Nhwehwεmu foforᴐ bi a wᴐyεeε nkyεreeε aka awie no sε, nnua a εwᴐ Abibiman a εwᴐ Sahara fa kumaa mu no tumi de mframa a εboa ma nnua nyini a εno ne kaabᴐn no kumaa bi na εsie wᴐ wᴐn mu. Ɛkyerε sε, sεdeε na nhwehwεmu binom a εdii kan baeε susuu sε na nnuaa no tumi de saa mframa yi dodo sie wᴐn mu no, εnyε saa na εteε seesei.
Abᴐdeε mu nyansapε nhwehwεmuyεfoᴐ a United States National Aeronautics and Space Administration ka ho de mfidie a εde wᴐn ani di nneεma akyi twa ho mfonin to hᴐ mu mfonin bεboro 300,000 na εyε nhwehwεmu no, na wᴐnyaa nnua ahodoᴐ ᴐpepepe 9.9 wᴐ mu.
Wᴐde saa nhwehwεmu a wᴐyε faa Abibiman mu asasepεsεε so nnua ho yi too dwa wᴐ Ↄbεnem 1, 2023 mu.
Saa nhwehwεmu yi dᴐᴐ asukᴐ de kaabᴐn dodoᴐ a εwᴐ mframa a εwᴐ wiase mu no bεtoo dwa, na wᴐhunuu sε Abibiman mu nnua yi mu mframa no wᴐ fam pa ara.
Wᴐkyerε sε, sε yεhunu mframa ahodoᴐ a dua biara tumi de sie a, εbεboa ama yεahunu ewiem nsakaeε a εwᴐ yεn anim. Mmerε tenten a nnua ne mfuiε ahodoᴐ de saa mframa yi sie no nya nsunsuansoᴐ wᴐ ewiem nsakraeε so. Wᴐkyerε sε, berε a mfifideε de kaabᴐn yi sie no yε adeε a nsesan ne nwura ahodoᴐ binom a wᴐnyini wᴐ mmerε binom mu deε no yε tia, εna nnua a afe biara wᴐnyini no nso deε ware kakra. Sε wᴐbεtumi asusu asase bi so kaabᴐn a, εgyina aduadeε ne mfuiε ahodoᴐ a εnyini wᴐ hᴐ.
Wᴐkyerε sε, deε nti a nhwehwεmu a atwam no nsusuiε no boroo soᴐ ne sε, wᴐn mfidie a wᴐde twaa nnua no ho mfonin no faa nsensan ne mfuiε nketewa no nyinaa sε nnua.
Nhwehwεmu yi mu no, abᴐdeε mu nyansapεfoᴐ yi de mfidie a akwadare wᴐ saa dwumadie no mu, na εhunu nsonsonoeε a εda nnua ne mfuiε ne nsensam ntam na εdii dwuma no.
Wᴐayε adeε bi a yεbεtumi atwe ato yεn kᴐmputa ne yε foonu ahodoᴐ so, na εbεboa ama yεahunu dua biara a εwᴐ mmeaeε a wᴐyεε nhwehwεmu no ne kaabᴐn dodoᴐ a wᴐtumi de sie wᴐn mu.
Saa nhwehwεmu yi ho wᴐ mfasoᴐ ma Abibiman mu mmarayεfoᴐ, sεdeε εbεyε a wᴐbεyε wᴐn ntotoeε yie wᴐ ewiem nsakraeε ho. Ɛbεboa akuafoᴐ a wᴐpε sε wᴐhunu kaabᴐn dodoᴐ a εwᴐ wᴐn mfuo mu, εsiane sε, adeε titire baako a εboa ma mfudeε nyini yie ne saa mframa yi. Ɛbεboa yεn Abibifoᴐ yi nso ama yεahunu sε adeε titire a εde ewiem nsakraeε ba ne nnua mu kaabᴐn a εnni soro wᴐ yεn nsase soᴐ no.
