Ɛfiri tete na Akanfoɔ nam wɔn nimdeɛ ne nyansakwan ahodoɔ so ate abɛ so nsa abɛsi sɛsɛɛ. Yɛn nananom berɛ so no, na ɔbɛtwani animuonyam te sɛ ɔhene ɛfiri sɛ, Akanfoɔ astena nyinaa mu no, nsa yɛ biribi a wɔntoto no ase koraa.
Wɔde nsa di dwuma wɔ Akanfoɔ amammerɛ nyinaa mu. Awerɛhoɔ berɛm o, anigyeɛ berɛm o, Akanfoɔ de nsa di dwuma. Ɛno nti na mpanimfoɔ kaa asɛm bi too hɔ sɛ, “Aketetwia ho nyɛ akɔnnɔ nanso sɛ mpanimfoɔ hyia mu a, na ɔsi wɔn mfimfini.”
Nsa a Akanfoɔ nya firi abɛ mu no na wɔfrɛ no nsafufuo. Ɛno da nkyɛn a, wɔwɔ nsa bi a wɔfrɛ no doka. Ɛno nso wɔnya firi adobɛ mu. Saa nsa mmienu yinom mu na wɔtumi noa, sɔne so, bɛnya apɛtɛsi. Ansa na aborɔsa ahodoɔ te sɛ senaapo ne deɛ ɛkeka ho rebɛpue Akanman mu no, na yɛn nananom de nsafufuo, doka ne apɛtɛsi yɛ wɔn biribiara.
Mmerɛ ahodoɔ binom a Akanfoɔ de nsa di dwuma ne awaregyeɛ berɛm, ayiyɔ mu, awaregyaeɛ mu, abadintoɔ mu, bragorɔ mu, kyiribra mu, afahyɛ berɛm, ahensie ne ahentuo mu, ne deɛ ɛkeka ho.
Sɛdeɛ nsafufuo di akotene wɔ Akanfoɔ asetenam nti, ɛnnɛ, yɛrebɛhwɛ mfasoɔ binom a sɛ obi nom nsafufuo a ɔnya firi mu.
Vaetamɛn C ahyɛ nsafufuo mu ma
Animdefoɔ kyerɛ sɛ, ahoɔdennuro Vaetamɛn C ahyɛ nsafuo mu ma. Saa Vaetamɛn C yi wɔ nipadua no mu a, ɛboa ma nkwammoa a ɛwɔ yɛn mu no tumi ko tia nyarewa ahodoɔ ma yɛnya apɔmuden pa. Afei nso, ɛbɔ nipadua no ho ban firi nsaayareɛ ahodoɔ binom ho.
Vaetamɛn A a ɛwɔ nsafufuo mu no dɔɔso pa ara
Vaetamɛn A nso yɛ ahoɔdennuro foforɔ a ahyɛ nsafufuo mu ma. Ɛno na ɛboa ma onipa aniwa tumi hunu adeɛ yie, na ɛsane nso bɔ yɛn ani ho ban firi nyarewa binom a ɛbɛtumi asɛe yɛn ani no ho.
Vaetamɛn B nso ahyɛ nsafufuo mu ma
Nhwehwɛmufoɔ de ato dwa sɛ, Vaetamɛn B pii wɔ nsafufuo mu. Wɔka Vaetamɛn B ho asɛm sɛ, ɛboa ma yɛnya ahoɔden a nipadua no hia firi nnuane ahodoɔ a yɛdi no mu.
Vaetamɛn E wɔ nsafufuo mu pa ara
Vaetamɛn E a ɛwɔ nsafufuo mu no dɔɔso yie pa ara. Animdefoɔ kyerɛ sɛ, saa Vaetamɛn E no na ɛbɔ onipa honam ho ban firi honam ani nyarewa binom ho. Afei, ɛsane boa ma onipa honam ani yɛ fɛ.
Potasium bebree wɔ nsafufuo mu
Ahoɔdennuro foforɔ a ahyɛ nsafufuo mu ma ne potasium. Potasium yi boa ma onipa akoma tumi yɛ adwuma yie, na ɛma mogya nso di aforosiane wɔ yɛn ntini mu wɔ ɔkwan a ɛfata so.
Magnisium nso ahyɛ nsafufuo mu ma
Magnisium dwuma a ɛdi wɔ nipadua no mu ne sɛ, ɛboa ma yɛn nnompe mu yɛ den, na ɛbɔ yɛn ho ban firi nnompe mu nyarewa ahodoɔ no ho.
Kalsuim bebree wɔ nsafufuo mu
Kalsium boa ma onipa nnompe ne ne nse mu yɛ den yie pa ara. Ɛno nti, sɛ kalsium a ɛwɔ wo nipadua mu no nnɔɔso a, ɛbɛtumi ama woanya nnompe mu nyarewa anaa kaka.
