Tumi kɛseɛ wɔ tɛkrɛma anaa kasa mu. Asɛm biara a ɛpue firi yɛn anom ba no kɔwie wɔ papa anaa bɔne mu. Nnipa binom nam wɔn tɛkrɛma so ama afoforɔ redi yea, rebrɛ sane rekɔ ahohiahia mu wɔ abrabɔ mu, ebinom nso nam tɛkrɛma yi ara so ama afoforɔ redi yie. Yɛnam akenkan yi so bɛhunu akwan ahodoɔ a yɛn kasa nya nsunsuansoɔ papa ne bɔne wɔ afoforɔ so.
* Yɛtaa te sɛ, ano a ɛdi mako ne nkyene no, ɛno ara na yɛde dome. Berɛ biara a yɛka nnome nsɛm to yɛn ankasa anaa afoforɔ abrabɔ so no, ɛyɛ adwuma saa pɛpɛɛpɛ. Ankorɛankorɛ bi tumi se ne ho sɛ, ‘Yadeɛ wei ara na ɛde me bɛkɔ owuo mu’, ‘Nti mfasoɔ bi wɔ me so?’ ‘Mebaa wiase koraa bɛyɛɛ deɛn ni?’ ‘Nti abrabɔ yi bɛyɛ yie ni?’ Hyɛ no nso sɛ mprɛ dodoɔ woreka saa nsɛm yi kyerɛ wo ho no, mprɛ dodoɔ no ara na na ɛrenya nsunsuansoɔ bɔne wɔ wo so, na woanhwɛ yie a saa yadeɛ no ara nso de wo bɛkɔ owuo mu, mfasoɔ biara mma wo so da, worehunu deɛ nti a wowɔ asase yi so, na abrabɔ no nso renyɛ yie da. Awofoɔ binom nso de wɔn kasa dome wɔn mmɔfra dabiara. Wɔtumi se wɔn ankasa yafunu mu ba sɛ ‘Wo deɛ wobɛbrɛ pa ara’, ‘Ɛrensi wo yie’, Wonya mfeɛ aduasa wɔ asase yi so koraa a anka sere me.’ Wɔn werɛ firi sɛ nsɛm a wɔka kyerɛ wɔn mma daa no bɛyɛ adwuma da bi. Nnome nsɛm a ɛtete sei no tumi di nipakorɔ no akyi mfeɛ pii. Ɔwofoɔ, so w’ani bɛgye sɛ nnome nsɛm a woka too w’abɔfra so no reba mu pɛpɛɛpɛ anaa?
* Nsɛm a afoforɔ ka fa obi ho no tumi bu n’abam, na ɔbu ne ho abomfia sɛ ɔrentumi nyɛ biribi. Nnipakuo bi yɛ anokorɔ se ɔfoforɔ sɛ n’adwene awu, ne ho nyɛ fɛ, mfasoɔ nni ne so, biribiara nni hɔ a ɔbɛtumi ayɛ na wayɛ no yie a, ɛma saa nsɛm no di saa nipa no adwene so. Ebia anka nneɛma a wɔrese no sɛ ɔrentumi nyɛ no nyinaa no yɛ deɛ ɔbɛtumi ayɛ ama no aboro so mpo, nanso ɛsiane sɛ akɔba no sei na n’adwene agye atom nti no, daa ɔhunu ne ho sɛ biribiara nni hɔ a ɔbɛtumi ayɛ. Yɛyi ka a afoforɔ reka saa nsɛm yi afa obi ho no firi hɔ a, ankorɛankorɛ bi nso tumi se wɔn ho saa ara. Wɔtumi hwɛ wɔn ho anim wɔ ahwehwɛ mu se wɔn ho sɛ ‘Me deɛ me ho nyɛ fɛ, me deɛ mennim adeɛ.’ Ɛkɔba sei a ɛnam sɛ wohunu wo ho sɛ wo ho nyɛ fɛ na wonnim adeɛ nti no wohwere akokoɔduro wɔ badwam, na wo ho popo mpo sɛ wobɛkyerɛ w’adwene berɛ a moresusu biribi ho no. Wei ma akokoɔduro ne gyidie a wowɔ no wɔ wo mu nyinaa yera.
* Kasa bɔne tumi di awu. Adɛn ntira? Woredi obi ho fɛw na worebu no animtia mprɛ pii no ma no tumi hunu ne ho sɛ mfasoɔ biara nni ne so wɔ asase yi so, ɛte saa deɛ a ɛnneɛ na wuo na ɛtwa sɛ owuo. Nsɛm a ɛtete sei taa kɔ so wɔ yɛn mantam ahodoɔ mu. Nnipakuo bi tumi de asɛm bi a ɛnyɛ nokorɛ fa obi ho teene baabiara ma nipa no gye ne ho a ɛnye. Ebinom tumi mia wɔn ani fa saa ateetee yi mu, nanso wɔn a wɔntumi no bɔ mmɔden sɛ wɔbɛgye wɔn kra afiri wɔn nsam ɛsiane sɛ yea no so sene wɔn.
