Yɛwɔ mmerɛ ahodoɔ binom a ewiem tebea tumi sesa wɔ aman ahodoɔ so. Aman binom so no, ɛbɔ akɛseɛ tumi sisi, asɔkɔtwea tumi tɔ firi soro, awɔ a ano yɛ den tumi ba, ne deɛ ɛkeka ho.
Ghana ha deɛ, mmerɛ ahodoɔ atitire mmienu na yɛwɔ. Ɛnonom ne nsutɔ berɛ ne ɔpɛ berɛ. Mpɛn pii no, nsutɔberɛ no tumi hyɛ aseɛ firi Ɔgyefuo bosome no mu kɔsi Kitawonsa bosome no awieeɛ. Ɛduru mmerɛ binom mu mpo a, ɛtumi wura Ɛbɔ ne Obubuo bosome no mu. Bosome a nsuo taa tɔ wɔ mu pa ara ne Ayɛwohomumɔ bosome no mu. Ɛduru saa berɛ no a, nsuo ne mframa a ano yɛ den tumi di afra.
Ɛsiane mframa gyampanturudu a ɛtumi bɔ berɛ a nsuo retotɔ wɔ Ghana nti, ɛho hia pa ara sɛ yɛyɛ nneɛma binom de bɔ yɛn ho ban sɛdeɛ ɛbɛyɛ a sɛ nsuo no tɔ berɛ a yɛn ani nna a, yɛbɛtumi atwitwa agye yɛn ho.
Adesua yi mu no, yɛrebɛsusu akwan dunum binom a yɛbɛtumi afa so abɔ yɛn ho ban wɔ nsutɔ berɛm.
1. Pɛ nneɛma binom a wobɛtumi de anante nsuom
Ɛduru nsutɔ berɛ a, ɛho hia pa ara sɛ wobɛpɛ nneɛma binom te sɛ kyiniiɛ ne kootu a wɔde nante nsuo mu aka wo ho. Afei nso, wobɛtumi apɛ mpaboa a wobɛtumi de anante atɛkyɛ mu anaasɛ mpaboa a aseɛ nyɛ toro a wobɛtumi ahyɛ de anante nsuom sɛdeɛ ɛbɛyɛ a, sɛ woduru baabi a nsuo ayiri a, wobɛtumi atwa no asomdwoeɛm.
2. Wobɛtumi adware nsuohyeɛ
Animdefoɔ kyerɛ sɛ, sɛ nsuo boro wo ma awɔ te gu wo so a, ɛbɛyɛ papa sɛ wobɛdware nsuohyeɛ. Wɔkyerɛ sɛ, yei bɛtumi abɔ wo ho ban na woannya papuu ɛsiane awɔ a awura wo mu no nti.
3. Ɛbɛyɛ yie a, pɛ baabi gyina ma nsuo no ntɔ nwie
Wonam na wohunu sɛ nsuo amuna anaa ɛrepetepete, na mpofirem ara nsuo no gyae gu kitikiti a, mfasoɔ wɔ so pa ara sɛ wobɛdi kan apɛ baabi abɔ wo ho adwaa ama nsuo ate anaasɛ ano abrɛ ase kakra. Deɛ ɛsɛ sɛ wohyɛ no nso ne sɛ, ɛsɛ sɛ wohwɛ hunu sɛ baabi a worekɔgyina no nyɛ baabi a nsuo bɛtumi ayiri afa hɔ, anaasɛ apata anaa ɛdan a wogyina aseɛ no nyɛ deɛ mframa fa a ɛbɛtumi abu agu wo so. Yei nti, sɛ wowɔ baabi na wohunu sɛ nsuo afiri aseɛ remuna a, ɛbɛyɛ papa sɛ wobɛyɛ no ntɛm akɔ fie anaa woakɔpɛ baabi papa abɔ wo ho adwaa.
