Ntεnkyεm yε mmᴐfra yareε a ntεnkyεm mmoawa no na εde ba. Sε obi a wanya mmoawa no bi bᴐ wa gu mframa mu anaa adeε so a, wᴐn a atwa ahyia no tumi nya bi. Mmoawa yi tumi tena mframa no mu dᴐnhwere 1. Mpεn pii no, yεhunu no sε εyε mmᴐfra yareε deε, nanso mpanimfoᴐ nso tumi nya saa nyarewa yi bi. Ↄpanin a n’apᴐmuden no nsi pi tumi hunu amane wᴐ saa yareε yi nsam. Ano tumi yε den pa ara. Nyarewa ahodoᴐ pii tumi bᴐ mmᴐfra a wᴐnnyaa mfeε 5 ne mpanimfoᴐ a wᴐn mfeε no boro 20 εsiane ntεnkyεm yi. Yareε yi aduro a wᴐde fa mpaneε mu no rekame ayε sε εno na εtumi brε ano ase kakra.
Ntεnkyεm a wᴐsane frε no rubella yi yε adeε a εterε ntεm pa ara, na ano nso tumi yε den ma mmᴐfra, na mpo etumi ma wᴐhwere wᴐn akra. Ɛwom sε εsiane sε wiase afanan mu mmᴐfra dodoᴐ no ara nya mpaneε no bi bᴐ nti, ama ntεnkyεm yarewuo so ate deε, nanso afe biara, nnipa bεboro 200,000 na wᴐhwere wᴐn nkwa εsiane ntεnkyεm.
Sε obi nya ntεnkyεm a, εmu nneyεeε ne nsεnkyerεnne no hyε aseε bεyε nna 10 de rekᴐ 14 berε a onipa no ne ntεnkyεm aboa no anya nhyiamudie no mu. Nneyεeε ne nsεnkyerεnne ahodoᴐ a mpεn pii εtaa da adi no bi ne sε onipa no nya abunu ne ahobene, ᴐbᴐ wa, ne hwene mu sᴐne nsuo, menemkuro nso tumi yε no, n’ani ase tumi honhono anaa εtaatae, nsaa nketewa bi a ano ahyε nsuo mfitaa mfitaa tumi gu onipa no afono mu wᴐ n’anum, honam ani nsaa anaa εborᴐ a εterε na εtumi tu bom gu onipa no.
Sε obi nya saa yareε mmoawa yi bi a, n’adida no yε nnidisoᴐ a εsi bεyε nnawᴐtwe 2 de rekᴐ 3 mu.
- Deε εdi kan yε berε a onipa no ne mmoawa no bεdi ahyia ne mmerε dodoᴐ a εbεdidi nnipa no mu ansa na ada adi. Firi nna 10 de rekᴐ 14 a εdi kan no mu no, nneyεeε anaa nsεnkyerεne biara nna adi mma obiara nhunu. Ɛbεnenam nnipadua no mu ara aterε afa nipadua akwaa no nyinaa mu.
- Deε εtᴐ so ne sε, nneyεeε bεda adi, nanso εnsi no pi mma onipa no anaa wᴐn a wᴐatwa ne ho ahyia nhunu sε wanya ntεnkyεm mmoawa no bi. Abunu ne nyarewa nketewa bi te sε εwa, ne hwenem nsuo a εsᴐne, ne ani ase a εtaatae ne menemkuro a εdi kan ba onipa no soᴐ no nyε adeε a ano nhyε da nyε den. Saa yareε yi tumi bᴐ nipa no bεyε nnanu anaa nnansa.
- Yareε no ano yε den, na nsaa hyε aseε gu onipa no saa berε yi. Nsaa a εmu abere kᴐᴐ na εbi mu soso hyε aseε pue onipa no ho. Ɛhyε aseε firi n’anim kane ma n’anim sesa. Nna kakra bi ntam no, nsaa to trε ba onipa no nsa ho, ne bo so, n’akyi, ne serε ho, ne nan ho ne ne nan ase nyinaa. Berε korᴐ no ara mu no, ne ho tumi bene te sε egya ma mpεn pii no, ano den wᴐ afidie a wᴐde sese ahobene no so no tumi duru 40C anaa 41C.
- Deε εtwa toᴐ εyε ahotᴐ. Sε onipa no nya ayarehwε na wᴐbᴐ no mpaneε a, ntεnkyεm nsaa no tumi di bεyε nna nson. Nsaa no hyε aseε yera firi onipa no anim, na ne nan ase ne ne nan ho atwa toᴐ. Berε a nyarewa a ntεnkyεm yi de baeε no rekorᴐ no, εwa no ne sε onipa no honam rehwane anaa εredane ayε tuntum no bεwᴐ hᴐ bεyε nna 10 ansa na εno nso afiri hᴐ.
Onipa a wanya ntεnkyεm tumi de mmoawa no terε nna nwᴐtwe ntam a, εno ne nna nnan a εbεba ansa na nsaa no apue ne honam ani, εnna sε nsaa no pue a, ne nna na akyi.
Ntεnkyεm yε yareε kodiawuo a εredi amansan ne mmusua nya. Bᴐ wo ne w’abusua ho ban. Bᴐ paneε no bi, na sε wo ho nnipa bi nya bi a, mma no nkᴐ nnipa mu, na afei kᴐhunu wo dᴐkota.
