Amanaman Mfunuma Kasa Da yɛ da a wiadze nyinara dze esi hɔ ama kasa a wɔdze twaa obi no funuma anaa kasa a wɔwoo obi too mu. Wiadze n’afɛndzeanan nyinara dzi dɛm da yi Kwakwar 21 afe biara. Dwumadzi yi taa kɔ do wɔ Simpa Suapɔn no nkorbata a wɔhwɛ Ghana kasa horow do a ɔwɔ Edwumako naaso afe yi dze no dze, annkɔ do wɔ hɔ. Afe 2023 Finimfin Mantɔw mu Mfunuma Kasa Da no kɔr do wɔ Mando Mpanyin Nsɔwdo Skuul a ɔwɔ Edwumako Enyan Essiam Mansin no mu. Tsirasɛm a nna ɔda dwumadzi yi do nye “Nwomasua a wɔma no Kasahorow mu- adzehia a ɔbɔboa etu hɛn nwomasua mpon”. Mpanyimfo na etsitsir binom dze hɔn enyimyam bɛtaa ekyir ma ɔyɛɛ krabɔhwɛ.
‘Young Writers Foundation Ghana’ nye Asoɛe a Wɔhwɛ Ghana Nwomasua do na Asoɛe a wɔhwɛ Ghana Kasahorow do bɔɔ mu dzii dwuma no wɔ Mando Mpanyin Nsɔwdo Skuul hɔn nhyiamubea kɛse hɔ ma dwumadzi no kɔr do fɛfɛɛfɛw. Dwumadzi no hyɛɛ ase anapa ndɔndu kesi ewiaber ndɔnebien. Mpanyimfo na etsitsir na wɔdze hɔn enyimnyam bɛtaa dwumadzi no ekyir. Mpanyimfo yinom mu bi nye Ɔbemfo Charles Owu-Ewie, Ɔpanyin Kwankyerɛfo a ɔhwɛ nwomasua nsɛnsɛm do ma Edwumako Enyan Essiam Mansin no, Ɔpanyin a ɔda Asoɛe a Wɔhwɛ Ghana Kasahorow do , Ɔpanyin a ɔda Young Writers Foundation Ghana ano, Mandohen, akyerɛkyerɛfo mpanyimfo, akyerɛkyerɛfo, mpanyimfo binom a wɔka ho na esuafo a wofi Edwumako na no nkwaado a hɔn dodow bor ahaebiasa.
Dwumadzi no rebɛhyɛ ase no, ahɔho na mpanyimfo binom a wɔtoo nsa frɛɛ hɔn no dzii kan baa nkorkor. Iyinom bi nye nkan no Simpa Suapɔn no nkorbata a wɔhwɛ Ghana Kasahorow do hɔn panyin a nna ɔhwɛ esuafo nsɛnsɛm do a wɔfrɛ no Ɔbemfo Charles Owu-Ewie, Kwankyerɛfo Panyin a ɔhwɛ nwomasua nsɛnsɛm do wɔ AEED a ne dzin dze Owurayer Sabina Aba Wilson, Kwankyerɛfo Panyin n’abedziekyir ma Asɔɛe a wɔhwɛ Ghana Kasahorow do a wɔfrɛ no Owura Enoch A. Adibuer na nkan no guamutsenanyi ma Asɔɛe a wɔhwɛ Nsɛnkyerɛw edwuma do na nkan no ‘Ghana Association of Writers’ hɔn panyin Nana Kwesi Gyan-Apenteng na etsitsir binom a wɔka ho.
Agodzifo a wofi skuul ahorow mu gyegyee ahɔho no enyi na esuafo no bi so dzii agor na binom so bɔtoow awensɛm. Afei, wɔdaa guamutsenanyi ma dwumadzi no edzi. Nna guamutsenanyi no nye Ɔbemfo Charles Owu-Ewie a nna nkan no ɔno na nna ɔhwɛ esuafo nsɛnsɛm do wɔ Simpa Suapɔn no nkorbata a wɔhwɛ Ghana Kasahorow do wɔ Edwumako. Ɔdze n’anodzisɛm roto gua no, ɔkasae faa mfaso a ɔwɔ Ghana kasahorow no nsuae ho na ɔhyɛɛ esuafo nkuran dɛ wɔmbɔ mbɔdzen nsua honankasa hɔn kasaa wɔ skuul.
Ɔbemfo dze n’anodzisɛm too gua no, suanyi bi bɔtoo Mfantse awensɛm na Owura Evans Gyenne-Mensah a ɔno nye Ɔpanyin a ɔhwɛ mbuukuu ne ntsintsimii na no mpuei nsɛnsɛm do ma Asoɛe a wɔhwɛ Ghana Kasahorow do dze n’anodzisɛm too gua. Ɔkasae faa Mfunuma Kasa Da no n’abakɔsɛm ho. Ɔkasae wiei no, mpanyimfo maa Bolingo Consult kwan ma Ebenezer Kobinah Offen a ɔkyerɛw Mfantse kasee ma akannews.com bɛkasae faa akannews.com n’ahyɛse ho na siantsir a ɔaba dɛ ɔrebɛtsena no ho. Owiei no, agodzi ahorow na awensɛm no ntowee so kɔr do.
Nana Kwesi Gyan-Apenteng ne kasaa mu no, ɔkasae faa hia a ohia dɛ yɛyɛ Ghanamba yi, yɛdze hɛnankasa hɛn kasaa bedzi dwuma wɔ hɛn skuul ahorow mu, hɛn mbrahyɛbaguafie, nsɛnkyerɛw edwumayɛ mu na nhyiamu ahorow mu. N’enyi gyee ber a ɔtsee dɛ Bolingo Consultfo ahyɛ Akan kasee ne nkyerɛwee ase wɔ ntanɛtse do no na ɔbɔɔ hɔn abaw do na ɔhyɛɛ hɔn nkuran dɛ wɔmfa Ghana kasa nkaa no nka ho bi.
Dwumadzi no ne kyeame a ɔyɛ Edwumako Borɔfoyɛdur Skuul hɔn kyerɛkyerɛnyi panyin a wɔfrɛ no Owura Sylvester Ofosu dzii dɔm enyim gyegyee ntoboa na Okunyin G.F. Kojo Arthur a ɔyɛ Kwankyerɛfo Panyin ma ‘Centre For Indigenous Knowledge Systems’ no dze n’anodzisɛm bɔtoo gua. Ɔkasae faa tsirasɛm a ɔyɛ ‘Abɔdze’ ho. Dwumadzi no ase ara na wɔpaa Mbofra Nsɔwdo Skuul Abɔtsirmu Akyerɛw Kuw ho tam.
Ɔdze ne nsɛm reba ewiei no, guamutsenanyi Ɔbemfo Charles Owu-Ewie sanee sii hia a ohia dɛ yɛdze hɛn kasaa a wɔdze twaa hɛn funuma bɛkyerɛ hɛn nyimpaban no do bio. Ɔsɔfo a ber no nna mpaabɔ hyɛ ne nsa no bɔɔ mpaa dze dwumadzi no nyinara kɔr n’ewiei.
Afe 2023 Amanaman Mfunuma Kasa Da a ɔkɔr do wɔ Mando SHTS yɛ dwumadzi bi a Young Writers Foundation Ghana nye Asoɛe a wɔhwɛ Ghana Nwomasua do na Asoɛe a wɔhwɛ Ghana Kasahorow do kaa hɔn tsir bɔɔ mu yɛe ma biribiara wiee asomdwee na konyimdzi mu.
