Nwiram adwuma binom te sɛ kuayɔ, ahayɔ ne abɛtwa ne adwuma titire a na yɛn nananom yɛ. Weinom ne adwuma a na ɛbɔ wɔn akɔhoma, ɛno nti na wɔnsi no fam koraa. Ansa na abɛɛfosɛm ne aban adwuma reba no, na wɔma ɔbarima biara a waduru ne mpanin mfeɛ so asase, sekan ne etuo ma no hyɛ kuayɔ anaa ahayɔ ase, na wɔama ɔbaa nso kɛntɛn.
Sɛ yɛhwɛ saa adwuma yi no a, ɛsiane sɛ ɛyɛ a wɔba fie na wɔntena adwuma no ho berɛ biara nti, wɔyɛ nneɛma bi de kasa kyerɛ amanfoɔ wɔ wɔn adwumayɛ no ne nsɛm binom a ɛfa ho ho. Nsɛmkyerɛnne a ɛkasa wɔ nwiram gu ahodoɔ mmiɛnsa; Deɛ akuafoɔ de di dwuma, deɛ abɔfoɔ de di dwuma ne deɛ abɛtwafoɔ de di dwuma.
Sɛ yɛhwɛ deɛ akuafoɔ de di wɔn dwuma no a, wɔnam saa nneyɛeɛ ne nsɛnkyerɛnne binom so de kasa kyerɛ wɔn yɔnko Akanfoɔ anaa wɔde bɔ wɔn kɔkɔ. Weinom bi na ɛdidi soɔ yi;
Sɛ afuo bi bɛn kwan ho na sɛ ɛyɛ frɔmfrɔm a, mpɛn pii no, ɛyɛ nipa a wɔtwam wɔ hɔ no nyinaa anaa wɔn mu dodoɔ no ara kamfo afuo no wɔ ne fɛ ne ne frɔmfrɔmyɛ ho. Akanfoɔ gye di sɛ, sɛ wɔkamfo afuo no boro so saa a, mfudeɛ no nso aba, sɛ ɛso aba mpo a, ɛnyɛ sɛdeɛ wɔpɛ no. Ne saa nti wɔde nkamfoɔ a ɛyɛ Akanfoɔ nnuane a wɔnya firi afuom no sina dua sini so si afuo no ano baabi. Wɔyɛ wei de kasa kyerɛ wɔn a wɔretwam sɛ wɔnsusu nkamfo afuo no, ɛnna wɔgye di sɛ nkamfoɔ (aduane) yi tumi bɔ afuo no anaa mfudeɛ no ho ban firi ani bɔne biara ho.
Sɛ obi ne ne yɔnko kɔ afuom bɔ mu na obiara pae fa ne kwan na sɛ ɔbaako redi kan wɔ fie agya ne yɔnko no a, deɛ ɔbɛdi kan no twa nwira gu nkwanta a wɔdii mpaepaemu wɔ soɔ no so de kyerɛ sɛ wadi kan. Mpɛn pii no, ɛyɛ a na wɔyɛ adwene korɔ sɛ deɛ ɔbɛdi kan no bɛgu ahahan. Wɔde bankye ahahan anaa gyama ahahan na ɛtaa yɛ. Sɛ deɛ ɔbɛka akyiri no duru hɔ na sɛ ahahan no da so yɛ mono a, na ɛkyerɛ sɛ ne yɔnko no twaa mu nkyɛreeɛ, enti ɔmia ne nan mu a, ɔbɛtumi ato no. Nanso sɛ ɔduru hɔ na ɛmu aho a, na ɛkyerɛ sɛ ɔtwaa mu akyɛre. Wei na wɔfrɛ no ahahanguo no.
Bio, sɛ nnipa baanu anaa deɛ wɔboro saa rekɔ baabi na sɛ ɔbaako anaa ebi di wɔn anim kan na sɛ ɔhyia nkwanta a, ɔtumi bu nhahan gu deɛ ɔbɛmane afa no de akyerɛ wɔn a wɔaka akyi no sɛ ɛhɔ na (w)ɔfaeɛ enti wɔn nso mfa hɔ.
