Woate edin Mr. Bean pɛn? Na KFC nso ɛ? Wonim deɛ ɔhyɛɛ aseɛ? Wonim sɛ saa nkurɔfoɔ yi nyɛ Ghanafoɔ? Ɛnneɛ ɛyɛɛ dɛn na wɔn ho asɛm aduru ha yi? Megye di sɛ wɔn yie ho asɛm nko ara na woate, na wɔn brɛ nso ɛ? Wonim sɛ nnipa poo wɔn mprɛ pii wɔ deɛ yɛnim sɛ wɔbɔ mu mmɔden no ho? Momma yɛnkenkan wɔn abrabɔ mu nsɛm no fa bi ɛ. Ɛhyɛ yɛn nkuran, na ɛkyerɛ yɛn nsiyɛ.
Rowan Sebastian Atkinson
Rowan Sebastian Atkinson yɛ nsɛnkwaayifoɔ. Edin a dodoɔ no ara de nim no ne Mr. Bean. N’awofoɔ din ne Ella May ne Eric Atkinson. Wɔwoo no Ɔpɛpɔn 6, 1995 wɔ Newcastle a ɛwɔ England. Ɔne ne n’awofoɔ mma mu deɛ ɔtɔ so nnan ne deɛ ɔtwa toɔ. Na ne papa Eric Atkinson yɛ okuani. Ɔyɛ obi a na ɔhoro so, ɛno nti na asuafoɔ a ɔne wɔn kɔ sukuu korɔ mu no di n’ani yie. Na wɔsane di n’ani ɛsiane sɛ na wɔsusu sɛ ɔnyɛ obi a ne ho yɛ fɛ. Wei maa no bɛyɛɛ obi a ɔnka ne ho nkɔ nnipa mu na ɔsane fɛre adeɛ nso. Ɛno ara so nti na ɔsane nni nnamfoɔ biara.
Ɔduruu Suapɔn mu no, ɔnyaa anigyeɛ wɔ sinitwa mu, nanso ɛnam sɛ na ɔhoro so na ɔntumi nkasa yie nti na ɛmma no nya mu kwan berɛ a biara. Na nipa a ɔde no asi n’ani so a na ɔpɛ sɛ ɔbɔ ne ho mmɔden sɛ ɔno yɛ nsɛnkwaayifoɔ Charlie Chaplin. Ɛnam nsɛnkwaayie no mu kwan a wannya nti, ɔde n’ani kyerɛɛ mfidie a ɛde anyinam ahoɔden di dwuma no ho adesua ho. Ne nsa kaa wei ho abodin nkrataa wieeɛ ara pɛ, ɔyɛɛ n’adwene sɛ ɔbɛhwɛ ama ne daeɛso aba mu.
Ɔde ne ho kɔbataa nsɛnkwaayifoɔ bi, nanso horo a ɔhoro so no sane sii ne kwan, ɛno nti wɔamfa no. Mmeaeɛ ahodoɔ a ɛwɔ Tv so a wɔyi nsɛnkwaa wɔ Tv so saa berɛ no nyinaa poo no. Nanso mprɛ dodoɔ a wɔpoo no no nyinaa akyi, wamma gyidie a ɔwɔ wɔ ne mu no anyera. Na ɔnim pefee sɛ ɔbɛtumi abɔ ne ho mmɔden wɔ nsɛnkwaayie mu. Ɔhunuu sɛ horo a ɔhoro so no bɛsi ne kwan wɔ ne daeɛso mu a, ɔbɛtumi de n’anim ne ne nipadua akwaa no bi akasa ama no ayɛ sere wɔ berɛ a ɔremmue n’ano. Ɔde yɛɛ adwuma saa wɔ sini a dodoɔ no ara nim no sɛ ‘Mr. Bean’ mu. Ɛnnɛ, ɛrekame ayɛ sɛ obiara nim edin Mr. Bean, nanso dodoɔ no ara nnim ne din ankasa mpo. Nnipa pii na wɔate sika akɔtɔ nsɛnkwaa ho sini a Rowan ayi no mu bebree ahwɛ, ɛnnɛ nso, dodoɔ no ara kɔ abɛɛfo ntentan so kɔpɛ ne sini ahodoɔ a ɛyɛ anika bi te sɛ ‘The tall guy’, ‘Never say never again’, ‘Johnny English’, ‘Mr. Bean’ a obiara de frɛ no seesei ne afoforɔ pii a ɛkeka ho hwɛ.
Ampa ara, deɛ na ɔhoro so a na nnipa mmu noɔ no, ɛnnɛ nnipa pu bɛhwɛ no, wɔhunu no a wɔn ani gye, na ɔka ne ho a, sereɛ hyɛ obiara mfono mu ma. Ne daeɛso no aba mu ampa.