4. Hwɛ wo ho yie wɔ ayerɛmoo ne agraada ho
Nyansahyɛ a animdefoɔ de ama ne sɛ, sɛ nsuo retɔ a, ɛnyɛ papa sɛ wode wo ho bɛtwere nnadeɛ anaa wobɛgyinaa baabi a waya bebree gugu ɛfiri sɛ, saa nneɛma no bɛtumi atwe anyinam kanea afiri ayerɛmoo no mu ama no akiki wo. Bio nso, sɛ nsuo retɔ a, ɛnyɛ papa sɛ wobɛgyina nnua ne nnadeɛ a wɔde anyinam nkanea afa so no mu biara ase ɛfiri sɛ, anhwɛ a na ayerɛmoo no ama anyinam kanea no akye wo akum wo.
5. Kata amena biara a ɛwɔ wo fie no so
Ɛduru nsutɔ berɛm a, ɛnyɛ papa sɛ wobɛbuebue amena so wɔ wo fie. Deɛ nti ɛte saa ne sɛ, sɛ nsuo tɔ a, ɛbɛtumi akɔgyina amena no mu ama no apae ntontom. Yɛn nyinaa nso nim sɛ, ntontom yinom na wɔde atiridii yareɛ berɛ nnipa. Yei nti, sɛ amena bi da wo fie na wosi no na sɛ ɛnyɛ yie a, wohunuu sɛ nsuo amuna ara pɛ, pɛ adeɛ kata so.
6. Mfa wo nan ntoto fam nnante nsutɔ berɛm
Nsuo retɔ a, ɛnyɛ papa sɛ wobɛworɔ wo mpaboa de wo nan saa ara anante nsusuan ne atɛkyɛ no mu. Woyɛ saa a, ɛbɛtumi ama biribi awɔ wo. Afei nso, ɛsiane sɛ nneɛmafunu ne agyanan ne dwonsɔ adi fra wɔ nsusuan no mu nti, sɛ wode wo nan sisi mu saa a, mmoawa binom bɛtumi awura wo nipadua mu akɔfa yareɛ koankorɔ binom abrɛ wo.
7. Ɛsɛ sɛ wopɛ nneɛma a wɔde ko ogyahyehyeɛ
Ɛduru nsutɔ berɛm a, ɛho hia pa ara sɛ wonya nneɛma binom a wobɛtumi de ako ogyahyehyeɛ wɔ wo afie anaa w’adwuma mu. Mpɛn pii no, ayerɛmoo a ɛtete ne agradaa a ɛdwa no tumi ma ogya totɔ mmeaeɛ binom. Yei nti, ɛho hia pa ara sɛ wonya nneɛma binom a wobɛtumi de ako ogyahyehyeɛ wɔ wo nkyɛn sɛdeɛ ɛbɛyɛ a sɛ ogya tɔ baabi a wowɔ no prɛko pɛ a, wobɛtumi ako kakra ansa na woahwehwɛ mmoa afiri afoforɔ hɔ.
8. Nom nsuo a ɛho te
Ɛduru osutɔ berɛ a, ɛsɛ sɛ woyɛ ahwɛyie wɔ nnuane ne nsuo a wotɔ no mmɔntene so no ho. Berɛ biara, ɛsɛ sɛ wohwɛ hunu sɛ nneɛma a wodi kɔ wo yam no yɛ deɛ ɛho te na ankɔfa nyarewa biara ammrɛ wo. Sɛ ɛbɛyɛ yie mpo a, ɛsɛ sɛ wote nnuane a wotɔ no abɔntene no so ɛfiri sɛ, nnipa dodoɔ no ara de nsufi a wɔsɔ firii soro no ara na ɛyɛ nnuane bɛtɔn ma nkurɔfoɔ. Yei nti, yɛ ahwɛyie pa ara esiane sɛ sɛ eduru nsutɔ berɛm a, nkurɔfoɔ taa nya nyarewa ahodoɔ a yɛnya firi nsufi mu no bi pa ara.
