Daa yɛsua nnepa a ɛbɛboa yɛn apɔmuden, ɛsiane sɛ wowɔ nkwa a na wowɔ ade. Yɛgu so ara rehwɛ mogya mu nhwehwɛmu ahodoɔ a ɛsɛ sɛ ɔbaa ne ɔbarima bi yɛ ansa na wɔatu awadeɛ ho anammɔn. Megye di sɛ wokae gyɛnotaepo mogya mu nhwehwɛmu a yɛadi kan asua ho adeɛ no.
Foforɔ a yɛrebɛhwɛ no ɛnnɛ nso yɛ Resose mogya mu nhwehwɛmu a broni frɛ no sɛ “Rhesus factor”. Megye di sɛ w’adwene mu ayɛ wo keserennee, nanso nsuro. Wonkenkan biribiara nwie no na nteaseɛ ayɛ adwuma. Momma yɛnkɔ so ɛ! Yɛka sɛ Resose mogya mu nhwehwɛmu a, na yɛrepɛ akyerɛ sɛn koraa?
Resose mogya mu nhwehwɛmu yɛ nhwehwɛmu ahodoɔ no bi a ɛkyerɛ ma yɛhunu sɛ ɔbaa ne ɔbarima bi mogya hyia a ɛno nti ɛtumi ma wɔn kwan wɔ awareɛ mu wɔ berɛ a ɛrenya nsunsuansoɔ biara wɔ mmɔfra wɔbɛwo wɔn no so. Ɛyɛ biribi a yɛbɛtumi ahunu no wɔ nnipa binom mogya nkwammoa ho, ɛno na yɛfrɛ no sɛ antegen no. Sɛ obi kɔ ayaresabea kɔyɛ resose mogya yi mu nhwehwɛmu na sɛ saa antegen yi bi wɔ ne mogya nkwammoa no ho a, adɔkotafoɔ twerɛ no sɛ ɔyɛ ‘positive’. Ebi nni ho nso a wɔtwerɛ no sɛ ɔyɛ ‘negative’.
Ɛba awareɛ mu a, mpɛn pii no yɛka sɛ ɔbaa bi yɛ resose ‘negative’ a, na ɛkyerɛ sɛ ne mogya mu nkwammoa no rentumi nnya sɔretia biara wɔ abɔfra a wɔbɛwo wɔn no awoɔ mu berɛ a ɔne ɔbarima a ɔno nso nkwammoa no antegen yɛ ‘negative’ no anya nhyiamu.
Saa ara nso na sɛ ɔbaa bi mogya mu nkwammoa yɛ resose ‘negative’, na sɛ ɔne ɔbarima a ɔyɛ resose ‘positive’ nya nhyiamu a, awoɔ mu no ɔbaa no mogya nkwammoa no tumi nya sɔretia wɔ abɔfra no mogya nkwammoa so berɛ a abɔfra no nso mogya nkwammoa yɛ resose ‘positive’.
Hyɛ no nso sɛ mmɔfra taa nya wɔn resose mogya firi wɔn agyanom hɔ, sɛ ɛyɛ ‘positive’ anaa ‘negative’. Yei nti sɛ agya no yɛ ‘positive’ a, ɛtaa ba sɛ abɔfra no nso bɛyɛ ‘positive’, saa ara na sɛ agya no yɛ ‘negative’ a, ɛtaa si sɛ abɔfra no nso bɛyɛ ‘negative’.
Momma yɛnhwɛ nhwɛsoɔ wei ɛ, sɛ maame bi mogya nkwammoa yɛ resose ‘negative’, na papa no nso deɛ yɛ ‘positive’ a, abɔfra no tumi bɛyɛ ‘positive’. Sɛ ɛkɔba no saa a, maame no mogya mu nkwammoa ‘negative’ no tumi tra kɔ awodeɛ no mu, faako a abɔfra no da no kɔnya nsunsuansoɔ bɔne wɔ abɔfra no mogya nkwammoa so ɛfiri sɛ, maame no mogya nkwammoa no tumi nya sɔretia wɔ abɔfra no deɛ so. Ɛkɔba saa a, maame no nyinsɛn a ɛdi kan no deɛ saa abɔfra no ho nka. Mmom mmɔfra a ɛdi akyire no awoɔ mu na sɔretia no bɛba. Wosusu sɛ deɛn ntira? Abɔfra a ɔdi kan no nnya sɔretia biara ɛfiri sɛ saa berɛ no na maame no mogya nkwammoa no nhunuu abɔfra no deɛ no sɛ tamfo a ɔbɛtumi anya sɔretia wɔ ne so. Mmom ɛnnuru mmɔfra a ɛdidi soɔ no awoɔ so deɛ, na maame no mogya nkwammoa no atumi ahunu abɔfra no nkwammoa no sɛ tamfo a ɔsɔre tia no a ɛyɛ yie. Sɛ ɛkɔba no saa a, ɔhaw kɛseɛ a ɛde ba saa mmɔfra a wɔdidi soɔ no so ne sɛ, maame no mogya nkwammoa no tumi ma abɔfra no deɛ no sɛe ntɛntɛm so, wei ma abɔfra no mogya nso we ntɛntɛm anaasɛ ɛtumi ma abɔfra no wu mpo.
Wei yɛ awerɛhosɛm kɛseɛ, nanso anidasoɔ ne anigyesɛm a ɛwɔ hɔ seesei ne sɛ, ɔbaa bi kɔyɛ ne resose mogya mu nhwehwɛmu na ɔhunu sɛ ɔhaw a yɛaka ho asɛm wɔ soro hɔ yi bi bɛtumi asi wɔ n’awoɔ mu a, adɔkotafoɔ kyerɛ sɛ wɔbɛtumi awɔ no paneɛ wɔ berɛ a nyinsɛn no anya nnawɔtwe aduonu nnwɔtwe rekɔ aduasa mmienu de asi ɔhaw a anka maame no nkwammoa bɛnya wɔ abɔfra no deɛ so no ho kwan. Adɔkotafoɔ frɛ saa paneɛ yi sɛ ‘RhoGam’.
Me nua, ɛyɛ sɛ wobɛyɛ saa nhwehwɛmu yi ntɛm so, apɛ ho anosie ntɛm sene sɛ wobɛhwere wo ba bi wɔ bu a wobɛbu w’ani agu so no mu. Wei yɛ nhwehwɛmu a ɛho hia yie, nti fa no asɛnhia.
Mma wo werɛ mfiri sɛ wobɛkyɛ ama no aso wo nua ne wo yɔnko no so. Kenkan no yie pɛ mu nteaseɛ yie, na ka ho asɛm.
