Tete no, na aduane baako a yɛn nananom taa di pa ara ne mmire. Yei nti, na wɔde mmire yɛ nkwan ahodoɔ bebree. Ɛtɔ da mpo a, na ɛnam a ɛda wɔn nnuane so ara ne mmire ne kɔtɔ.
Akwan a na wɔfa so de mmire yɛ nkwan no dɔɔso. Wɔtumi hohoro mmire no ho de gu nkwan no mu saa ara, anaa wɔtoto ho kakra ansa na wɔde agu nkwan no mu. Ebinom nso tumi twi no ayowa mu tete gu nkwan no mu. Sɛdeɛ na wɔyɛ no biara, deɛ na wɔpɛ ara ne sɛ wɔde mmire bɛyɛ nkwan adi.
Ɛsiane dwuma titire a na mmire di wɔ wɔn asetenam nti, wɔkɔ afuom a na wɔde mmire ba fie te sɛ deɛ ɔbɔfoɔ akɔ wuram de ɛnam aba fie no ara pɛ.
Mmire ahodoɔ a na wɔdi no binom ne dommo, sibire, nkankom ne asaseɛ. Dommo fifiri abɛ dua a awuo ho, sibire fifiri esie ho(Ɛno nti na wɔbuu bɛ bi sɛ, : “Sɛ wotu mmire a na woakyerɛ sie” no), nkankom fifiri asase kesee so, ɛnna asaseɛ nso fifiri dufɔkyeɛ ho.
Abakɔsɛm kyerɛ sɛ, ogyahyehyeɛ bi sii tete no maa mmire ho kɔɔ atwee kakra. Ɛno nti, na ɛyɛ den sɛ wɔbɛnya bi ayɛ nkwan adi. Deɛ wannya nam a ɔbɛdi tuku saa berɛ no, na n’aduane nka se ɛfiri sɛ, na wɔnnya mmire nyɛ nkwan.
Saa beɛ no ara mu nso, na Alatani bi a wɔfrɛ no Agya Nkonto abɛtena Akanman mu mfeɛ pii reyɛ kua. Ɛsiane sɛ, sɛ nnipa nyinaa redane mmoa a ɛsɛ sɛ wodane bi nti, Agya Nkonto suaa sɛdeɛ wɔdi mmire maa n’ani bɛgyee ho pa ara. Ɛno nti mmire ho yɛɛna saa no, ɛhaa no yie.
Da koro bi a Agya Nkonto kɔɔ wiram no, ɔkɔtoo sɛ na wansane binom rewe ne mankani so wura nyinaa. N’ani bɔɔ wɔn so saa no, ɔpɛɛ baabi tetɛeɛ ɛnna ɔhwɛɛ mmoa no dinn. Ɔhyɛ hɔ no ara na ɔbɔɔ wa mpofirem maa mmoa no tee ne nka dwane kɔeɛ.
Afei, Agya Nkonto yɛɛ n’adwene sɛ, ɛsiane sɛ mmoa adi ne mankani so wura na biribiara anyɛ wɔn nti, ɔno nso bɛtete bi akɔyɛ nkwan sɛdeɛ na ɔde mmire yɛ nkwan no ara pɛ. Yei nti ɔtetee mankani nwura no bi guu ne bɔtɔ mu de baa fie bɛyɛɛ nkwan. Berɛ a ɔreyɛ aduane no, nkwan no hwa tu faa efie hɔ nyinaa maa n’afipamfoɔ no kaa sɛ, sɛ ɔwie nkwan no a, ɔmma wɔn bi nkwa nhwɛ maa ɔno nso gyee pene.
Ɔwiee nkwan no, ɔde ɔseɛ yɛɛ ɔyɔ maa n’afipamfoɔ no bi ka hwɛeɛ. Berɛ a wɔn nyinaa dii nkwan no bi hunuu sɛdeɛ ɛyɛ dɛ fa no, wɔbisaa no deɛ ɔde yɛɛ nkwan no maa no kyerɛɛ wɔn.
Afei, adeɛ kyeɛe a wɔkɔɔ afuom no, n’afipamfoɔ no nyinaa tetee wɔn mankani so ahaban no bi baa fie de bɛyɛɛ nkwan. Nkwan no yɛɛ wɔn dɛ ara maa wɔbɔɔ ahaban no dawuro kyerɛɛ kuro no mufoɔ nyinaa. Wɔkyerɛɛ mu kyerɛɛ ɔmanfoɔ no sɛ, ɛyɛ Agya Nkonto na wakɔfa ahaban yi de abɛsi mmire anan mu.
Yei maa kuro mma no nyinaa yɛɛ sɛ, wɔde Agya Nkonto din bɛto mmire foforɔ a wɔanya no so. Ɛno nti ɛfiri saa berɛ no, wɔfirii aseɛ frɛɛ mankani ahaban no sɛ ‘Agya-Nkonto-mmire.’ Ɛno ara na ɛdidi mu a ɛmaa yɛbɛnyaa edin “Nkontommire” no.
Hyɛ no nso, nsɛm yi nyinaa yɛ bɔserɛmka. Enti sɛ ɛne biribi a wonim dada anhyia a, hunu sɛ ɛnyɛ abakɔsɛm a wɔahyɛda atwerɛ ato hɔ.
