Nwa ka ɛnam ahodoɔ a na yɛn nananom taa di no tete no ho. Ɛyɛ ɛnam bi a na wɔntoto no ase koraa. Yei nti, na wɔde yɛ nkwan binom te sɛ abunuabunu ne abɛnkwan. Ɛtɔ da mpo a, na wɔtumi de nkyene gu mu toto we no saa ara.
Nwa biara yɛ nwa deɛ, nanso na wɔwɔ nwa mu ahodoɔ binom a ɛsono wɔn mu biara. Nwa yinom ne nwa pa, pobire, quatre-vingt(ɛyɛ French kasa a ɛkyerɛ 80). Deɛ nti a wɔfrɛ saa nwa yi quatre-vingt ne sɛ, wɔkyerɛ sɛ saa nwa yinom firi Ivory Coast bɛpuee Ghana 1980 mu. Ɛno nti na wɔfrɛ wɔn quatre-vingt no.
Nsase a nwa taa tena so pa ara yɛ nsase a ɛso yɛ nwunu pa ara. Ɛbɛtumi ayɛ kwaeɛbirentuo bi mu, asuo ho, kookoo nnua ase, abɛfuo mu, ne deɛ ɛkeka ho.
Nnipa binom adwene yɛ wɔn sɛ, nwa nyɛ nam papa biara a ɛsɛ sɛ wɔha wɔn ho te wɔn sika tɔ anaa wɔhyɛ da te wɔn ho gu nwuram sɛ wɔrekɔpɛ bi abɛyɛ aduane adi. Nanso, tete no deɛ, na yɛn nananom de kanea kɔ wuram anadwo dasuom kɔhwehwɛ nwa ɛfiri sɛ, saa berɛ no pa ara na nwa taa pue bɛdidi.
Ɛnnɛ adesua yi mu no, yɛrebɛhwɛ mfasoɔ ahodoɔ binom a sɛ yɛdi nwa a yɛnya wɔ yɛn nipadua mu.
Nwanam ne ɛho nsuo no tumi ko tia nnwodwoeɛ
Nwanam ne ɛho nsuo yɛ aduro a ɛboa nipadua no pa ara. Animdefoɔ kyerɛ sɛ, ɛnyɛ sɛ ɛbɔ onipa ho ban firi nnwodwoeɛ yareɛ no ho kɛkɛ na mmom, ɛtumi boa ma obi a wadwodwo tumi kentene ne ho bio. Deɛ nti a ɛte saa ne sɛ, wɔkyerɛ sɛ, sɛ wodi nwa a ɛboa ma w’adwene no tumi yɛ adwuma bɔkɔɔ sɛdeɛ nipadua no hia.
Nwa ho nsuo no nso tumi ko tia mogyaborosoɔ. Nhwehwɛmufoɔ ka sɛ, sɛ onipa mogya yɛ adwuma ntɛntɛm ma no boro sɛdeɛ anka ɛsɛ sɛ ɛyɛ no so a, ɛtumi de nnwodwoeɛ ba. Yei nti, wodi nwa a, ɛboa ma mogya di aforosiane wɔ nipadua no mu wɔ ɔkwan a ɛfata so na amma woannya nnwodwoeɛ yareɛ no bi. Ɛno nti, sɛ wodi nwa na wonom ɛho nsuo no a, mfasoɔ kɛseɛ wɔ so pa ara.
Nwanam bɔ w’akoma ho ban firi akomayareɛ ho
Ɛsiane sɛ nwa boa ma mogya di aforosiane wɔ nipadua no mu sɛdeɛ ɛsɛ nti, sɛ wodi nwa na wonom ɛho nsuo no a, ɛboa ma w’akoma nso yɛ adwuma yie pa ara.
Afei nso, ahoɔdennuro bi a wɔfrɛ no Omega 3 a ɛbɔ nipadua no ho ban firi akomayareɛ ne nnwodwoeɛ ho no ahyɛ nwa mu ma.
