Nsrahwɛbea ahodoɔ pii na ɛwɔ ɔman kronkron Ghana. Yɛhunu saa mmeaeɛ yi binom wɔ Asante Mantam. Ɛnnɛ, Asante Mantam mu nsrahwɛbea pii no mu baako a ɛyɛ Bonwire Kentenwenebea na yɛrebɛka ho asɛm.
Bonwire yɛ kuro bi a ɛwɔ Ghanaman mu. Ɛka Edweso-Dwaben kuro kɛseɛ a ɛwɔ Asante Mantam mu no ho. Deɛ ama saa kuro yi agye din kɛse yɛ kente a wɔnwono no wɔ hɔ no. Mmom, ɛnyɛ hɔ nko ara ne beaeɛ a wɔnwono kente wɔ Asante Mantam, kentenwene dwumadie yi ara bi kɔ so wɔ Adanwomase nso. Ɛte saa deɛ a, ɛnneɛ ɛdeɛn na ɛma Bonwire din a yɛbɔ no da nso wɔ kentenwene ho? Momma yɛnhwɛ ɛ!
Abakɔsɛm kyerɛ sɛ, mfe ha 17 mu no, anuanom baanu bi a wɔfiri Bonwire kuro no so na wɔdii kan nwonoo kente yi. Na adwuma titire a wɔyɛ yɛ abɔfodwuma. Wɔhwɛɛ sɛdeɛ ananse nwono ne ntentan wɔ wiram, wɔsuaeɛ, na wɔbɔɔ mmɔden faa saa kwan no ara so de nhoma nwonoo ntoma fɛɛfɛ bi. Wɔfrɛɛ saa ntoma no “Nwen-ntoma” ɛsiane sɛ wɔanwene. Wɔde wɔn anwenneɛ a ɛdi kan yi kɔkyerɛɛ Bonwirehene, Nana Bobie Ansa. Ɔdii wɔn anim ne wɔn kɔɔ Kumase, na wɔde ntoma yi kyerɛɛ Asantehene, Otumfoɔ Ɔpemso Ɔsɛe Tutu I. Otumfoɔ ani gyee ntoma no ho, ɛno nti ɔfa de yɛɛ adehyeɛ ntoma. Na wɔfrɛ ntoma a wɔdii kan nweneɛ no sɛ “Gagamuga”.
Mfeɛ bi akyi no, anuanom baanu yi kɔɔ wɔn anim wɔ wɔn anwenneɛ no mu. Na ɔfoforɔ a wɔnweneɛ no ani te sɛ kɛntɛn. Wei nti nnipa a wɔwɔ kuro no mu hɔ frɛɛ no sɛ”kɛntɛn-nwen-ntoma”. Ɛno na berɛ rekɔ anim no, kasa nnanemu ama no abɛyɛ kente no.
Bonwirehene sane dii wɔn anim maa wɔde foforɔ yi nso kɔkyerɛɛ Asantehene foforɔ a na ɔsi so no, Otumfoɔ Ɔkatakyie Opoku Ware I. Afe 1721 mu no, Asantehene bɔɔ kente akonnwa too hɔ, na ɔde Kuruga ne Ameyaw sii so de hyɛɛ wɔn animuonyam wɔ wɔn anwenneɛ no ho. Wei maa wɔbɛyɛɛ Nana Kuruga ne Nana Ameyaw.
Ahyɛaseɛ no deɛ, na ahosuo a ɛwɔ kente no mu yɛ tuntum, fufuo ne beredum nko ara, nanso akyire no Otaa Kraben a ɔyɛ Ɔyɔkoni no de ahosuo foforɔ te sɛ kɔkɔɔ, ahahanmono ne akokɔsradeɛ bɛkaa ho. Wei maa Asantehene sane bɔɔ akonnwa de no sii so sɛ Ɔyɔkomanhene
Mfe ha a ɛtɔ so du nkron mu nso no, Nana Ɔsɛe Kofoɔ daa adwini ahodoɔ adi wɔ kentenwene no mu. Afe 1990 mu no, Asantehene Otumfoɔ Opoku Ware II nso bɔɔ akonnwa maa Ɔsɛe Kofoɔ asefoɔ sɛ wɔnni Anwenfohene.
Afe no 1990 no ara mu na wɔsii ɔbarima bi a ɔfiri Adangomase Fufutomahene. Adangomasefoɔ hunuu kentenwene berɛ a wɔwarewaree wɔ Bonwire na wɔkɔɔ hɔ kɔsuaa kentewene no.
Nkonnwa ahodoɔ a Asantehene ahodoɔ no bobɔ too hɔ a ɛfa kente ho no nyinaa hyɛ Gyaasehene ase. Amammerɛ mu no, ɛtwa sɛ Asantehene kente biara a ɔbɛfira no yɛ deɛ ne kente ahemfo (Kentehene, Ɔyɔkomanhene, Anwenfohene) anwene ama no wɔ Bonwire.
Kente Ho Dwom No
Ɔdwomtoni ne dwomtwerɛfoɔ bi a na wɔfrɛ no Owura Ephraim Amu tiee sɛdeɛ kentenwene ho dede teɛ, ne kwan a ɔnwonofoɔ no fa so toto ne nsa na ɔde ne nan di dwuma no so na twerɛeɛ. Saa dwom wei ma kente yɛ fɛ kɛkɛ, ɛsane twe adwene si so pii. Momma yɛnhwɛ sɛdeɛ dwom no kɔ ɛ!
Akyinkyinakyinkyin ama mahu
Akyinkyinakyinkyin ama mahu nneɛma,
Akyinkyinakyinkyin ama mate nsɛm nnɛ,
Asante Bonwire Kentenwene deɛ,
Menhunuu bi da o,
Asante Bonwire Kentenwene deɛ,
Mentee bi da o,
Kwame nim adeɛ yɔ
Ne kentenwene na abɔ me gyɛ
Ne nsa; ne nan, ne nsadua sɛ ɛregyegye nie:
Kro, kro, kro, kro,
Hi, hi, hi, hi,
Krohikro hi krokrokro,
Hi, hi, hi, hi,
Krohikro,
Na ɛyɛ me dɛ o,
Na ɛyɛ me dɛ o,
Na abɔ me gye koraa,
Na ɛyɛ me dɛ o,
Na abɔ me gye koraa.
Kente amfiti prɛko pɛ na ɛbaeɛ sɛdeɛ yɛhunu no nnɛ yi. Afa mmerɛ pii mu adi adaneadane. Mmerɛ rekɔ anim no na adwene foforɔ reda adi wɔ ho. Wei ma yɛnya n’ahodoɔ pii.
Kente gu ahodoɔ, adwinneɛ a ɛwɔ ɛmu biara mu no kyerɛ adwene pɔtee bi a ɛtaa akyire. Bɔ mmɔden sɛ wobɛgye berɛ ama Ɔfa 2 no nso, ɛno mu na yɛbɛhunu nkyekyɛmu ahodoɔ no binom.
Kakra a woasua afa Bonwire kentenwonobea ho yi, mfa nhyɛ wo nko ara wo ho. Kenkan, kyɛ na ka ho asɛm.
