ dɔmkɛse ahwer enyidado wɔ hɔn aban no na ne Sikasɛm Nhyehyɛɛ no mu, na wɔapow hɔnara hɔn Sikasɛm Nhyehyɛɛ a wɔdze aba dɛ wɔmpen do mma hɔn ma wɔmfa nyɛ edwuma wɔ afe 2023 mu.
“Owura Ɔkasafo, fie ha tsebea yi kyerɛ wo mbrɛ ɔman no ahwer enyidado. Owura Ɔkasafo, tsebea ɔwɔ akwan no do kyerɛ wo mbrɛ ɔmanmu no nyina ahwer enyidado. Ɔnnyɛ nwanwa dɛ dɔmkɛse no apa hɔnankasa hɔn Sikasɛm Nhyehyɛɛ.”. Okunyin Ato Forson dze too gua dɛm wɔ mbrahyɛbaguafie hɔ.
Ɔdze too gua wɔ n’abooboodzi no mu dɛ ɔwɔ wogyaa dɛ Soɛfo dze ne Sikasɛm Nhyehyɛɛ bɛba mbrahyɛbaguafie dɛ wɔmpɛnsapɛnsa mu na wɔmpen do mma no, na obenya hɔ a ɔnkɔkɔ eketsie adwenkyerɛ ahorow ɔbɛba ho no.
“…Onnyi dɛ Asoɛfo a wɔhwɛ Sikasɛm do no hɔn ndzeyɛɛ dɛ wɔdze sikasɛm nhyehyɛɛ bɔto gua na wɔmmba mmbɛgye no ho adwentoatoa no wɔsosɔw do. Ɔreyɛ abor do wɔ dɛm Soɛfo (Ken Ofori-Atta) yi afa mu. Owura Ɔkasafo, Irunntum mmfa Sikasɛm Nhyehyɛɛ mmba mbrahyɛbaguafie na iwie a etu kwan akɔ aborɔkyir anaa akɛhyɛ w’atsenae. Ɔwɔ dɛ ɔba ana yɛahyɛ ase.”. Okunyin Ato Forson dze asɛm yi too gua dze foa Dɔmkumaa no hɔn tsentsenfo n’abedziekyir, Owura Ahmed Ibrahim, n’asɛm, dɛ ɔwɔ dɛ Soɛfo a ɔhwɛ Sikasɛm do no ba mbrahyɛbaguafie ana wɔahyɛ hɔn dwumadzi no ase no do.