Omega 3 so mfasoɔ foforɔ nso ne sɛ,
- Ɛboa ma mmɔfra adwene tumi yɛ adwuma yie, na ɛma wɔkae adeɛ nso
- Ɛsi akomayareɛ ano kwan
- Ɛma mogya di aforosiane wɔ nipadua no mu sɛdeɛ ɛsɛ
- Ɛboa ma onipa ani tumi hunu adeɛ yie pa ara
- Apemfoɔ di a, ɛma wɔn mma a wɔbɛwo wɔn no ho yɛ den pa ara na wɔn adwenem bue yie nso
- Ɛma mmɔfra tumi nyini yie
Ahoɔdennuro a wɔfrɛ no protein ahyɛ nwa mu ma
Yɛka ɛnam a ɛma protein nyinaa bɔ mu a, ɛmu biara nni hɔ a protein a ɛwɔ mu no dɔɔso kyɛn deɛ ɛwɔ nwa mu. Nantwinam o, tuna o, aponkyenam ne deɛ ɛkeka ho nyinaa, protein a ɛwɔ nwa mu no dɔɔso kyɛn wɔn.
Abemfoɔ kyerɛ sɛ, protein boa ma nipadua no tumi hyehyɛ wɔ ɔkwan a ɛfata so, na ɛsane nso boa ma nipadua no nyini frɔmfrɔm. wɔka sɛ, nipadua akwaa biara hia protein na atumi anyini yie. Yei nti, yɛn ntini, yɛn ho nwii, ne yɛn honam nyinaa hia protein.
Sradeɛ a ɛwɔ nwa mu no sua
Ɛsiane sɛ sradeɛ kakraa bi na ɛwɔ nwa mu nti, sɛ wodi nwa a, ɛboa wo yie pa ara. Ɛboa sɛdeɛ ɛbɛyɛ a sradeɛ rennɔ wɔ wo ntini mu mma no nkɔfa nnwodwoeɛ anaa yareɛ foforɔ biara mmrɛ wo. Bio, ɛsane boa ma onipa nyini nkakrankakra, na ɛma ne ho yɛ fɛ nso.
Nhwehwɛmufoɔ kyerɛ sɛ, obi di nwa a, ɛma asikyire a ɛwɔ ne nipadua mu no so te na ɛbɔ wɔn ho ban firi asikyire yareɛ ho.
Ahoɔdennuro te sɛ Vaetamɛn ne afoforɔ binom ahyɛ nwa mu ma
Nwanam so mfasoɔ baako a ɛma no da nso yie pa ara ne sɛ, ahoɔdennuro a ɛwɔ mu no dɔɔso yie pa ara.
Yei kyerɛ sɛ, sɛ onipa di nwa a mfasoɔ wɔ so pa ara. Nwa deɛ, ɔpanin o, abɔfra o, obiara bɛtumi adi bi. Vaetamɛn ahodoɔ a ahyɛ nwa mu ma no binom ne Vaetamɛn A, E, B1, B3, B6 ne B12.
Vaetamɛn E a ɛboa hohoro nipadua no mu no da nkyɛn a, Vaetamɛn B1, B3, B6 ne B12 nyinaa boa ma nipadua no ko tia asikyire yareɛ.
Vaetamɛn A nso boa ma nipa ani tumi yɛ adwuma yie pa ara.
Vaetamɛn E so mfasoɔ foforɔ nso ne sɛ, ɛbɔ yɛn ani, yɛn honam, yɛn nofo ne yɛn berɛboɔ ho ban.
Mfasoɔ ahodoɔ a yɛnya firi nwa mu a mabobɔ so yinom da nkyɛn a, ahoɔdennuro afoforɔ te sɛ, Selenium, Fosforɔs, Magnisium ne Triptofan ahyɛ nwa mu ma. Saa ahoɔdennuro yinom nyinaa nso ho hia wɔ nipadua no mu pa ara.
Tɔfabɔ
Nsɛm a mabobɔ so yinom nyinaa da no adi sɛ, mfasoɔ wɔ so pa ara sɛ yɛbɛdi nwa da biara. Hyɛ no nso sɛ, nwa yɛ aduane te sɛ ɛnam biara, na mmom ɛnyɛ aduro. Yei nti, sɛ wote nka sɛ woyare a, ɛbɛyɛ papa sɛ wobɛkɔ akɔhunu wo dɔkota ama no aboa wo.