Sɛ obi dua nneɛma na akorɔmfoɔ tu wɔn ani tɛ si so a, ɔtumi de ntadeɛ hyehyɛ nnua ma no yɛ sɛ nnipa no, na sɛ ɔkorɔmfoɔ no ani bɔ so a, ɔdwene sɛ nnipa wɔ afuo no mu enti ɔkɔ hɔ a ne ho bɛkyere no. Afei sɛ nnoma retu mfudeɛ no na sɛ okuani no yɛ saa kɔsi hɔ a, nnomaa no ani bɔɔ so ara na wɔatutu adwane ɛsiane sɛ wɔhunu no sɛ nnipa wɔ afuo no mu.
Nkɛtɛsie nso yɛ adeɛ a akuafoɔ taa yɛ no wɔ afuom de kasa kyerɛ wɔn ho. Sɛ abusua asase da hɔ a, ɛsiane sɛ wɔmfa nkame abusua no mu nnipa nti obiara tumi si baabiara a ɔpɛ dɔ yɛ so adwuma. Sɛ obi di kan wɔ abusua asase bi so na sɛ ɔhunu sɛ obiara nnɔɔ hɔ a, ɔsie nkɛtɛ. Deɛ ɔyɛ ne sɛ, ɔtwa nnua asini asini a akorɛ wowɔ mu mmienu, na watutu amena wɔ fam de asisi mu, na watwa dua foforɔ de abea nnua mmienu no akorɛ no ntam. Sɛ ɔbusuani foforɔ bi ba asase no ho a, wei bɛkasa akyerɛ no sɛ obi adi kan wɔ asase no so. Wei boa si mansotwe ne ntɔkwasɛm ho kwan wɔ abusua mu.
Akanfoɔ tumi yɛ nneɛma ahodoɔ binom de kyerɛ faako a wɔn mfuo ano kɔpem. Wɔfrɛ wei ɛhyeɛtoɔ. Wɔtumi dua ntɔmmɛ, aborɔbɛ anaasɛ kwadu wɔ wɔn mfuo no ano de to hyeɛ. Ɛsiane sɛ saa mfudeɛ yinom di kyɛre ansa na ahyeɛ anaa ɛbi ase ntu da nti na wɔtaa de wei di dwuma no. Sɛ deɛ n’afuo ne obi deɛ bɔ hyeɛ no tutu firi afuo no ano mpo a, ɛsane fifi bio. Ɛtɔ da nso a, wɔtumi de nnua akɛseɛ te sɛ akuekuenisuo, Wawa, ɔkorɛ ne nnua papa bi te Framo, Odum n.a. to hyeɛ. Wei kyerɛ wɔn a wɔne wɔn bemmɛn soɔ no baabi a wɔn ano pem, na ɛsi asase ho mansotwe kwan.
Sɛ merɛnkɛnsono si asase bi so a ɛka pii kyerɛ wɔn a wɔbɛhunu. Sɛ merɛnkɛnsono si asase bi anaa ɛsie bi so a, ɛbɔ nnipa kɔkɔ sɛ saa asase no anaa ɛsie no wɔ wura, ɛsiane sɛ Akanfoɔ gye di sɛ biribiara a ɛwɔ asase yi soɔ no wɔ wura. Mmerɛ binom nso, sɛ merɛnkɛnsono si asase bi so a, ɛkyerɛ sɛ manso wɔ asase no ho. Afei, sɛ amena kɛseɛ a ɛdi awu anaa aforɔ bi da wuram baabi a, wɔde merɛnkɛnsono si bɛn saa beaeɛ no de kyerɛ sɛ ɛhɔ yɛ hu.
Sɛ obi dua mfudeɛ na akorɔmfoɔ tu wɔn ani tɛ si so a, nipa no tumi bu esie de kosua ne praeɛ sini ka ho de gu korafa mu de kɔsi aduadeɛ no so anaa n’ase de kyerɛ wɔn sɛ wɔnyae wia, ɛnyɛ saa a adeɛ a ɛyɛ fɛ bɛyɛ wɔn tan. Ↄtumi nso de koogyan bobɔ aduadeɛ no mu de kyerɛ ade korɔ no ara.
