Sԑ yԑbᴐ mpenatweԑ ne ayᴐnkofa a ԑtete saa so a, deԑ yԑn mu pii no ara dwene ho ne anisoᴐ anaa mpa mu agodie, na yԑn adwene nkᴐ so sԑ yԑne yԑn adᴐfo ani bԑtumi agye wᴐ yԑn ayᴐnkofa no mu wᴐ berԑ a mpa mu agodie mpue mu. Ԑnyԑ dwumadie ne nneԑma a ԑde mpa mu agodie nam nko ara na ԑde anigyeԑ ba wᴐ mpenatweԑ mu.
Mpenatweԑ a mpa mu agodie nni mu tumi gyina pa ara ma no yԑ yie, na ԑno ne deԑ anka ԑwᴐ sԑ yԑyԑ wᴐ yԑn mpenatweԑ ayᴐnkofa mu. Nneԑma binom a ԑka akoma na ԑde anigyeԑ pii ba wᴐ hᴐ a nnipa a wᴐretwe mpena bԑtumi ayԑ wᴐ berԑ a wᴐmfa mpa mu agodie mma mu, na ԑtumi twe mo mmienu bԑn mo ho mo ho yie ma anigyeԑ ba ayᴐnkofa no mu. Wo mpentweԑ no mu bԑtumi ayԑ anika ne ahomeka ama anigyeԑ aba mo ntam. Saa akwan yi na ԑdidi soᴐ yi.
- Ԑsԑ sԑ wode w’ano kamfo wo hokani no aberԑ ne aberԑ nyinaa ma no hunu sԑ w’ani gye ne ho. Aberԑ ne aberԑ nyinaa kanfo wo mpena no, na ma ne nhunu sԑ wodᴐ no, na w’ani gye ne ho, na ԑbԑma mo ayᴐnkofa no atu mpᴐn.
- Ԑsԑ sԑ modi nkᴐmmᴐ fa biribiara ho berԑ biara. Monyԑ wei berԑ ano berԑ ano sԑdeԑ mo ahoᴐden bԑtumi. Mobԑtumi ayԑ wei wᴐ ᴐfrԑ, atwerԑ anaa sԑ morekasa wᴐ intanԑte no so ne deԑ ԑkeka ho pii a ԑboa ma nkitahodi di mu wᴐ ayᴐnkofa mu.
- Mo mmienu nyi nna bi nsi hᴐ a mode bԑyԑ biribi soronko koraa; sԑ ԑyԑ agodie, mpaebᴐ, anaa sԑ morekᴐgye moani abᴐ mu wᴐ baabi soronko bi wc berԑ soronko bi mu. Saa nna yi mu no, momma mo adwennwene nyԑ ntiantia ne nketenkete, na mommma no nnyԑ kuntann ne bebree sԑdeԑ ԑbԑma mo adwene aba mo ho mo ho so.
- Ԑsԑ sԑ nkamfoᴐ a mode bԑma mo ho no yԑ adeԑ a ԑyԑ korᴐgyenn a ntorᴐ biara nni mu. Ԑsԑ sԑ nokwaredie yԑ adeԑ a ԑhyԑ mo dᴐ no mu kena. Ma wo nkamfoᴐ no nyԑ deԑ ԑda atenka pa ara a wonya no wᴐ w’akoma mu adi.
- Ԑno akyi no, ԑsԑ sԑ mo si nsԑm bi ne mo dᴐ a mowᴐ ma mo ho no so dua berԑ ano berԑ ano. Sԑ woresi nsԑm bi so dua anaa woresi no pi no yԑ adeԑ a ԑhyԑ obi nkuran na ԑma ᴐdᴐ sᴐ, na mpo sԑ ne werԑ aho a, ԑtumi ma no nkanyan.
- Momma mo ho akyԑdeԑ nketenkete binom. Montaa nkyekyԑ mo ho akyԑdeԑ nketenkete a mo ahoᴐden bԑtumi atᴐ. Mmerԑ bi te sԑ moredi mo afedida, mo mu baako redi n’awoda, ne mmerԑ binom a ԑyԑ soronko na ԑsom bo ma mo dᴐ no mu no, mommema mo ho akyԑdeԑ, ԑfiri sԑ akyԑdeԑ nketewa ka nnipa akoma.
- Akwantuo biara a mobԑtumi akᴐ abᴐ mu no, montaa ntu mmᴐ mu. Mmeaeԑ binom wᴐ asase yi so a mo mu biara nnim. Baabi a mo sika ne mo ahoᴐden bԑtumi akᴐ no, momfa ᴐdᴐ nka mo adwene mmᴐ mu nkᴐhwԑ mo ani so adeԑ wᴐ saa mmeaeԑ yi.
Saa nneԑma yinom yԑ adeԑ a ԑhyԑ ᴐdᴐ mu den, na ԑde anigyeԑ soronko brԑ adᴐfoᴐ. Sᴐ hwԑ na di ho adanseԑ.
