Wonim sɛ korɔnobɔ binom yɛ yadeɛ? Mennye nni sɛ dodoɔ no ara nim wei. Ghana mmara, ɔsom ahodoɔ, sukuu ahodoɔ ne akuo pii kasa tia korɔnobɔ. Obiara nim sɛ obi a ɔbɔ korɔno biara no hyɛ da ara tena ase dwene deɛ ɔpɛ sɛ ɔkɔwia ne kwan a ɔbɛfa so ho, na afei watu ho anammɔn. Nanso wonim sɛ ɛnyɛ korɔno biara na obi boapa bɔ? Aane, ebi yɛ yadeɛ a ɛda nipa no so. Ɛno ne klɛptomania, korɔnobɔ yadeɛ. Momma yɛnkenkan pii mfa ho.
Klɛptomania a ɛyɛ korɔnobɔ yadeɛ yi yɛ adwene mu haw a ɛmma obi ntumi nhyɛ ne ho so wɔ nneɛma a ɔnhia ho korɔnobɔ mu. Nneɛma a wɔn a wɔwɔ yadeɛ yi bi taa wia no yɛ nneɛma a ɛso nhyɛ da nni mfasoɔ biara a ɛno nti, wodwene ho a wobɛtumi ate wɔn ase kakra mpo wɔ deɛ nti a wɔbɔɔ ho korɔno. Mpɛn pii no nso nneɛma a wɔtaa bɔ ho korɔno no yɛ deɛ wɔn ankasa bɛtumi de wɔn sika atɔ mpo.
Korɔnobɔ yadeɛ yi ntaa nni nnipa pii so deɛ, nanso ɛyɛ hu pa ara ma wɔn a wɔwɔ yadeɛ yi. Wɔn a wɔwɔ saa haw yi no apɔmuden wɔ wɔn atenka mu no wɔ fam ɛsiane sɛ yadeɛ yi bɛyɛ adesoa ne animguaseɛ ma wɔn ne mpo wɔn mmusua. Ɛwom, aduro biara nni hɔ a ɛbɛtumi asi ano kwan seesei deɛ, mmom nnuro a ɛtumi hyɛ atenka so no boa wɔn a wɔte saa no sosɔ yadeɛ yi ano nkakrankakra.
Nsɛnkyerɛnneɛ a ɛda adi sɛ obi wɔ korɔnobɔ yadeɛ yi bi.
- Obi a ɔwɔ yadeɛ yi bi no ntumi nhyɛ ne korɔnobɔ atenka so. Ɔnya korɔnobɔ ho atenka kɛseɛ pa ara ma no didi mu kɔwie korɔnobɔ no ankasa.
- Ɔbɔ nneɛma ahodoɔ a ɛho nhia no, na mpo ɔbɛtumi atɔ no ho korɔno. Saa nneɛma yi bi tumi yɛ borɔniba, obi mpaboa fa, atere ne deɛ ɛkeka ho.
- N’ani gye ne ho kɛse berɛ a ɔrebɔ korɔno no.
- Korɔnobɔ no akyi no, ehu bɔ no, ne yam hye no, ɔnu ne ho, ɔtan ne ho, na ɔnya ayamhyehyeɛ sɛ apolisifoɔ nsa bɛka no.
- Deɛ yɛadi kan abobɔ so yi nyinaa sane hyɛ aseɛ bio.
Esu a ɛwɔ wɔn a wɔwɔ klɛptomania yi ho.
- Wɔn a wɔwɔ korɔnobɔ yadeɛ yi mmɔ nneɛma ho korɔno ɛnam mfasoɔ a wɔrepɛ afiri so nti. Wɔbɔ korɔno no kɛkɛ ɛnam sɛ wɔntumi nhyɛ saa korɔnobɔ yi atenka so.
- Korɔnobɔ atenka yi ba wɔn mu mpofirem, we enti ɛnyɛ adeɛ a wɔboa pa tena ase hyehyɛ ho.
- Wɔn a wɔwɔ yadeɛ yi taa bɔ korɔno wɔ mmeaeɛ a dɔm wɔ te sɛ faako a sotɔɔ pii wowɔ anaa adetɔnbea. Ebinom nso tumi wia firi wɔn nnamfonom ne wɔn abusuafoɔ nkyɛn.
