Sε sintᴐ bi ba onipa bi adwene mu, n’atenka mu anaa ne suban/nneyεeε mu na sε εyε adeε a apᴐmuden mu nsεm bi taa akyire a, yεka no sε onipa no anya adwene mu haw. Mpεn pii no, εtaa ne nnipadua akwaa a εho hia yie wᴐ nnipa dwumadie mu ho haw anaa kyematᴐ na εnam. Adwene mu haw gu ahodoᴐ bebree. Yεbεtumi ato adwene mu haw din sε dwene mu yareε, nanso adwene mu yareε yε kyinniε kεseε a adwene mu haw ne nneyεeε anaa suban mu haw ahodoᴐ, nnipadua no dwumadie mu kyematoᴐ anaa εdᴐmdie (sε onipa bi redi ne ho anaa afoforᴐ awu) hyε aseε.
Sε yεbᴐ adwene mu haw so a, yεn mu dodoᴐ no ara hunu no sε εyε wᴐn a sεbe wᴐabᴐ adagya nenam mmᴐnten soᴐ no nko ara. Nnipa pii ahyehyε ntadeε akek wᴐn ano atom, nanso wᴐn adwene mu ha wᴐn.
Nhwehwεmu kyerε sε, sε yεde nnipa 8 gyina hᴐ a, wᴐn mu baako wᴐ adwene mu haw. Nhwehwεmu korᴐ yi ara ka sε, afe 2019 mu no, na wiase yi mu nnipa ᴐpepe 970 na na wᴐwᴐ adwene mu haw a agye din pa ara a εnonom ne, ehu anaa suro adwene mu haw ne ateetee ne awerεhoᴐ adwene mu haw. Adwene mu haw ahodoᴐ mmiεnsa binom na εdidi soᴐ yi;
- Ateetee ho Adwene Mu Haw
Nhwehwεmu kyerε sε, afe 2019 mu no, na nnipa ᴐpepe 301 na na wᴐwᴐ ateetee ho adwene mu haw a na εmu ᴐpepe 58 yε mmᴐfra nketewa ne mmᴐfra a wᴐn ani rema soᴐ. Ɛsu a obi da no adi wᴐ saa haw yi mu ne sε, εhu ne ahohaw tumi hyε ne so pa ara. Sε obi nya saa haw yi bi a, εha no pa ara ma εduru baabi mpo a, ᴐntumi nyε deε εsε sε ᴐyε. Ateetee ho adwene mu haw gu mu ahodoᴐ. Obi wᴐ hᴐ a, ᴐdwennwene boro so. Ehu tumi hyε obi so ma no yare, anaa ᴐtwa hwe mpo. Ewiase ne asetena mu nsεm tumi de ehu mmorosoᴐ brε obi. Obi wᴐ hᴐ a, sε ᴐbεte ne ho afiri nnipa binom a wᴐda n’akoma soᴐ ho no ma ehu kεseε kyekyere no.
- Atoyerεnkyεm/Asiane/Asεm huhu bi mu adwene mu haw (PTSD)
Sε yεhwε saa adwene mu haw yi ne adwene mu haw no mu dodoᴐ no ara a, mpεn pii no, εyε a nnipa taa nya no berε a ntᴐkwasεm, asiane, anaa asεm huhu bi a εboro so asie. Sε nsεm bi a ani yε nyan, anaa ano yε den na εyε hu taa toto obi a, onipa no tumi nya saa adwene mu haw yi. Sε obi nya saa haw yi bi a, deε yεtaa hunu wᴐ ne ho ne sε, εsiane sε deε εtoo no no ahyε ne so nti, mpεn pii no n’adwene twa no mfonin de no kᴐ n’akyi ma εyε sεdeε saa asεm no ara na εreto no no. Ɛnam so koraa ma no tumi so daeε bᴐne. Εba no saa a, εha nnipa no dwumadie ahodoᴐ, εfiri sε n’adwene da so ara wᴐ asεm dada no so. Saa nipa no tumi nso hyε ne ho ara sε biribi mma no nkae saa asεm no. Ɛno nti, εyε a ᴐmpε sε ᴐbεhunu saa asεm no bi anaa biribi a εte saa. Afei εma nnipa no da suban bi adi te sε deε saa asεm no resane ato no no. Sε wei toa so wᴐ nnawᴐtwe bi mu a, εtumi ha adwene no dwumadie.
- Skisofrenia
Nnipa ᴐpepe 24 na saa skisofrenia yi tumi yε wᴐn wᴐ afe mu, anaa sε wᴐyi nnipa 300 biara a, wᴐn mu baako wᴐ saa haw yi bi. Sε yεde nipa a wᴐwᴐ saa haw yi mfeε toto afoforᴐ deε ho a, wᴐn mfeε a εsε sε wᴐdi no wᴐ asase yi soᴐ no so tumi te 10-20. Skisofrenia yε adwene mu haw a sε εyε obi a, ᴐntumi nnwene nhwε kan, anaa n’adwene no ntumi nyε adwuma papa. Ne suban ne ne nneyεeε nso sesa. Deε εma wei da adi ne sε, onipa no dwennwene nneεma binom a εntumi nyε hᴐ anaa εnyε yie ho sε εbεma mu anaa ᴐbεyε, n’adwennwene no nsisi so, ne nneyεeε mfa kwan mu, anaa ᴐgye akyinnye mmorosoᴐ wᴐ nneεma binom a εnyε nokware ho. Wᴐn a wᴐanya saa adwene mu haw yi adwene mu dwumadie nkᴐ so, anaa εnkᴐ yie.
Yεwᴐ adwene mu haw ahodoᴐ pii wᴐ deε m’abobᴐ soᴐ yinom akyi a yεbεka ho asεm akyire yi. Deε εwᴐ mu ne sε, deε m’abobᴐ soᴐ yinom nyinaa wᴐ ayaresa, nanso mpεn pii no, εsiane sε yεtete saa nnipa yinom nti, εyε a wᴐde awerεhoᴐ ne yaw ma no yε kεse, anaa wᴐfiri mu.
Momma yεnhyε no nso sε, adwene mu haw yε adeε a εtumi to obiara wᴐberε biara mu.
