Aban nam Ↄsoafoɔ a ɔhwɛ Sikasɛm soɔ, Ken Oforo-Atta so de nhyehyɛeɛ 13 binom ato dwa, a ɛbɛboa ama wɔatumi akyerɛkyerɛ ɔman no kabɔ nhyehyɛeɛ mu wɔ 2023 mu.
Ↄkyerɛ sɛ, saa nhyehyɛeɛ yi yɛ asoafoɔ mpanimfoɔ ne ɔmanpanin fotufokuo no akwankyerɛ a wɔrehwɛ anim sɛ ɛbɛhyɛ aseɛ Ↄpɛpɔn 2023 mu.
Berɛ a abadwafoɔ fa bi kasaa pii sɛ aban no nhwɛ na ɔntete ɛka a ɔbɔ no soɔ sɛdeɛ ɛbɛyɛ a ɔbɛtumi agye ɔman yi sikasɛm ne ne mpontuo a agyigya no nkwa no akyi na saa nyehyɛeɛ yi baeɛ.
Mprempren yi, ɔman no sikasɛm da ahokyerɛ kɛseɛ ase. Ne saa nti ama asetena mu ayɛ den yie, na nneɛma nso boɔ kɔ soro pa ara.
Owura Ofori-Atta kaa no berɛ a na ɔde 2023 sikasɛm nhyehyɛeɛ no reto dwa wɔ Yawoada, Obubuo 24, 2022 mu no sɛ, wei ne anammɔntuo a ɛdi kan a wɔde bɛkyerɛkyerɛ ɛkabɔ nhyehyɛeɛ no mu.
Nhyehɛeɛ 13 no na ɛdidi soɔ yi:
- ℇsɛ sɛ Mansini Nketewa, Mansini Akɛseɛ, ne Nwumakuo a ɛyɛ Ↄman no deɛ hwɛ na wɔtete fagoo a wɔde ma wɔn a wɔayiyi wɔn sɛ wɔnni amanyɔsɛm mu dwuma ne mpanimfoɔ a wɔdeda saa Mansini yinom ano no so 50%. Saa akwankyerɛ yi ka fangoo a wɔde ma wɔn wɔ kwan biara so a deɛ a ɛboa ma wɔtete nneɛma boɔ so ma wɔn, ne nneɛma binom a aban no ma wɔn ho mmoa nyinaa ka ho. Saa pɛpɛɛpɛ nso na wɔde 50% a wɔyi sii hɔ de maa fangoo wɔ afe 2022 a atwa mu sikasɛm nhyehyɛeɛ mu no bɛyɛ Mansini Nketewa, Mansini Akɛseɛ, ne Nwumakuo a ɛyɛ Ↄman no deɛ no ho dwumadie a mmara hyɛ ma ho kwan;
- Wɔbɛbara V8/V6 ahyɛn no anaa ɛhyɛn biara a ɛnne no yɛ pɛ no twie, agye sɛ ɛyɛ akwantuo a wɔde rekɔ nkurase no nko ara. Wɔde nɔma pleeti a n’ahosuo yɛ ahaban mono a GV sɔ nɔma no soɔ na ɛbɛtwerɛ ahyɛn no ho nsɛm firi Ↄpɛpɔn 2023 rekorɔ;
- Wɔbɛtete sikasɛm nhyehyɛeɛ no fa a wɔde totɔ ahyɛn no so yie. ℇsiane sɛ wɔpɛ sɛ wɔsi akyinnyegyeɛ ho kwan nti, ahyɛn mono a wɔbɛtotɔ no nyinaa bɛyɛ ahyɛn a ɛtoɔ a ɛdeda ne tɔ soɔ no wowɔ fam, na ɛho nneɛma no ho nyɛ na ɛbɛboa ama ɔman no sikasɛm no agyina brane;
- Aman foforɔ so akwantuo a mmara ma ho kwan a ɛho hia a Nwumakuo a ɛyɛ Ↄman no deɛ no ka ho bie nko ara na wɔbɛma ho akwannya. Abadwafoɔ no mu nnipa biara nni wɔ a wɔbɛma no ɔman foforɔ so akantuo a mmara ma ho kwan ho akwannya. ℇsɛ sɛ aban nnwumakuo no nyinaa de wɔn akwantuo ho nhyehyɛeɛ a wayɛ de ama 2023 wɔ akwantuo a wɔrehwɛ anim nyinaa no brɛ Ↄpanin Pa a Ↄhwɛ Aban Dwumadie ne ne Nkitahodie soɔ (Chief of Staff) no wɔ Ↄpɛnimma bosome no mpaemu.
- ℇsɛ sɛ wɔyɛ deɛ wɔbɛtumi biara sɛ wɔbɛyɛ nhyiamu ahodoɔ ne nkyerɛkyerɛ ahodoɔ wɔ mmeaeɛ anaa aban no adan a mmara ma ho kwan no mu;
- ℇsɛ sɛ wɔtwe nteteeɛ a wɔnya firi abɔntene ne adwumayɛfoɔ nteteeɛ dwumadie a aban sɔ asene a ɛkɔ so wɔ Ↄmampanin no Atenaeɛ, Mmarahyɛbadwafoɔ Akakye ne Nwumakuo a ɛyɛ Ↄman no deɛ mu no sensɛn wɔ afe 2023 sikasɛm no mu;
- Sɛ wɔbɛtete ka a wɔbɔ no wɔ adwuma mu nnipa fa ho, ɛnna sɛ wɔntoto akatua mu ne sɛ wɔretwe alawanse bi te sɛ adansie, nsuo ka ne nkanea ka ne efie aka nketenkete binom, ne ntadeɛ, ne deɛ ɛkeka ho nyinaa asensɛm no nso ka ho bi.
- Wɔbɛgyae bu a wɔbu wɔn ani gu ɛtoɔ afoforɔ a anka ɛsɛ sɛ aman afoforɔ so nnwumakuo a ɛwɔ ɔman yi mu no tua no na wayɛ nhwehwɛmu wɔ nnwumakuo bi te sɛ agudetufoɔ, fangoo, ne mframagya adwumayɛkuo a wɔayi wɔn afiri ɛtoɔ tua mu a wɔntua toɔ no mu;
- Wɔbɛgyae aban adwumayɛfoɔ binom a wɔnka bammɔ adwumakuo no ho no fa;
- Wɔnsisi aban adwumakuo foforɔ biara wɔ 2023 mu;
- Wɔmma akyɛdeɛ kɛntɛn a nneɛma ahyɛ no ma biara wɔ 2022 mu;
- Mansini Nketewa, Mansini Akɛseɛ, ne Nwumakuo a ɛyɛ Ↄman no deɛ no nyɛ nwoma nketewa a wɔtwerɛ mu, nnabuo pono anaa bibibiara a ɛbɔ mansini no ho dawuro mma afe 2024.
- ℇsɛ sɛ wɔtwe mpuntudwuma a ɛho nhyɛ da nhia nyinaa sensɛm wɔ afe 2023 sikasɛm no mu.