- Korɔnobɔ no akyi, wɔtaa to nneɛma a wɔkɔwiaeɛ no gu, wɔde kyɛ afoforɔ, wɔn nnamfonom anaa wɔn abusuafoɔ, ebinom nso wia wɔn ho sane de nneɛma no kɔ faako a wɔkɔfa firiiɛ no.
- Saa atenka yi ba sane te kɔ berɛ biara. Ɛtɔ da a atenka no boro so pii, ɛtɔ da nso a ɛba fam kakra.
Wokari wo ho na wohunu sɛ wowɔ saa yadeɛ yi bi a, ntɛm pa ara kɔhunu wo dɔkota na ɔmfa mmoa kakra a ɛwɔ hɔ no mmoa wo. Mpɛn pii no ɛyɛ a wɔn a wɔwɔ saa yadeɛ yi mpɛ sɛ wɔbɛkɔ ayaresabea akɔgye ayaresa. Dodoɔ no ara suro wɔkɔ hɔ a ɛnam nneɛma a wɔakɔwia no nti, adɔkotafoɔ no bɛbɔ apolisifoɔ amanneɛ ama wɔde wɔn akɔto afiase. Nanso ɛntaa nsi sɛ sɛ ɔyaresafoɔ anaa dɔkota a ɛsɛ sɛ ɔhwɛ wo na ɔboa wo si wo yadeɛ ano no de w’asɛm bɛduru apolisifoɔ anim.
Deɛ ɛde yadeɛ yi ba
Hyɛ no nso, saa korɔnobɔ yadeɛ yi nhyɛ da nni adeɛ pɔtee a ɛde ba, ɛno nso ka ho bi nti na ano aduro a ɛbɛtumi asi ano koraa nso nni hɔ yi. Mmom, sɛ saa yadeɛ bi wɔ obi abusua mu, ɛtumi bɔ kwan nso ma afoforɔ a wɔwɔ abusua no mu nya bi saa ara.
Ɔhaw a korɔnobɔ yadeɛ yi de ba
Ɛnam sɛ saa nkurɔfoɔ yi nim sɛ korɔnobɔ nyɛ, nanso wɔbɔ korɔno ɛnam sɛ wɔntumi nhyɛ wɔn ho so nti, wɔyɛ basaa wɔ korɔnobɔ no akyi, na wɔnu wɔn ho.
Saa yadeɛ yi nti wɔakyere ebinom akɔto afiase.
Ɛde adwennwene to wɔn a wɔwɔ yadeɛ yi so, na wɔmpɛ sɛ wɔbɛka wɔn ho akɔ nnipa mu.
Ebinom ahwere wɔn nkwa ɛnam biribi a wɔkɔfaeɛ maa ɛhɔ nnipa boroo no nti.
Wɔn ankasa nsu tumi dwene ho sɛ wɔbɛgye wɔn nkwa afiri wɔn nsam ɛnam animguaseɛ a ɛde ba no nti.
Wɔn a wɔwɔ yadeɛ yi abusuafoɔ ne adɔfoɔ
Abusua a wɔn dehyeɛ wɔ saa haw yi bi no mmɔ wɔn ho mmɔden sɛ wɔbɛka abɛn no. Ɛwom, animguaseɛ no bi bɛka wɔn deɛ, nanso wɔnte wɔn busuani no ase sɛ ɛnyɛ ne pɛ, mmom ɛyɛ yadeɛ. Wɔnkyekyere ne werɛ, na wɔmma wɔn ani nkɔ ne ho berɛ biara a wɔne no nam nnipa mu anaa babiara.
Ɔkenkanfoɔ anaa ɔtiefoɔ a wowɔ yadeɛ yi bi nso, mma ehu nhyɛ wo mu na nsuro sɛ wobɛkɔ ayaresabea. Dɔkotani biara nni hɔ a ɔde wo yadeɛ no bɛpue apolisifoɔ anim ama wɔabɛkyere wo. Bɔ wo ho mmɔden nso sɛ wobɛnom nnuro ahodoɔ a wɔde bɛma wo sɛdeɛ ɛbɛyɛ a korɔnobɔ atenka a ɛba ano bɛkɔ fam.