Colonel Harland David Sanders
Colonel Sanders yɛ Amerikani a wɔwoo no wɔ Ɛbɔ 9, 1890. Ɔdii mfeɛ nnum no na ne papa hweree ne nkwa, ɔnyaa mfeɛ du nsia no nso na ɔgyaee sukuukɔ. Ɔnyaa mfeɛ du nson no nso wɔyii no adi firii nnwuma ahodoɔ nnan a na ɔyɛ nyinaa mu. Ɔwareeɛ berɛ a na wanya mfeɛ du nnwɔtwe a na ɔsane yɛ adwuma wɔ keteke hyɛn gyinabea, ɔnyaa mfeɛ du nkron no ɔwoo ɔbabaa. Mfeɛ aduonu na ne yere yi gyaa no awadeɛ de wɔn babaa no kɔeɛ. Ɔnyaa mfeɛ aduonu mmienu no, ɔnyaa kwan wɔ asɔgyafoɔ adwuma mu, ɔtwerɛɛ krataa de pɛɛ mmara ho sukuu kwan, nanso mprɛ dodoɔ a na ɔtwerɛ kɔ biara no na ɔnnya mu kwan, nsane nnya nnwuma ahodoɔ a na ɔtwerɛ kɔ mu no mu kwan. Mmerɛ kakra akyi no, ɔnyaa adwuma wɔ adwumakuo bi a ɔmamfoɔ de wɔn sika sie wɔ hɔ sɛdeɛ wɔn ho kyere wɔn a adwumakuo no bɛboa wɔn mu, a na ɔma wɔn ɛho afotuo.
Ɔnyaa mfeɛ aduosia nnum no, ɔkɔɔ ahomegyeɛm wɔ n’adwumayɛ mu, nanso awerɛhosɛm ne sɛ, na sika a adwumakuo no de gyaa no kwan no sua yie, a na ɛrentumi nhwɛ no ahen biara. Wei haa no yie ma mpo ɔsusuu ho sɛ ɔbɛgye ne nkwa afiri ne nsam, ɛsiane sɛ na ɔnhunu kwan biara a ɔbɛtumi afa so de saa sika ketewa no ahwɛ ne ho bosome biara. Ɔpɛɛ dua bi ase tenaeɛ a na ɔretwerɛ ne wuo ho krataa ne ne nsamanseɛ. Ɛhɔ ara na ɛbɛsii ne tirim sɛ ɔbɛtumi ayɛ biribi na wanya ɛho sika. Ɛno nti na wasi ne bo sɛ ɔbɛhyɛ abrabɔ ase foforɔ wɔ saa mfeɛ no mu. Ɔhunuu sɛ pii na ɔnyɛɛ wɔ n’abrabɔ mu. Adeɛ baako a na ɔgye ne ho di sɛ ɔnim yɛ sene obiara yɛ aduanenua. Deɛ na ɔbɔ ne ho mmɔden pa ara wɔ mu yɛ akokɔnam ho adwuma. Na ɔwɔ akadeɛ ne kwan soronko bi a ɔfa so kye no ma ne dɛ no da nso firi obiara deɛ ho. Ɔpɛɛ bosea de totɔɔ ɛho akadeɛ a ɔbɛhia nyinaa ara, afei ɔhyɛɛ akokɔnamkyeɛ no ase. Deɛ na ɔyɛ ne sɛ, ɔwie biara a na ɔde kɔ afie afie a ɛwɔ ne mpɔtam mu hɔ, Kentucky kɔtɔn. Adidibea ahodoɔ a na ɔpɛ sɛ ɔde n’akokoɔnam yi kɔ hɔ kɔtɔn nso nyinaa ampɛ sɛ wɔne no yɛ adwuma. Adidibea ahodoɔ 1,009 na poo no a wɔannye n’akokɔnam no anto mu.
Adidibea ahodoɔ no mu deɛ ɛtɔ so 1,010 na gye too mu sɛ wɔne no bɛyɛ adwuma. Ɛha na KFC hyɛɛ aseɛ. KFC no gyina hɔ ma ‘Kentucky Fried Chicken’ a ɛkyerɛ sɛ ‘akokɔnam a yɛakye wɔ Kentucky’. Ɔnyaa mfeɛ aduowɔtwe nnwɔtwe no, na saa adwuma no ama no anya sika pii, ama saa adidibea a wɔgyee no too mu no nso mu atrɛ kɛse asane agye din yie. Ɔtɔnn KFC adwumakuo yi saa berɛ no de gyee sika kɛseɛ. Seesei, KFC wɔ nkorabata bɛboro 20,000 wɔ aman ahodoɔ 123 mu a Ghana ka ho bi. Ɔdii mfeɛ aduokron no na ɔhweree ne nkwa wɔ Ɔpɛnimaa 16, 1980. Berɛ biara a yɛbɛtumi abɔ mmɔden akɔ KFC adidibea no, yɛbɛhunu sɛ Colonel Sanders mfoni bɔ adidibea hɔ anaa adeɛ a wɔde deɛ woatɔ no hyɛ mu no ho. Ɛwom sɛ ɔtɔnn KFC no deɛ, nanso ɛsiane sɛ ɛnam ne so baeɛ nti, ne din ne ne mfoni mpa mu da.
Atitire baanu yi abrabɔ mu nsɛm kyerɛ yɛn adeɛ baako, wowɔ deɛ wobɛtumi de adi dwuma na woadi yie anaa woayɛ nkonimdifoɔ. Mma w’abam mmu, mfeɛ biara nni hɔ a ɛkyerɛ sɛ woaka akyiri wɔ abrabɔ mu ɛno nti worentumi nhyɛ biribi ase. Tu wo daeɛso ho anammɔn seesei, na nya gyidie wɔ deɛ wotumi yɛ mu, mpo wɔ mmerɛ dodoɔ a nnipa anaa adwumakuo ahodoɔ bɛpo wo no akyi. Mma wo werɛ mfiri sɛ, wobɛtumi ayɛ biribiara.
