Nsrahwɛbea ahodoɔ a ɛwɔ Asante Mantam mu no ara na yɛgu so resua ho adeɛ no. Yɛadi kan ahwɛ kente abakɔsɛm kakra wɔ Bonwire Kentenwonobea, Ɔfa 1 no mu. Deɛ ɛtɔ so mmienu yi mu deɛ, yɛrebɛhwɛ kente mu adwinI ahodoɔ binom ne deɛ ɛmu biara gyina hɔ ma. Kenkan no yie na hyɛ mu mfoni no nso, na woatumi ahyɛ no nso asane akyerɛ kente pɔtee bi ne deɛ ɛgyina hɔ ma berɛ a wobɛhunu bi no.
Megye di sɛ berɛ rekɔ n’anim yi deɛ, yɛbɛtumi ahunu adwini ahodoɔ bebree wɔ kente ahodoɔ mu. Berɛ biara a yɛbɛnya kwan akɔ Bonwire Kentenwonobea hɔ no, yɛbɛtumi ahunu kente no mu ahodoɔ a yɛrebɛhwɛ no seesei ara ne afoforɔ pii nso ɛka ho, ne kwan a wɔfa so yɛ no. Momma yɛntoa so nsua adeɛ kakra ɛ!
1. Adwinasa
Mpanimfoɔ kyerɛ sɛ deɛ ɔde saa kente yi baeɛ no pɛɛ sɛ ɔnwono ntoma soronko bi de ma Asantehene. Ɔbɔɔ ne ho mmɔden kaa adwinneɛ ahodoɔ a na adwinifoɔ nim no saa berɛ no mu nyinaa bɔɔ mu de nwonoo ntoma. Ne dwumadie no mu ara na ɔdaa no adi sɛ adwinneɛ asa, ɛsiane sɛ adwinneɛ a na Asantefoɔ nim no nyinaa na na ɔde adi dwuma no. Asɛm a ɔkaeɛ no na wɔde too ntoma no so sɛ “Adwinasa”. Hyɛ a wɔhyɛɛ da nwono maa Asantehene no ankasa da nkyɛn a, ɛyɛ ntoma a animuonyamhyɛ wɔ mu, na wɔhunu no sɛ ɛyɛ papa yie. Kane no, na ahemfo ne wɔn a wɔn dibea wɔ soro ne asikafoɔ na fira saa kente yi. Ɛgyina hɔ ma sika, ɔdehyeɛ, pɛyɛ ne tumi.
2. Ɔbaakofoɔ Mmu Ɔman.
Saa kente yi kasa fa sɛdeɛ Akanfoɔ amammuo yɛ ka bi ma menka bi no ho. Ahinanan nkron no gyina hɔ ma Mpuankron, dwuma bi a na wɔdi de yi adehyeɛ binom a na wɔboa akannifoɔ ma wɔsi gyinaeɛ no ti. Ahyɛaseɛ no ankasa deɛ, na wɔfrɛ saa ntoma yi sɛ Fatia fata Nkrumah. Saa kente yi gyina hɔ ma Ka bi ma menka bi amammuo, na ɛyɛ kɔkɔbɔ a ɛtia ɔhyɛ amammuo.
3. Sika Futuro.
Ansa na yɛde nkrataa ne nnadeɛ reyɛ sika no, na Akanfoɔ de sika futuro na di dwa, afei na wɔnuku no sɛ adeɛ a ɛkyerɛ yiedie ne ahonya. Akokɔsradeɛ ahosoɔ a ɛda adi wɔ mu saa ntoma yi mu kɛse no nko ara mpo kyerɛ sɛdeɛ sika futuro ahosuo teɛ ankasa. Saa ntoma yi gyina hɔ ma ahodeɛ, ɔdehyeɛ, onimuonyamfoɔ.
4. Abusua yɛ dɔm.
Akanfoɔ ani ku abusua ho yie pa ara, wɔhunu no sɛ ɛno ne kuro biara fapem. Ɛnam sɛ mmusua ahodoɔ na ka bɔ mu bɛyɛ kuro nti, wɔsusu sɛ kuro biara bammɔ, ne ne yiedie gyina abusua no so. Wɔnwonoo saa kente yi sɛdeɛ wɔde bɛda abusua ho mfasoɔ yi adi, na wɔahyɛ me kena. Saa kente yi gyina hɔ ma abusua nkabom, mfasoɔ a ɛwɔ abusua nkabom so ne afidie.
5. Ɛmmaa da.
Nhwehwɛmu kyerɛ sɛ, Asantehene ntomanwonofoɔ titire na ɔnwonoo saa kente yi, na berɛ a Asante Ahemfo no mu baako hunuiɛ no, ne ho dwirii no wɔ ne fɛ ho. Wei nti ɔkasa faa ho sɛ, “Wei deɛ ɛmmaa da”, kyerɛ sɛ adwini a ɛte saa so bi mmaa da. Wei nti wɔde n’asɛm no too ntoma no so sɛ Ɛmmaa da, na wɔkoraa no maa saa ɔhene no. Mmom akyire no, wɔterɛɛ mu maa wɔn a wɔkura dibea kɛseɛ no nso nyaa mu kyerɛ a na wɔtumi fira bi. Saa kente yi gyina hɔ ma biribi a ɛyɛ soronko ne adeɛ a mfomsoɔ nni ho.
