Yɛnim apofofoɔ sɛ wɔyɛ adwumayɛfoɔ a wɔn nnwuma ho hia yie pa ara wɔ nnipa asetena mu. Anyɛ yie koraa no, nsuonam ahodoɔ a yɛdi no dwa so no mu fa dodoɔ no ara firi apofofoɔ a wɔwɔ ɔman yi mu no hɔ.
Mmom, ɛsiane sɛdeɛ asetenam ayɛ den ama nnoɔma boɔ ahuri kɔ soro nansa yi nti, ama fangoo a apofofoɔ de yɛ adwuma no ho ayɛna pa ara. Yei nam so ama nnipa a wɔkɔ po no mu dodoɔ no ara de wɔn mfidie apɛ baabi asi. Wɔn mu kakraa bi a wɔrebɔ wɔn ho mmɔden sɛ wɔbɛfa akwannuasa so ayɛ adwuma sɛdeɛ wɔn nsa bɛkɔ wɔn ano no nso mfa no ahogono so koraa.
Wɔkyerɛ mu a, bɛyɛ abosome nan nie na fangoo a wɔde gu wɔn hyɛmma mu kɔ ɛpo no ho firii aseɛ yɛɛ den wɔ ɔman yi mu. Wɔreka deɛ nti a aba no saa no, wɔkaa sɛ adwumakuo a wɔkɔfa fangoo yi ba ɔman yi mu no de aka pii a aban no ntumi ntuaeɛ, na ɛno nti na ama wɔntumi nkɔfa fangoo no bio mma na wɔanya bi atɔ no.
Wɔn mu kakraa bi a wɔtumi kɔ po so no kyerɛ sɛ, ɔkwan a wɔfa so ne sɛ, wɔde nsuo fra patro de gu wɔn hyɛmma no mu ansa na wɔatumi ayɛ no nkakrankakra akɔ aba.
Dodoɔ a wɔde wɔn mfidie asisi hɔ apɛ wɔn baabi atena no nso kyerɛ sɛ, ɛmfa ho sɛ fangoo no boɔ ahuri kɔ soro nyinaa akyi no, anka wɔayɛ krado sɛ wɔbɛtɔ bi saa ara akɔ adwuma nanso wɔkuta wɔn sika mpo a, wɔnnya bi ntɔ.
Yei ama Ghana Apofofoɔ nkabom kuo no de wɔn nsɛm abɛto dwa rekyerɛ sɛdeɛ fangoo a ɛho akɔ atwee no resɛe wɔn nnwuma nnansa yi.
Berɛ a wɔn twerɛtwerɛfoɔ panin, Owura Richster Nii Amarh Amarfio rekyerɛ nsɛm yi mu no, ɔkaa sɛ tebea a apofofoɔ refa mu seesei no yɛ deɛ ɛde asodie abɛto wɔn so pa ara, na ama wɔn ho yera wɔn a wɔnhunu deɛ wɔnyɛ wɔn ho.
Afei, Ghana Apofofoɔ nkabom kuo no de too aban no anim sɛ, wɔmmɔ mmɔden sɛ wɔbɛtumi aboa ama wɔn nsa aka fangoo no bi anim anim yi ara sɛdeɛ ɛbɛyɛ a sɛ ɛduru berɛ a wɔyi nam pii no a, wɔbɛtumi anya bi ayɛ adwuma sɛdeɛ ɛsɛ.
Nsɛm bi a ekuo no de too dwa mu no, wɔkaa sɛ, wɔgye tom sɛ fangoo boɔ ayɛ den wɔ ɔman yi mu baabiara deɛ, nanso ɛsɛ sɛ aban no hunu sɛ ɛpokorɔ adwuma no nte sɛ nnwuma nkaeɛ no a wɔtumi yɛ no berɛ biara no. Mmom, ɛyɛ adwuma a wɔyɛ no berɛ pɔtee bi mu. Yei nti, ɛsɛ sɛ wɔtumi boa ma wɔnya fangoo no bi saa berɛ yi ara sɛdeɛ berɛ a wɔbɛtumi de akɔ po no mpa wɔn tiri so. Wɔde toaa so sɛ, wɔgye sɛ, sɛ aban no tumi yɛ saa a, ɛbɛboa ama wɔabɔ wɔn nnwuma ho ban na ansɛe nnwuma pa a wɔdi de boa ɔman no nkɔsoɔ no.