Sɛ yɛba deɛ abɔfoɔ de di dwuma no so a, ɛsiane sɛ nwiram so, na wɔtumi yera nti, wɔyɛ nsɛnkyerɛnne binom de kae wɔn ho wɔ wɔn kwan a wɔfaa so kɔeɛ no, sɛdeɛ ɛbɛyɛ a wɔnyera efie kwan. Wɔyɛ bi nso de kasa kyerɛ wɔn yɔnko abɔfoɔ;
Abɔfoↄ tumi bubu nnua nketewa a ɛsisi kwan a wɔfa so kɔ ahayɔ no nkↄn mu de gugu kwan a wↄfa so kↄ ha wↄ kwaeԑ bi mu no ho sԑdeԑ ԑbԑyԑ na wↄnyera. Ahayↄ mu dɛ anaa ɛmu den tumi ma abɔmmɔfoɔ kɔ ara kɔpue kwaeԑbirentuo bi mu a wↄnnim hɔ baabiara. Ԑsiane sɛ abɔfoɔ yi nim sɛ saa bɛtumi asi nti, sɛ wɔrekɔ ha no a, wↄbubu nnua nkↄn mu de yԑ agyinahyɛdeɛ sԑdeԑ ԑbԑyԑ a wↄnyera.
Afei ɔbɔfoɔ bi tumi botabota nnua akɛseɛ a ɛsisi beaeɛ a wɔfa kɔ ha no de kasa kyerɛ wɔn ho kae wɔn ho wɔn kwan.
Wei akyi no, abɔfoɔ no yɛ nsɛnkyerɛnne ahodoɔ binom de kasa kyere wɔn yɔnko abɔfoɔ;
Sɛ ɔbɔfoɔ hunu beaeɛ a mmoa fa kɔdidi a, ɔtumi bɔ kwan tea bi a ɛso yɛ kwabokwabo to hɔ na ada adi sɛ mmoa fa saa kwan no so kɔdidi. Sɛ aboa fa so amonom wɔ ara aɔbɛtumi ad no ntɛ akum no.
Sɛ ofidisumfoɔ bi sum fidie bi te sɛ adwaa, apatum, buo anaa gyaake a, ɔde merɛnkɛsono bɔ hankra si so, anaa de si nkwanta bi a ɛkɔ fidie no ho no so sɛ ɛhɔ yɛ hu nti obiara a ɔbɛfa hɔ no nhwɛ ne ho yie. Wɔtumi de koogyan nso yɛ saa.
Sɛ ɔbɔfoɔ bi rekɔ ha na ɔhunu atoduro wɔ beaeɛ a ɔrekɔ no a, ɛkyerɛ sɛ ɔbɔfoɔ foforɔ adi kan wɔ saa ɛpɔ no mu enti ɛwɔ sɛ ɔsane.
Saa ara nso na abɛtwafɔ wɔ nsɛnkyerɛnne a wɔde kasa kyerɛ adasa. Sɛ wokɔ abɛ bi a wɔntoeɛ ase na sɛ wɔde akamuduro akeka abɛ dua no ho a, ɛkyerɛ sɛ obi adi kan abɛka mmɛ no ho asɛm atɔ rebɛyɛ ho adwuma enti obiara nni ho kwan. Deɛ ɔtɔɔ mmɛ no nso tumi de koogyan bobɔ mmɛ no ho de kyerɛ abusuafoɔ nkaeɛ no sɛ watɔn mmɛ no ama obi.
Afei, sɛ obusuani bi di kan wɔ abɛ bi so sɛ ɔrekɔto ate aseɛ nsa a, ɔde sekan waawae mpapa no ho de kyerɛ wɔn a wɔaka no sɛ ɔpɛ sɛ ɔto abɛ no te aseɛ nsa de yɛ n’adeɛ.
Sɛ yɛkɔto sɛ toa a nsa fufuo wɔ mu si baabi na asaawa hyɛ ano a, ɛbɔ dawuro de kyerɛ wɔn a wɔretwa mu no sɛ nsa wɔ hɔ, anaa ɛhɔ yɛ nsadwaase. Sɛ yɛhunu saa nsɛnkyerɛnne yi a ɛkasa sɛ wɔtɔn nsa fufuo wɔ beaeɛ hɔ.