6. Toku kra ntoma.
Ɔbaahemaa bi a na wɔfrɛ no Toku ne Asantehene, Nana Opoku Ware I hyiaa wɔ ɔko mu. Ɛwom, ɔdii nkoguo wɔ ɔko no mu maa no hweree ne nkwa deɛ, nanso wɔhunuu no sɛ ɔbaa kokoɔdurufoɔ. Saa kente yi yɛ deɛ wɔahyɛ da anwono de kae saa abakɔsɛm no na wɔde hyɛ saa ɔbaahemaa no nso animuonyam wɔ n’akokoɔduro ho. Kane no, na adehyeɛ ne wɔn a wɔkura dibea kɛseɛ na wɔfira saa kente yi berɛ a wɔredi afahyɛ de anidie ne animuonyamhyɛ ama nananom akra no. Saa kente yi gyina hɔ ma akokoɔduro, akannie, atuhoakyɛ.
7. Woforo dua pa a na yɛpia wo.
Kente wei da Akanfoɔ adwene a wɔwɔ sɛ woyɛ ade pa a na afoforɔ boa wo no adi. Ɛkyerɛ sɛ ade pa biara a ankorɛankorɛ yɛ no hia sɛ kuro no de ne mmoa taa n’akyi. Obi foro dua pa a nnuaba wɔ so a, wɔn a wɔbɛn no no pia no sɛdeɛ ɔbɛduru ho yie ama watumi ate, ɛsiane sɛ wɔnim sɛ nnuaba no ba a, wɔbɛnya mu kyɛfa. Ntoma no hyɛ ankorɛankorɛ nkuran ma wɔdi dwuma pa. Saa kente yi gyina hɔ ma anidasoɔ, anisoadehunu, adwuma pa.
8. Kyeretwie.
Sebɔ kyefoɔ. Saa kente yi da abakɔsɛm bi adi. Ɔhene Kwaku Dua pɛɛ sɛ ɔsɔ akokoɔduro a n’akofoɔ no wɔ hwɛ, wei nti ɔhyɛɛ wɔn sɛ wɔnkɔkyere ɔsebɔ animono so mmra. Ɛfiri saa berɛ no, wɔde amoma “kyerɛtwie” no bataa ahemfo ahodoɔ a wɔn akokoɔduro ne wɔn akannie no te sɛ akokoɔduro a na wɔhia de akɔkyere sebɔ animono so no din ho. Nsensaneɛ tuntum a ɛwowɔ mu firi soro ba fam no gyina hɔ ma ahosuo tuntum a ɛwowɔ sebɔ ho no. Kane no, na Asantehene nko ara na ɔfira, anaa ahemfo afoforɔ no nso, mmom na gye sɛ Asantehene ama wɔn kwan ansa. Saa kente yi gyina hɔ ma akokoɔduro, akannie, nkuranhyɛ.
9. Akyempem
Wei gyina hɔ ma akyem ahodoɔ a na akofoɔ a wɔnnyaa nteteɛ kɛseɛ biara no de di dwuma bɔ Asanteman ho ban berɛ a Ɔmo bi aba mpofirem no. Saa anyɛm a na wɔde di dwuma kane no, ɛnnɛ, wɔde di dwuma wɔ adehyeɛ dwumadie binom ase de kae Asanteman akofoɔ no akokoɔduro. Saa kente yi gyina hɔ ma anidahɔ, bammɔ, akofoɔ akokoɔduro ne nkabom.
10. Nyankontɔn.
Wɔhwɛɛ sɛdeɛ nyankontɔn fɛ teɛ na wɔde yɛɛ saa kente yi. Sɛdeɛ wɔahyehyɛ no ne ahosuo ahodoɔ a ɛwɔ mu no kyerɛ nyankontɔn ahosuo no ara. Saa kente yi gyina hɔ ma ɔsoro adeɛ a ɛyɛ fɛ, biribi a ɛyɛ soronko ne nsɛnkyerɛnneɛ pa bi.
Kakra yi ne kente mu adwini ahodoɔ a yɛbɛtumi ahwɛ na yɛahunu ɛmu biara nkyerɛaseɛ. Megye di sɛ woasua biribi pa bi ɛnnɛ. Bɔ mmɔden pa ara sɛ wobɛhunu kente biara a wode bɛfira no din ne n’asekyerɛ. Yɛbɛkɔ so ara ahwɛ nsrahwɛbea afoforɔ a ɛwɔ Asante Mantam mu no bi wɔ adesua ɛbɛdi wei soɔ no mu. Mma wo werɛ mfiri sɛ wobɛsane akenkan no yie, wobɛkyɛ na woasane aka ho asɛm.