* Kasa bɔne sane tumi de ntetemu ba. Mennye nni sɛ ɛbɛyɛ mmerɛ sɛ obi ne ɔfoforɔ a ɔreka nsɛmmɔne fa ne ho daa, na ɔrebu n’abam daa no bɛnya ayɔnkofa soronko bi. Wei da nkyɛn a, nnipa binom nam wɔn kasa so tete afoforɔ ntam. Daa wɔka nsɛmmɔne, wɔn ani kyiri asomdwoeɛ.
Yɛnim sɛ kasa bɔne bɛtumi anya nsunsuansoɔ bɔne wɔ yɛne afoforɔ so a, ɛnneɛ na deɛn na ɛsɛ sɛ yɛyɛ?
* Ka nsɛm pa fa wo ho dabiara. Berɛ biara a wobɛgyina ahwehwɛ mu no, se wo ho sɛ, ‘A, adɛn na me ho yɛ fɛ saa, mɛtumi ayɛ biribiara, menim adeɛ, me yadeɛ yi bɛfiri me so, abrabɔ no bɛyɛ yie.’ Hunu wo ho sɛ nipa a ɔsom bo pa ara. Saa nsɛm yi hyɛ wo den, na ɛma wo ahoɔden a wode bɛyɛ daa daa dwumadie.
Awofoɔ, momma mo kasa nyɛ nhyira mma mo mma. Monse wɔn sɛ, ‘Daakye mobɛdi yie, mobɛnyini akyɛ, deɛ mobɛyɛ biara nsi mo yie.’ Ɛkɔba sei a, ebia na ɛnyɛ deɛ nanso wo nsɛm no bɛdane nhyira a ɛbɛdi abɔfra no akyi afebɔɔ.
* Kasa pa de nkuranhyɛ ba. Berɛ a yɛbɛhunu sɛ afoforɔ rekɔ mmerɛ a ɛmu yɛ den mu no, kasa a ɛyɛ dɛ na wɔhia no wɔn asom yɛ nkuranhyɛsɛm. Mpanimfoɔ se, ‘Akyea na ɛmmuiɛ, ɛsene abɛbuo nyinaa dɛ.’ Tɛkyerɛma dɛ, kasadɛ anaa nkuranhyɛsɛm tumi sesa obi adwene firi di a ɔbɛdi ne ho awuo anaa nsusuiɛ bɔne bi ho.
Akyerɛkyerɛfoɔ, mommɔ mmɔden sɛ mode nkuranhyɛ bɛdi dwuma wɔ moadekyerɛ mu. Mpo, berɛ a osuani bi ama mmuaeɛ a ɛnyɛ nokorɛ wɔ w’asɛmmisa ho wɔ adesuaberɛ mu no, fa kasadɛ tenetene no kɔsi sɛ ɔbɛduru susudua a worehwehwɛ no ho sene sɛ wode nsɛmyea bɛkum ne sunsum. Ɛkɔba no saa, ɔbɔ ne ho mmɔden wɔ adesua biara mu a ɔnnya haw biara.
* Mpɛn pii nso, deɛ afoforɔ hia ne sɛ obi bɛbɔ wɔn aba so wɔ biribia pa bi a wɔayɛ ho, anaa wɔbɛkyerɛ sɛ biribi a wɔde ayɛ wɔn ho no yɛ fɛ. Ɛno nko ara de anigyeɛ kɛseɛ bi wura wɔn mu. Ɛno nti ɛho hia sɛ ɛtɔ da a wobɛse wo yɔnko anaa wo nua bi sɛ, ‘wo tirinwi a woabɔ yi yɛ me fɛ, wo ho ayɛ fɛ papa, wobɔɔ wo ho mmɔden wɔ wo dwumadie no mu, woayɛ adeɛ.’ Nsɛm a ɛtete sei no ma nipa no hunu sɛ kakra a ɔyɔeɛ no nso obi ani gye ho. Na ɛma no bɔ ne ho mmɔden kɛse sɛ ɔbɛyɛ deɛ ɛkyɛn saa. Nanso, nhwehwɛ sɛ afoforɔ bɛbɔ wo aba so na wɔahyɛ wo nkuran daa. Wo ankasa sua ɔkwan a wobɛfa so anya wo mu gyidie na woahyɛ wo ho nkuran wɔ biribiara mu sɛdeɛ ɛbɛyɛ a abammuo biara mma berɛ a afoforɔ anhunu deɛ woayɛ no.
Hyɛ no nso sɛ kasa tumi ma nkwa, na ɛsane nso tumi kum. Bɔ mmɔden sɛ wonam wo kasa so bɛhyɛ nkuran na woagye nkwa berɛ biara. Ma afoforɔ nnya anidasoɔ, anigyeɛ ne akokoɔduro wɔ wo kasa mu.
