Mmaa dodoɔ a wɔafa monaatofoɔ nsam no binom hwere akwannya kεseε a anka wɔbεtumi nam so ama mmara ne saa nnipabɔnefoɔ yi adi no kwa. Ꜫnyε wɔn mfomsoɔ, wɔn mu bebree nnim weinom ho nimdeε. Ansa na kɔɔto bεgye atom sε ampa obi adi bɔne anaa wayε mfomsoɔ no, εnnyina kasa kεkε so mmom εgyina adanseε so. Ꜫno nti mpεn pii no εyε a na εyε den yie sε wode monaatoɔ ho asεm bεto obi so ama afoforɔ agye adi wɔ berε adanseε biara ntaa akyire. Nneεma atitire binom a εho hia pa ara na εtwa sε yεhyε no nso fa monaatoɔ ho no na yεrebεhwε no εnnε.
Monaatoɔ akyi no, εtwa sε nipa a wɔato no monaa anaa deε ɔbεn deε wɔato no monaa no hwε sε ntεm pa ara wɔbεkɔ ayaresabea ama wɔayε nhwehwεmu ahodoɔ a εsε nyinaa, na εno akyi wɔkɔbɔ apolisifoɔ amanneε ansa na nnɔnhwere 72 a εyε nna mmiεnsa aduru. Botaeε a εtaa wei akyi no yε sεdeε εbεyε a wɔbεtumi asi nyinsεn, nna mu yadeε ne owuo ano, na wɔahwε ahunu sε monaatoɔ no ho adanseε bi te sε deε ne ho aka no ataadeε rensεe, na wɔatumi abɔ beaeε a monaatoɔ no kɔɔ so no ho ban sεdeε εbεyε a adanseε ahodoɔ a wɔbεtumi anya no wɔ hɔ no nso nsεe, na wɔasane ahwε ahunu sε deε wɔato no monaa no bεnya mmoa wɔ adwenem nso.
Hyε no nso sε, berε a monaatoɔ no asi awie a wonnya nkɔɔ ayaresabea no, bɔ mmɔden sε womfa biribiara mpepa wo hanam fa baabiara. Wei kyerε sε worentumi nware mpo. Afei bɔ mmɔden sε woremfa atadeε a na wohyε no ngu nsuo mu anaasε wonsi. Mmom, pε aduradeε anaa krataa a atwerε biara nni so fa fam ho anaa fa kyekyere ho. Hwε sε woremfa atadeε anaa sɛbe drɔɔso no nhyε rɔba biara mu. Anyε saa a εbεtumi ate mfifire ama adanseε a εwɔ mu no asεe. Mfa dawubɔ krataa krataa biara nso nkyerekyere ho εsiane sε nnuro bi wɔ ho εno nso bεtumi asεe adanseε no saa ara. Afei bɔ mmɔden nso sε worensesa biribiara wɔ faako a monaatoɔ no kɔɔ so no, mpra hɔ, mpepa hɔ, εnhyehyε biribiara wɔ hɔ. Gya hɔ sεdeε εhɔ ayε no ara. Woyε weinom nyinaa a wobεtumi abɔ adanseε ahodoɔ bi tɛ kɔndɔm, nwi ne deɛ ɛkeka ho a apolisifoɔ bεhia de aboa wo no ho ban.
Berε a wobεkɔ ayaresabea hɔ no, adɔkotafoɔ no bεyε nhwehwεmu ahodoɔ wɔ deε ne ho aka no mogya, ne dwonsɔ ne sεbe n’ase nsuo mu. Wɔbεma no nnuro ahodoɔ anom mmerε kakra a εbεsi HIV ano, εbεtumi aba sε na monaatofoɔ no wɔ saa yadeε yi bi. Wɔma no aduro foforɔ nom de si nyinsεn ano kwan, gye sε nipa no ayε krado sε nyinsεn wɔ mu mpo a ɔbεwo. Afei wɔhwε ma apɔmuden mu afotufoɔ no ne no twetwe nkɔmmɔ sane tu ne fo sεdeε monaatoɔ no nni n’adwene mu dεm na ɔmfa ateetee pii mu. Berε a wobεduru apolisifoɔ no hɔ nso, wɔbεbisa wo nsεm ahodoɔ a wɔhia ho anoyie na aboa wɔn wɔ wɔn nhwehwεmu no mu. Hwε sε woremfa biribiara nsie wɔn wɔ w’anoyie no mu, mpo biribia a wɔammisa wo nanso wogye sε εbεboa wɔn ama wɔn adwuma no ayε mmerε na ayε ntεm no, mfa nsie.
ꓛman Ghana mmara mu no, obi to monaa a wɔde no to afiase εfiri mfeε nson kɔsi mfeε aduonu nnum. Wei yε mmara a εyε adwuma ankasa, εno nti momma yεnhwε sε abɔnefoɔ a wɔdi saa abɔnefosεm yi bεnenam hɔ kwa a wɔn bɔne no ho hu biara ntɔ wɔn so mpo. Nnipa pii taa ka no wɔ wɔn kasa mu sε ntaadeε nketewa a mmaa hyε yiyi wɔn ho no na εde monaatoɔ ba, akyinnye nni ho deε. Nanso εnyε monaatoɔ nyinaa na εfiri mmaa ahosiesie a ankɔ yie mu. Mmarima binom tumi to nkwadaa nketewa pa ara wɔnnim ahosiesie biara monaa, ebinom to wɔn ankasa yafunu mu mma monaa. Ne nyinaa firi ahohyεsoɔ a εwɔ fam ntira. Yεtu fo sε mmaa bεfa wɔn ho na wɔakata wɔn ho asie sεdeε edin aketeesia teε no ara, nanso obi ahosiesie a εnkɔ yie no mma wo kwan sε wotumi to no monaa. Ghana mmara kasa tia.
Megye di sε atwerε yi ama woasua biribi foforɔ. Bɔ mmɔden sε wobεkyε ama afoforɔ nsa aka bi. Afei wowɔ obi a wafa monaatoɔ ho ateetee mu a, twe bεn no na wone no mmɔ nkɔmmɔ pii, hyε no nkuran, na ma n’ani nnye. Wei bεboa ate ne yea no so pii. Wo a wɔato wo monaa no nso, mma wo werɛ nho pii. Asiane na aba, ɛno nkyerɛ sɛ w’abrabɔ aba n’awieeɛ. Nya awerɛkyekyerɛ, hyɛ wo ho den. Na toa ɔbra no so.