9. Hohoro wo nsa berɛ ano berɛ ano
Ɛsiane sɛ mmoawa a wɔma nyarewa binom taa tu atese wɔ nsutɔ berɛm nti, ɛsɛ sɛ wohohoro wo nsa berɛ biara ansa na woadidi. Yei bɛtumi abɔ wo ho ban na woannya nyarewa no bi.
10. Tie ewiem tebea ho amannebɔ
Nsutɔ berɛm no, radio ne TV ahodoɔ taa de ewiem tebea ho amannebɔ bɛto dwa nnɔnhwere aduonu-nan ntam ansa na deɛ wɔkaa ho asɛm no asi. Yei nti, sɛ ɛduru saa berɛ no a, ɛsɛ sɛ wotaa tie ewiem tebea ho nsɛm na wohunu deɛ ɛbɛsi sɛdeɛ wobɛtumi ada wo ho so berɛ biara.
11. Pɛ ntaadeɛ a ɛmu yɛ duru a wɔde ko awɔ
Awɔ kɔ mmɔfra ne mpanimfoɔ nyinaa mu a, wɔbɛtumi anya papuu. Yei nti, sɛ ɛduru nsutɔ berɛm a, bɔ mmɔden sɛ wobɛyna ntaadeɛ a ɛmu yɛ duru a wɔde ko awɔ ama mmɔfra no na wo nso woapɛ bi akata wo ho. Yei bɛtumi aka mo hye na awɔ anwura mo mu ankɔfa ɔhaw biara ammrɛ mo.
12. Pɛ nɔma a mobɛtumi afrɛ ahokyerɛ berɛm
Ɔkwan baako a wobɛtumi afa so abɔ wo ho ban wɔ nsutɔ berɛm ne sɛ wobɛtwerɛ nɔma bi a mobɛtumi afrɛ berɛ a atoyerɛnkyɛm bi ato mo. Twerɛ saa nɔma no gu adeɛ so na fa tare baabi a obiara bɛhunu. Atoyerɛnkyɛm bi si mpofirem a, yei bɛtumi aboa pa ara.
13. Pɛ kanea bi sie
Ɛduru nsutɔ berɛm a, wɔtaa dunnum nkanea ɛsiane mframa ne ayerɛmoo no nti. Yei nti, ɛbɛyɛ yie a, ɛsɛ sɛ wonya kanea bi a wobɛtumi asɔ berɛ biara a wɔbɛdum kanea wɔ wo fie anaa wo mpɔtam hɔ no. Yei bɛtumi aboa ama moahunu kwan mu atoto nneɛma yie berɛ a osuo retɔ.
14. Di beaeɛ a wote no ni
Nsutɔ berɛm no, adeɛ baako a ɛtaa ma nsuo yiri sɛe nneɛma pa ara ne gota ahodoɔ a nkurɔfoɔ toto nwura gu mu. Yei nti, ɛduru nsutɔ berɛ a, ɛsɛ sɛ wosiesie wo fie de nneɛma gugu yie, na woyiyi gota ne bɔnka ahodoɔ biara a ɛbɛn wo no mu sɛdeɛ ɛbɛyɛ a sɛ osuo no retɔ a, nsusuan no bɛtumi anya baabi afa, na ankɔfa nsuyiri biara amma.
15. Hwɛ wo nanteɛ mu yie
Nsuo totɔ a, ɛma mmeaeɛ ahodoɔ binom tumi yɛ toro pa ara. Yei nti, ɛho bɛhia pa ara sɛ wobɛhwɛ wo nanteɛ mu yie na woahyɛ mpaboa a aseɛ nyɛ toro. Afei nso, sɛ worenante nsuom a, ɛnsɛ sɛ wopere wo ho. Mmom, ɛsɛ sɛ wotu wo nan nkakrankakra sɛdeɛ ɛbɛyɛ a worenhwe ase.
Tɔfabɔ
Ɛduru nsutɔ berɛ a, ɛho hia pa ara sɛ yɛhwɛ yɛn ho yie na yɛboaboa yɛn ho nso na yɛamfa yɛne aforoɔ nkwa anto asiane mu.