Nsafufuo tumi boa ma ahobene ano berɛ ase
Animdefoɔ kyerɛ sɛ, mfasoɔ foforɔ a yɛnya firi nsafufuo mu ne sɛ, sɛ wonom na wo ho abene a, ɛtumi boa ma yareɛ no ano berɛ ase koraa. Deɛ nti a wɔreka saa ne sɛ, ahoɔdennuro bi wɔ nsafufuo mu a wɔfrɛ no pirogallol, na ɛno na ɛko tia ahobene a ɛba yɛn nipadua mu no.
Nsafufuo boa ma nnuane tumi yam yie wɔ yɛn yafunu mu
Nhwehwɛmufoɔ kyerɛ sɛ, ɔkwan foforɔ a nsafufuo fa so boa yɛn nipadua no ne sɛ, ɛboa ma nnuane tumi yam yie wɔ yɛn mu. Wɔkyerɛ sɛ, ahoɔdennuro bi a wɔfrɛ no pɛktin wɔ nsafufuo mu. Wɔkɔ so kyerɛ mu sɛ, pɛktin no na ɛtwetwe nsuo ne nneɛma bi firi yɛn nsono mu sɛdeɛ ɛbɛyɛ a nnuane a yɛdi no bɛtumi ayam yie. Ne saa nti, sɛ obi yam tim na ɔnom nsafufuo a, ɛbɛtumi aboa ama watumi ayi ne yam yie.
Ɛboa ma yɛn apɔmuden di mu
Vaetamɛn C a ɛwɔ nsafufuo mu a yɛadi kan aka ho asɛm no boa ma onipa akwaa ahodoɔ no tumi yɛ adwuma yie. Afei nso, ɛma yɛn nkwammoa tumi nya ahoɔden ko tia nyarewa ahodoɔ sɛdeɛ ɛbɛyɛ a yɛn apɔmuden bɛtumi adi mu.
Nsafufuo tumi sa atiridii yareɛ
Animdefoɔ de ato dwa sɛ, nsafufuo ho mfasoɔ titire baako pa ara ne sɛ, ɛtumi tu atiridii yareɛ no ase. Wɔka sɛ, ahoɔdennuro bi a wɔfrɛ no quinine ahyɛ nsafufuo ma, na ɛno na ɛboa ko tia atiridii yareɛ wɔ nipadua no mu.
Ɛtumi ma ayamtuo twa
Obi nya ayamtuo na ɔnom nsafufuo a, ɛtumi boa no pa ara. Animdefoɔ kyerɛ sɛ, ahoɔdennuro bi a wɔfrɛ no tannin wɔ nsafufuo mu, na ɛtumi boa ma onipa yafunu mu yɛ den wɔ ɔkwan a ɛfata so sɛdeɛ ɛbɛyɛ yɛn yafunu mu renhwie.
Ɛtumi sa borɔmpete
Borɔpete yɛ yareɛ bi a ne ho yɛ ahomete yie pa ara. Ɛgugu wo honam ani a, ɛtumi yɛ hene nanso sɛ wotiti mu nso a, na ɛyɛ wo ya. Nhwehwɛmufoɔ kyerɛ sɛ, sɛ borɔmpete gugu obi honam ani na ɔnom nsafufuo a, ɛtumi boa ma yareɛ no ase hye koraa. Deɛ nti a ɛte saa ne sɛ, wɔka sɛ ahoɔdennuro bi a wɔfrɛ no saponin wɔ nsafufuo mu a ɛtumi ko tia borɔmpete ne nsaayareɛ afoforɔ binom.
Nsafufuo so mfasoɔ a yɛabobɔ so yinom nyinaa da nkyɛn a, animdefoɔ kyerɛ sɛ ɛnyɛ papa sɛ wobɛnom nsafufuo pii ama no aboro so. Wɔkyerɛ sɛ, sɛ wonom nsafufuo ma no boro so a, ɛbɛtumi de ɔhaw ahodoɔ a ɛdidi so yinom abrɛ wo:
- anisobiri
- tipaeɛ
- abofono
- ayamtuo
- yafunukeka
- wobɛtumi nso afe bebree
Afei nso, nnuro binom wɔ hɔ a, sɛ worenom na wosan nom nsafufuo ka ho a, ɛbɛtumi apira wo. Yei nti, ɛbɛyɛ papa sɛ, sɛ worenom aduro bi a, wobɛdi kan abisa wo dɔkota ansa na wode nsafufuo aka w’ano.
Hyɛ no nso sɛ, nsɛm yi nyinaa yɛ adesua nsɛm ara kɛkɛ. Ɛnna nsafufuo nso nyɛ aduro. Ne saa nti, sɛ wo ho mfa wo a, kɔ ayaresabea ma wɔhwɛ wo.
