Awerɛhosɛm yi sii Dwoada, Ɛbɔ 12, 2022 wɔ Redmond a ɛwɔ Australia.
Aprosifoɔ kyerɛ mu a, ɔpanin a wadi mfeɛ 71 yi ne aboa no atena sɛ n’ayɛmmoa mfeɛ pii nanso obi nnim deɛ ɛyɛeɛ a ɛnnɛ deɛ, aboa yi bo tumi fuu ne wura no ara maa ɔdii no awu saa.
Amanebɔ a BBC de too dwa ne sɛ, ɔpanin yi busuani bi hunuu sɛ ɔpanin no da hɔ a wayɛ mmrɛ ama mogya repram no. Ntɛm ara na ɔfrɛɛ adɔkotafoɔ sɛ wɔmmɛyɛ no mmoa.
wɔkɔduruu hɔ no, na aboa no ani asɔ gya kɔɔ ama n’ani so ayɛ kakra a onipa biara ntumi nkɔ n’anim. Yei nam so maa aprosifoɔ a too no tuo kum no ansa na adɔkotafoɔ no mpo renya kwan akɔ ɔpanin a na ne ho aka mu no nkyɛn.
Onipa a wakwadare wɔ kangaroo ho nsɛm mu, Owura Graeme Coulson de too Australian Broadcasting Corporation anim sɛ, “Kangaroo yɛ mmoa a wɔwɔ akodeɛ bebree wɔ wɔn ho. Saa akodeɛ yinom bi ne wɔn se a ɛyɛ nan no, wɔn mmɔwere ne wɔn nan a ne ho yɛ den no.” Ɔde kaa ho sɛ, “saa nnoɔma yi na wɔde bɔ wɔn ho ban berɛ biara a wɔn bo bɛfu.”
“Yei nti, sɛ biribi hyɛ wɔn abofuo anaa ɛma wɔn home te a, ɛyɛ hu pa ara.
BBC sane de kaa ho sɛ, Coulson kyerɛɛ mu sɛ, adeɛ baako a ɛhyɛ kangoroo mmarima no abofuo titire pa ara ne sɛ, wɔhunu no sɛ wɔne nnipa nyinaa tumi gyina wɔn nan baanu so, na ɛno mma wɔn bo nnwo koraa.
Kangaroo dodoɔ a wɔwɔ Australia no dodoɔ bɛyɛ ɔpepem aduonum, wɔn mu duru bɛyɛ kilogram aduokron, ɛnna wɔn tenten nso bɛyɛ anamɔn nsia akyiripɔ nsia.
Nanso, yei nyinaa mu no, wɔkaa wɔ kaseɛbɔ no mu sɛ, kangaroo dodoɔ a wɔwɔ Australia no ntaa nto nhyɛ nnipa so sɛdeɛ asi yi ɛfiri sɛ, ɛfiri 1936 bɛsi sɛsɛɛ no, yei ne deɛ ɛdi kan a asi wɔ ɔman abakɔsɛm no mu.