Nsa fufuo yɛ adeɛ a ɛyɛ dɛ pa ara, ne saa nti amanfoɔ taa te abɛtwafoɔ nsa nom bɔ wɔn ka. Deɛ abɛtwafoɔ yi yɛ de si saa foɔ yi kwan ne sɛ, wɔde awuduro keka aketekyiwa anaa ahina anaa adeɛ a wɔde te nsa no ano. Sɛ wɔn a wɔdi saa dwuma yi bɛfa saa nneɛma yi sɛ wɔrete nsa no anom na sɛ awuduro no pampan wɔ wɔn hwenem a, wɔde si hɔ gyae wɔn suban no, ɛsiane sɛ ɛkyerɛ wɔn sɛ ɔbɛtwani no nya wɔn a, ɔbɛkum wɔn.
Sɛ wɔto abɛ a, ɛyɛ a ɛfiri mmire ma amanfoɔ tutu. Mpɛn pii no, ɛyɛ a wɔn a wɔtu mmire no tiatia afuo a wɔato abɛ wɔ mu no mu mfudeɛ no so. Sɛ abɛtwafoɔ mpɛ sɛ abɛ no firi mmire ma amanfoɔ bɛsɛe nneɛma a, wɔde abosea gu abɛ a wɔato no so. Enti sɛ wohunu sɛ abosea gu abɛ bi a wɔato so a, na ɛkyerɛ sɛ ɛsiane amanfoɔ nsɛmmɔne nti, ɔbɛtwani no amma abɛ no amfiri mmire.
Abɛtwafoɔ frɛ biribi kyɛmferɛ, na wɔtaa yɛ no wɔ wɔn nnwuma mu. Deɛ wɔyɛ ne sɛ, wɔde korafa anaasɛ kukufa si dua nkorabata bi mu de si beaeɛ a wɔyɛ wɔn nsa no. Wɔtaa yɛ no wɔ nkwanta a wɔfa so kɔ wɔn nnwuma mu no so. Wɔyɛ wei de hyɛ nsamanfoɔ ne ahonhom a wɔba wɔn abɛ so anadwo no nsa. Akanfoɔ gye di sɛ, ɛsiane nsɛnkyerɛnne yi nti, ahonhom no ma wɔn adwuma no kɔ so ma wɔnya dwa.
Saa nsɛnkyerɛnne yi yɛ deɛ yɛhunu no Akanman mu a ɛde nsɛm bi to dwa wɔ berɛ a obiara nkyerɛkyerɛ mu. Sɛ ɔkanni biara hunu deɛ yɛadi kan aka ho asɛm wɔ ɔfa a ɛdi kan no mu wɔ baabiara, a ɔte asie yie na ɔhunu deɛ ɛkyerɛ. Wɔda so de bi di dwuma, nanso fa no ara ayera.
Sɛ yɛkenkan Akan adesua nwoma ahodoɔ no a, yɛbɛhunu weinom bi wɔ mu, afei sɛ yɛgye berɛ kɔhwɛ Simpa asuafoɔ no yikyerɛ adoɔ a wɔyɛ no wɔ amammerɛ ho wɔ wɔn adesua mu no nso a, yɛbɛte wei ase yie.
Saa adesua yinon akyerɛ yɛn sɛ, ɛnyɛ kasa nko ara ne deɛ yɛde yɛn ano ka, na mmom yɛtumi de nsɛnkyerɛnne nso kasa ma nnipa te aseɛ.
Deɛ yɛanka ho asɛm a wonim no, fa bra na yɛmmoaboa ne nyinaa ano na anyera.
Amammerɛ wɔ hɔ yi, yɛntoto no ase, w’amammerɛ na ɛkyerɛ wo nipaban.
Yɛbɛhunu nsakraeɛ a aba weinom mu, deɛ abɛɛfosɛm ne mpuntuo de abɛka ho ne sintɔ a ɛwɔ mu wɔ ɔfa a ɛdi hɔ no mu, gye brɛ, dwodwo wo ho, na twɛn.
