Nnipa dodoɔ no ara bu akɔkono sɛ mmoa a wɔn ho yɛ nyane. Deɛ nti a ebinom susu saa ne sɛ, wɔbu saa mmoa yi sɛ wɔn ho nte ɛfiri sɛ, wɔte sɛ sonsono anaasɛ kankabi. Ɛno nti, wɔn kɔn nnɔ sɛ wɔde bi bɛka wɔn ano mpo.
Nanso, sɛdeɛ mpanimfoɔ kaeɛ no, obi akɔnnɔdeɛ ne odompo nsono. Ɛnna obi akɔnnɔdeɛ nso yɛ obi akyiwadeɛ. Yei nti, nnipa binom nso bu akɔkono sɛ wɔn aduanehene a wɔnsi no fam koraa.
Nhwehwɛmufoɔ kyerɛ sɛ, nnipa ɔpepepem 2 na wɔdi mmoa a wɔn su te sɛ akɔkono wɔ Asia, Latin Amerika ne Afrika. Wɔkyerɛ sɛ, mmoa a wɔdi no gugu mu ahodoɔ bɛyɛ mpem mmienu.
Ɛsiane sɛ tete no, na Akanfoɔ nnwuma atitire no mu baako pa ara ne abɛtwa nti, sɛ nsa no wu ma abɛ no porɔ a, na wɔnya akɔkono de si koso di ma wɔn ho bae wɔn. Akɔkono korɔ yi ara na ɔtumi ynini bɛdane asorɔmɔdwe. Asorɔmɔdwe no nso, mmɔfra kyere wɔn de wɔn di agorɔ. Ebinom nso tumi toto wɔn we.
Ɛnnɛ nso, nnipa binom ahyɛ da afa abɛɛfo kwan so ayɛ mfuo a wɔde yɛn akɔkono tɔn ma nkurɔfoɔ kɔtɔ di.
Adesua yi mu no, yɛrebɛhwɛ mfasoɔ a sɛ yɛdi akɔkono a, yɛtumi nya wɔ yɛn nipadua mu.
Anwa ne protein ahyɛ akɔkono mu ma
Animdefoɔ a wɔyɛ nnuane ho nhwehwɛmu no kyerɛ sɛ, ahoɔdennuro protein a ɛwɔ akɔkokono mu no dɔɔso pa ara. Saa ahoɔdennuro yi nso na ɛboa ma onipa ntini, ne honam ne ne nwii tumi nyini yɛ frɔmfrɔm. Afei nso, anwa a ɛboa nipadua no wɔ akwan ahodoɔ so nyɛna wɔ akɔkono mu.
Zink a ɛwɔ akɔkono mu no dɔɔso pa ara
Ahoɔdennuro foforɔ a animdefoɔ kyerɛ sɛ ɛdɔɔso wɔ akɔkono mu pa ara ne Zink. Wɔka saa ahoɔdennuro yi ho asɛm sɛ, ɛno na ɛboa ma nkwammoa a ɛwɔ yɛn mu a ɛko tia nyarewa no tumi yɛ adwuma wɔ ɔkwan a ɛfata so.
Afei nso, Zink korɔ yi ara boa ma ekuro a ɛbɛtɔ nipadua no ho biara tumi wu ntɛm. Ɛsane boa ma glukosu a ɛwɔ nipadua no mu no tumi gyinaa deɛ ɛsɛ, sɛdeɛ ɛbɛyɛ a asikyire a ɛwɔ yɛn mogya mu no remmoro so mma yɛnnya asikyire yareɛ.
Vaetamɛn B dɔɔso wɔ akɔkono mu
Animdefoɔ kyerɛ sɛ, Vaetamɛn B pii wɔ akɔkono mu. Wɔka sɛ, saa ahoɔdennuro yi na ɛboa ma nipadua no tumi twe ahoɔden a yɛhia firi nnuane a yɛdi no mu. Afei nso, ɛma yɛn honam ani yɛ fɛ, yɛn adwene yɛ adwuma yie ma yɛkae nneɛma ntɛm, na ɛboa ma nipadua no nya apɔmuden pa nso.
Ahoɔdennuro bi a wɔfrɛ wɔn kanitin ne leusin ahyɛ akɔkono mu ma
Nhwehwɛmufoɔ kyerɛ sɛ, saa ahoɔdennuro mmienu yi di akotene wɔ yɛn apɔmuden mu pa ara. Wɔka sɛ, ɛboa ma sradeɛ a ɛwɔ nipadua no mu no so te. Sradeɛ dɔɔso wɔ nipadua no mu a, ɛbɛtumi ama yɛayɛ kɛse aboro so na asane asisi akwan a ɛdeda yɛn ntini mu no. Akwan a ɛdeda yɛn ntini mu no sisi a, mogya rentumi nni aforosiane wɔ nipadua no mu sɛdeɛ ɛsɛ, na ɛno bɛtumi ama yɛanya yareɛ bi te sɛ nnwodwoeɛ ne deɛ ɛkeka ho.
Tɔfabɔ
Nsɛm a yɛabobɔ so yinom nyinaa di adanseɛ sɛ, akɔkono yɛ ɛnam bi a mfasoɔ wɔ so pa ara. Wotaa di bi deɛ a, wo tiri nkwa, sɛ wonnii bi da nso a, ebia wobɛtumi asɔ ahwɛ.
Hyɛ no nso sɛ, nsɛm yi yɛ adesua nsɛm ara kɛkɛ ɛnna akɔkono nso yɛ aduane te sɛ ɛnam biara. Enti sɛ wote nka sɛ woyare a, kɔ ayaresabea ma dɔkota nhwɛ wo.
